ازاي تدخل متاحف ومعالم باريس ببلاش

متحف اللوفرالصورة: news.artnet.com
June 3, 2016

باريس مدينة الفن وسواء بتحب المتاحف والأماكن السياحية أو بتحسها مملة، في إحتمال كبير انك هتبقى عايز تشوف متحف من مجموعة متاحف باريس المختلفة اللي بتعرض كل أنواع الفنون. ولو أنت زينا في مشروع سفر وعايز تخش المتاحف ديه بس من غير ما تصرف فلوس خالص أو علي الأقل تدفع فلوس قليلة، لازم تبقى عارف الأيام والأوقات اللي المتاحف بتسمح فيها بالدخول ببلاش أو التخفيضات اللي بتتعمل للزوار. هتلاقي هنا أهم المتاحف والأماكن اللي ممكن تدخلها ببلاش أو بفلوس قليلة.

اللوفر ببلاش في أول أحد في شهور معينة (اكتوبر لمارس)

من أول شهر أكتوبر لغاية شهر مارس متحف اللوفر بيفتح أبوابه ببلاش لأي حد عايز يدخله في أول أحد من كل شهر في الشهور ديه. طبعاً إعمل حسابك على الزحمة بس في نفس الوقت هتبقى دخلت اللوفر من غير ولا مليم.

متحف اللوفر باريس

متاحف ببلاش في أول أحد في شهور معينة (نوفمبر لمارس)

اللوفر مش الحاجة الوحيدة اللي تحاول تدخلها ببلاش لأن فيه أماكن ومتاحف تانية تستاهل انك تروحها وطبعاً هتبقى أحسن لو مدفعتش فيها فلوس.

Arc de Triomphe:من علامات باريس وفرنسا. أكبر قوس في التاريخ، تقدر تطلعه من غير ما تدفع فلوس وتستمتع بالمنظر من فوق أو تخش المتحف بتاعه.

قوس النصر

Pantheon: كنيسة تحولت لمكان لدفن أهم رموز فرنسا بما فيهم فولتير وفيكتور هيجو وغيرهم.

Chateau de Versailles: قصر ملوكي كبير وقدامه جنينة فخمة تقدر من خلالهم تعرف كل حاجة عن عيشة
ملوك فرنسا في القرن ال١٧ وال١٨.

*اقرأ ايضاً: ٧ نصائح تعرفها قبل ما تشوف برج إيفيل لأول مرة

أماكن تانية تقدر تدخلها ببلاش في أول أحد في الشهور ديه: Conciergerie، Sainte Chapelle، Chateau de Vincennes

متاحف ببلاش كل أول أحد من كل شهر طول السنة

لو مش هتعرف تظبط وقتك على وقت اللوفر ففي متاحف تانية كتير بتبقى ببلاش في أول أحد من كل شهور السنة كلها زي:

Musee d’Orsay: تاني متحف بعد اللوفر تقريباً من حيث الشهرة وبيقدم مجموعة فنية رائعة ما بين لوح .وتماثيل و معمار وصور

متحف في باريس

اقرأ ايضاً: اقعد فين في باريس، نسخة الهوستيلز*

Musee d’Art Moderne: قريب من برج إيفيل ومن أهم متاحف الفن الحديث في باريس

Musee Rodin: متحف عبارة عن بيت خرافي من القرن الثامن عشر لو حابب تتعرف علي العيشة في فرنسا زمان

وديه مجموعة متاحف تانية تقدر تدخلها من غير فلوس في أول أحد من كل شهر: Musee national de l’Orangerie، Musee national Picasso ، Musee des annees 30

متاحف ببلاش طول الوقت

عشان لو مش عارف تظبط سفريتك لباريس على أول حد من أي شهر، في متاحف تدخلها ببلاش مهما كان الوقت اللي بتزور باريس فيه:

Musee Carnavalet: متحف موجود في حي ماريس المشهور ومن خلاله تقدر تعرف تاريخ المدينة العريقة ديه.

Maison de Victor Hugo: الكاتب والشاعر اللي بيعتبر من أشهر الكتاب اللي عدوا على فرنسا، تم تحويل بيته .إلى متحف ممكن أي حد يدخله في أي وقت

متحف فيكتور هوجو

مجموعة من المتاحف والأماكن اللي ممكن تدخلها ببلاش: Maison de Balzac، Musee Curie، Musee de la Vie Romantique، Notre Dame Cathedral، Arene de Lutece

ملحوظة: لو أنت لسة في الجامعة يبقى تستخدم كارنيه الجامعة في أي معلم بتدخله بفلوس لأن الطلبة بيبقى ليهم تخفيض على كل الأماكن تقريباً.

عندك نصيحة بخصوص باريس؟ قولنا عليها في الكومنتس.

مصادر الصور: Getyourguide.com، Kleesbutterfly، DiscoverWalks.com،

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.