٥ أكلات في باريس للناس اللي معهاش فلوس كتير

كرواسون في باريس
June 9, 2016

مستوى الأكل عامة في باريس فوق الرائع. كناس بتهتم بالأكل وبيبقى عندنا فضول نجرب أنواع أكل مختلفة وإحنا مسافرين، إستمتعنا بطعم معظم الأكلات في باريس. ومش معنى انك في باريس يبقى لازم تاكل في مطاعم فاخرة وتدفع دم قلبك، لأن في أكلات كتير تقدر تشتريها بكام يورو لو مش عايز تصرف فلوس كتير. وفيه أكلات بالنسبالنا تُعتبر عادية بناكلها كل يوم في مصر لكن اللي بيميزها في باريس هو جودتها وديه بتخلي الطعم مختلف تماماً.

دول خمس حاجات مش هيكلفوك غير فلوس قليلة وفي نفس الوقت طعمهم هيعجبك:

١- Baguette

ده العيش الرسمي للمدنية، بيتميز بحجمه وقرمشته. العيش ده من كتر ما هو مشهور بيعملوا مسابقة كل سنة عشان يختاروا أحسن مخبز بيعمله في باريس! المخابز هناك منتشرة في كل حتة وبيقدموا جودة عالية للعيش والمخبوزات، فهتلاقي النوع ده من العيش في كل مكان في باريس بدون مبالغة.

عيش Baguette

٢- Macarons

إنتشروا مؤخراً في مصر شوية في أماكن محدودة. تحلية فرنسية مشهورة تم إختراعها عن طريق الإيطاليين والفرنسيين من زمان. الماكرون بيتعمل بمذاقات مختلفة زي الكراميل واللمون والعسل وجوز الهند ومذاقات تانية كتير. هتلاقيهم في المخابز ومحلات الحلويات. أهم حاجة تاكله وهو فريش مايكونش بايت.

Macarons ماكارون

٣- الجبنة

جبنة؟ ايوا، الجبنة هناك ليها مليون نوع مختلف وهتلاقي محلات متخصصة مش بتبيع حاجة غير جبنة لأنهم بيقدروها جداً. في محل جبنة دخلناه كان فيه زي واحد متخصص في الجبنة، شغلته أنه يقولك الأنواع المختلفة ويساعدك تدوق الأنواع ديه وتحدد عايز تشتري أيه.

*اقرأ أيضاً: ازاي تدخل متاحف ومعالم باريس ببلاش

محل جبنة في باريس

٤- الكريب

بما أن فرنسا على الحدود مع بلد الكريب، بلجيكا، فده ساعد في حلاوة طعم الكريب الفرنساوي. زي ما لازم تروح برج إيفيل وانت في باريس لازم تاكل كريب، لأن هتلاقيه لا يقارن بالنسبة للكريب اللي بناكله في مصر. فيه عربيات في الشارع كتير بيعملوه بس اتأكد انهم بيعملوا الكريب بنفسهم في ساعتها مش بيسخنوا كريب جاهز.

كريب في باريس

٥- كرواسون بالشوكولاتة

الكرواسون عموماً يعتبر وجبة فطار مشهورة في مدينة النور بتلاقيها موجودة في كل حتة. بالنسبالنا الكرواسون بالشوكولاتة مع قهوة باللبن فطار مثالي هناك ومش هيكلفك حاجة.

ده طبعاً مش أحلى أكل ممكن تأكله لأن في أكلات رائعة في مطاعم باريس المختلفة لكن الأكلات ديه تقدر تشتريها بسعر معقول وفي نفس الوقت طعمها حلو. فلو أنت هتقدر تحرم نفسك من الوجبات الدسمة اللي بتاكلها كل يوم في مصر في سبيل انك توفر فلوس في باريس تستخدمها في حاجات تانية، يبقى تعيش على الأكلات ديه كل يوم وأنت هناك.

مصادر الصور: netdna-cdn.com، amazonaws.com، nogarlicnoonions.com، lavishlivingforless.com

إبعت المقالة ديه لصاحبك اللي عايزه يطلع معاك فرنسا أو اقرأ المقالة ديه عشان تعرف ازاي تطلع فيزا من سفارة فرنسا

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.