ربا وهيبة: ١٠ أماكن لازم تزورهم لما تروح كندا

اوتوا كندا
June 26, 2016

أنا سافرت كندا مرتين، مرة في الصيف ومرة في الشتاء وفي كل مرة منهم شوفت أماكن مختلفة في اوتوا وتورونتو… دول أكتر أماكن أنصح أي حد مسافر كندا أنه يزورهم.

١- شلالات النياجرا فى تورونتو Niagara Falls

شلالات نياجرا

من أجمل الأماكن اللي شوفتها في تورونتو، أنت بتشترى تذكرة وبتركب مركب بتقربك من الشلالات و بتشوف المنظر قدامك أحلى بكتير من أي صور، و كمان تقدر تزور المكان بالليل وتشوف الشلالات منورة بأنوار ملونة. كمان هتلاقي ماركت كبير أوي فيه محلات و مطاعم قريبة أوي من الشلالات تقدر تقضى فيها باقى اليوم. كمان هتلاقي محل Hershey’sتقدر تجيب منه كل أنواع ال Chocolate اللي نفسك فيها.

Hershey كندا

٢- Dundas Square

من أشهر الأماكن برضه في تورونتو وتقدر تشوف هناك ناس بتلعب مزيكا في الشارع وبيكون أجمل لما تروحه بالليل، وتقدر تتحرك بسهولة في تورونتو عن طريق المترو.

كندا ميدان Dundas

٣- Toronto Zoo

لازم تروح حديقة الحيوانات في تورونتو، هتلاقيها متقسمة على شكل قارات وحيوانات كل قارة موجودة في منطقة معينة وبتاخد خريطة وأنت داخل قبل ما تبدأ ال Tour، وتقدر تستريح في مطاعم صغيرة هناك وكمان فيه محلات تقدر تشتري منها Souvenirs

جنينة حيوانات كندا

٤- Canada’s Wonderland

حاجة كدة زي دريم بارك عندنا بس في كندا بقى! ممكن تقضي اليوم كله هناك. الأسهل تروح هناك بعربية أو باص وهي تقريباً ٤٠ كيلومتر من .تورونتو

Canada's Wonderland

٥- CN Tower

.من أشهر الأماكن السياحية في تورونتو وهو عبارة عن برج ارتفاعه ٥٥٣ متر و تم اختياره سنة ١٩٩٥ كواحد من عجائب الدنيا السبعة

CN Tower كندا

٦- National Gallery of Canada

من أهم المتاحف في كندا.معروض فيه صور ولوحات من الفن القديم والفن المعاصر. المتحف ده مخصص يوم واحد في الأسبوع مسموح فيه لأي حد يدخل المتحف من غير ما يدفع فلوس. كمان مسموح التصوير فى المتحف ما عدا في قاعات معينة.

National Gallery of Canada كندا

٧- Byward Market

في وسط البلد بتاعت أوتوا هتلاقى في ماركت كبير أوي اسمه “بايوارد”، المكان ده كله مطاعم ومحلات ومكتبات وفيه Mall كمان اسمه “Rideau Centre”. و هتلاقي في “”Rideau Street مطاعم بتقدم أكل حلال و شاورمة. طول ما أنت ماشي في الشارع هتلاقي ناس بتعزف وبتغنى وبترسم.

فن الشارع في كندا

٨- Parkways in Ottawa

في أوتوا شوارع مخصصة للعجل وللناس اللي بتحب الجرى و أكيد مش مسموح لأى عربية انها تدخل الشوارع ديه.

الخريف في كندا

الطرق ديه مليانة شجر ومنظرها بيكون جميل جدا بالذات في الخريف لما بيبدأ ورق الشجر يتغير لونه. الوصول للأماكن ديه سهل أوي بالإتوبيس وكمان استعمال الGPS هناك بيساعدك توصل لأي حتة من غير ما تطلب مساعدة من حد.

٩- Gatineau Park

جاتينو بارك من أجمل الأماكن اللي ممكن تروح تعمل فيها Hiking وفي ناس بتعمل camping هناك لما الجو يكون مناسب.

المشوار ده بياخد نص ساعة بالعربية من أوتوا و ياريت تاخد معاك snacks عشان مش هتلاقى أماكن هناك تشتري منها.

١٠- National Arts Centre in Ottawa

ده مكان زي الأوبرا كدة، كل شهر بينزلوا على ال Website الحفلات اللي هتكون موجودة في الشهر ده. بيقدموا حفلات موسيقى وباليه ورقص وبرودواي بأسعار مختلفة.

لو عجبتك المقالة ديه اقرأ تجربة ميرنا فوزي في اوتوا في كندا.

ربا وهيبة
ربا وهيبة
.ربا بتدرس علاقات عامة و اعلانات فى كلية الاعلام و التصوير أهم هواياتها