ميرنا فوزي: ازاي تقدم على فيزا كندا في خطوات سهلة وبسيطة

علم كنداالصورة: free largeimages.com
June 29, 2016

لو بتفكر تسافر لكندا، اول حاجه ممكن تيجى فى بالك هو ان الأجراءات ممكن تكون صعبة ومتعبة فده ممكن يخليك تغير رأيك بسهولة او تكسل تبدأ :تقدم. لو حابب تعرف ازاى تقدم على فيزا كندا بسهولة وبساطة، تابع الخطوات دى

علشان تقدم على فيزا كندا مبدئيأ، أول حاجة لازم تتعمل في خطوات التقديم هي ملىء أستمارة التقديم للفيزا اونلاين، اللينك للأستمارة هنا

اختار من الصفحة نوعية الأستمارة اللي هتملاها (سياحة)، املا الأستمارة واحفظها واطبعها علشان تتسلم مع بقيه الاوراق في الاخر.

ملىء الأستمارة لازم يوضح سبب طلب الزيارة لكندا، لازم يكون سبب الزيارة واضح سواء كان سياحة، دراسة، عمل. وتحدد المدة اللي هتقضيها و المكان اللي هتكون فيه (عنونان الإقامة)، لو تعرف حد ساكن في كندا وممكن يكتبلك دعوه انك تزوره ده ممكن يساعد جدأ على القبول لكن الدعوة مش ضرورى عامة.

فيه كمان استمارة تانيه للأسرة بيبقى فيها بيانات عن أسرة الشخص المسافر الموجودة فى مصر، للتأكيد على أن المسافر ليه أسره في بلده الأصلى هيرجعلها، كنوع من أنواع الضمانات.

بعد كده، فى ورق و مستندات لازم تكون جاهزة ومتحضرة للتقديم مع الأستمارة، أولهم استمارة بنكية بتفيد أن المسافر أو المسئول عن المسافر عندهم دخل ثابت فى البلد.
طبعأ لو بتدرس لازم يكون فيه ورق أثبات بتدرس فين ويكون فيه دليل على انك هاترجع تاني البلد لتكملة الدراسة، لو اللي بيقدم مش طالب يبقى طبعأ مطلوب جواب عمل بيثبت الكلام ده

جواز السفر كمان بيتم تقديمه مع الأوراق علشان الفيزا تتحط فيه

بتروح بعد كده مقر السفارة علشان تقدم الطلب للفيزا وبيكون فيه تكلفة للتقديم. المركز اللي بيتم التقديم من خلاله موجود في الجيزة و اللينك للمكان هنا.

كل ما كان الورق اللي معاك واجاباتك فى الأستمارة مقنعة أنك هترجع تانى لبلدك الأصلى بعد الزيارة كل ما كان من السهل انه يتم قبول طلب الفيزا.
.الموضوع مش صعب بجد، وانشاء الله كلنا نعرف نسافر الأماكن اللي نفسنا نروحها

اتعرف على تجربة ميرنا في كندا والحاجات اللي عملتها هناك.

ميرنا فوزي
ميرنا فوزي
بتدرس علاقات عامة وقضيت سنة في جامعة اوتاوا في كندا و كانت اهم و اجمل تجربة في حياتها. بتحب السفر عامة و نفسها تروح اماكن كتير منها ايطاليا وروما والأماكن اللى فيها مبانى اثرية. غير السفر، ميرنا بتحب القراءة والرياضة جداً.