محمد رضا: ليه لازم تسافر كيب تاون في جنوب افريقيا

سياحة في جنوب افريقيا
August 11, 2016

اقل ما يقال عن مدينة كيب تاون انها مدينة فائقة الجمال. مدينة بتتنفس سياحة، كل ما تتحرك كل ما تتشجع انك تصرف فيها فلوس. انا روحتها في شهر يوليو اللي هو شهر الشتاء عندهم عشان هي عكسنا في الجو، الشتاء في يونيو ويوليو والصيف في ديسمبر ويناير.

الطيران الداخلي في جنوب افريقيا

اول يوم وصلت بليل معرفتش اعمل حاجة، كانت رحلة طويلة من الكويت وترانزيت في أديس ابابا ومنها لجوهانسبرج في جنوب افريقيا علي الطيران الاثيوبي ومن جوهانسبيرج العاصمة لكيب تاون طيران داخلي رخيص اوي. ممكن تجيب تذكرة رايح جاي طيران داخلي ب٥٠٠ جنيه مثلاً والحلو ان الطيران البريطاني شغال داخلي برضه بما ان بريطانيا كانت محتلة جنوب افريقيا زمن طويل فتواجدهم مازال قوي جدا بالاضافة للجنسيات الاوروبية التانية هناك.

جنوب افريقيا كان فيها حرب اهلية بين السود اللي كانوا البيض مستعبدينهم، وبعد المظاهرات الضخمة للتحرير اللي عملها بطلهم، نيلسون مانديلا، اعترفو البيض ان السود ليهم حق في الحياة زيهم زي البيض اللي من اصول اوروبية.

الإتوبيس السياحي

اول يوم كان في جبل الطاولة، بتطلعه بحاجة زي التليفريك كده بس اكبر شوية وتاخد عدد اكبر. بتطلع فوق خالص بتشوف احلى منظر ممكن تشوفه في حياتك. بتشوف الجبال وخط البحر وجزيرة روبن، اللي كان مسجون فيها نيلسون منديلا، فعلاً منظر معتقدش انك ممكن تنساه في حياتك وبعد ما تخلص تكمل اللفة باتوبيس المدينة الشهير اللي لونه احمر، شبه بتاع لندن كدة. تذكرته رخيصة نسبياً ومصمم عشان يلففك المدينة بالكامل في محططات سياحية. ولو عايز تنزل في محطة بتنزل عادي وتركب اتوبيس تاني لانه بييجي كل ٢٠ دقيقة في كل محطة.

سياحة في جنوب افريقيا الطريق إلى كيب تاون

حقول العنب

تاني يوم قضيته حدائق ومتنزهات. بس لما تقول متنزه يعني متنزه فعلاً فيه غابات وجبال وشلالات، حاجة ضخمة كدة. بس مع التنظيم ممكن تقضي فيها نص يوم عشان تعرف تلفها بس حتى لو لوحدك. وبعد اللف في المتنزهات، روحت حقول العنب اللي بيتعمل منها النبيذ الاحمر والابيض وهناك بتشوف مساحات خضرا مزروعة كلها عنب. شكلها مع الجبال خيالي، هناك بتزور معامل صنع النبيذ وبتشوف ازاي بدأت الصناعة ديه وطريقة الانتاج (طبعا كنت حموت وادوق النبيذ بس حرام بقى حنعمل ايه).

سفاري افريقيا

تالت يوم كان سفاري، بتاخدك عربية من الفندق لمدة ساعتين وبتطلع بره كيب تاون عشان توصل للمحمية. بصراحة الطريق للمحمية في حد ذاته فسحة. بتشوف مساحات خضرا وحقول وجبال طول الوقت،.شيء رائع بجد. بتقعد لحد العصر بتلف في عربية عالية مفتوحة وبتشوف حيوانات كتير قدامك. الاسود، الأفيال وحاجات تانية كتير. طبعاً بيبقى فيه مدرب معانا عشان لو فيه حيوان الشيطان وزه او حاجة.

سفاري جنوب افريقيا

جزيرة روبن

رابع يوم كان يوم استثنائي لجزيرة روبن، السجن السابق لنلسون منديلا وحالياً حولوها لمتحف. ديه جزيرة بعيده عن كيب تاون بتروحها بمركب بس لازم تحجز تذكرته قبلها بيومين عشان الزحمة. الجزيرة كانت سجن شديد الحراسة كانوا البيض بيحطو فيه السجناء السود السياسيين. بتشوف الزنازين والغرف والساحات بتاعت السجناء، والجميل ان اللي بياخدوك في جولة كتير منهم كانو سجناء في السجن ده قبل ما يتم اغلاقه. الدولة خلتهم مرشدين عشان يحكو للناس السجن كان عامل ازاي وازاي الكفاح بدأ في البلد للحرية وضد الاستعباد.

كيب تاون جنوب افريقيا

نظرات انتصار بتشوفها في عين السجين السابق والمرشد الحالي اللي واخدك في الجولة وبتحس في اليوم ده ان الحق لازم ينتصر مهما طال الاستبداد او القوة. جنوب افريقيا مكان جميل ومش غالي وفي المتناول جدا. يمكن الصرف فيه ارخص من شرم او الساحل المهم تظبط الفيزا والتذكرة والمصاريف والاقامة بدري…

كيب تاون جنوب افريقيا

لو مهتم بجنوب افريقيا شوف ٦ خطوات هيساعدوك تسافر هناك.

محمد رضا
محمد رضا
مهندس مدني بيشتغل في الكويت ومنها بيلف العالم. سافر بلاد كتير زي الإمارات وقطر وروسيا والهند والمالديف وتركيا وماليزيا وسريلانكا وجنوب افريقيا