٦ أكلات رخيصة تعملهم بسهولة وأنت مسافر

أكلات رخيصة للسفرالصورة: global-goose.com
August 23, 2016

تكاليف السفر تقريباً ما بتخرجش برة كام حاجة أساسية. تذكرة الطيران، الفيزا، الإقامة، المواصلات، الفسح، وأهم شىء، الأكل. لو طول الوقت وأنت مسافر بتحاول توفر فلوس في الحاجات ديه وعايز تقلل من الأكل في المطاعم عشان ما تدفعش كتير والإقامة بتاعتك هتكون في هوستيل أو مكان بيقدملك إمكانية إنك تستخدم مطبخ فالمقالة ديه ليك. لأن في أنواع أكل مختلفة تقدر تجيب مقاديرها بسهولة من أي سوبرماركت في المدينة اللي قاعد فيها مش هيكلفك كتير.

*اقرأ أيضاً: ازاي تختار هوستيل كويس

١- رز وخضار

أو زي ما الناس اللي على طول بتسافر بتسميه Stir Fry. الفكرة إنك تشتري الخضار اللي بتحبه وتقطعه وتبتدي تحطه في طاسه فيها زيت وتطبخه عادي. بعد كدة تجيب رز وتسلقه وتعمل طبق بسيط كغداء أو عشى. لو معاك فلوس زيادة شوية إشتريلك قطعتين فراخ أو لحمة وزودهم على الطبق.

أكل اثناء السفر

٢- بيض أومليت

الحلو في البيض إنك ممكن تاكله في أي وقت في اليوم سواء صبح أو بليل وبيشبعك وكمان بيتعمل بسهولة وبسرعة. الفكرة بس إن مش كل البلاد هيكونوا بيبيعوا البيض بالواحدة وممكن تضطر تشتري ستة بيضات أقل حاجة فبس تبقى عامل حسابك على الموضوع ده. في مدينة غالية زي باريس ١٢ بيضة كانوا بأربعة يورو ونص وفي أمستردام كانوا بإتنين يورو ونص. إشتري برضوا خيار أو طماطم وزودهم على البيض.

بيض اومليت للسفر

٣- مكرونة

رخيصة وبتتعمل بسهولة. إسلقها وإستنى شوية وقلبها وشكراً. في دول كتير في اوروبا مثلاً هتلاقيها في حدود اليورو أو أرخص، على حسب المدينة اللي هتكون فيها. رفه عن نفسك لو معاك فلوس وإعملك برجر جمبها مثلاً أو زودلها مشروم وهكذا حسب ناوي تسرف قد إيه. هتحتاج بس تتأكد أن المطبخ اللي هتعمل فيه المكرونة يكون فيه حلة.

٤- سلطة تونة

لو حالتك صعبة وفلوسك بتخلص، مفيش أسهل من إنك تجيب شوية خضار من أي سوق أو هايبر وإزازة خل صغيرة وكل اللي هتحتاجه ساعتها من المطبخ سكينة وطبق. حط شوية الخضار دول على بعض وحط عليهم علبة تونة وإعتبرها وجبة خفيفة وصحية. لو بتشحت وبتكح تراب إفكس للتونة وقضيها طماطم على خيار.

أكلات رخيصة للسفر

٥- ساندوتشات

مش محتاجة شرح كتير طبعاً. أرخص حاجة ممكن تعملها. عيش وجبنة وعليها طماطم أو عيش ومربى وحتة زبدة أو تونة ومايونيز. أكلة هتكلفك يورو ونص مثلاً.

*اقرأ أيضاً: ٧ مهرجانات للأكل في اوروبا لازم تحضرهم

٦- زبدة فول سوداني وموز

زبدة الفول السوداني مش هتبقى رخيصة غير على المدى البعيد، يعني هيبقى معاك برطمان تقدر تستخدمه عشرين مرة. كيس عيش التوست اللي هتشتريه عشان تفرد عليه الزبدة نفس الفكرة برضوا. إشتريلك موزتين وقطعهم عليها وكدة بقى معاك أكلة سريعة تتاكل في أي وقت في اليوم. نفس الكلام بينطبق على النوتيلا.

اكل اثناء السفر

المهم في الأكلات ديه إنك أولاً تبقى عارف أو حاسب الكمية اللي هتاكلها لإن ممكن تكون مش هتقعد كتير وهتسافر تاني يوم بس عملت أكل كتير ولازم يتحط في التلاجة وإلا هيترمي. يُفضل أصلاً تعمل أكل على قد اللي محتاج تاكله كل مرة عشان ماتضمنش مين ممكن يفتح تلاجة الهوستيل وياخد من أكلك. كمان إعمل حسابك علي مواعيد المحلات حواليك وتبقى عارف بيقفلوا إمتى بدل ما في يوم تكون هتموت من الجوع وكل المحلات قافلة.

ايه تاني أكلات رخيصة بتاكلها وأنت مسافر؟ قولنا إجابتك في الكومنتات

مصادر الصور: backpackerguide.nz، drjohnrusin.com، Wikihow.com، seriouseats.com

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.