هالة عبدو: تعمل ايه لما تروح لندن

سافر لندن London Eye
September 3, 2016
“A bad day in London is still better than a good day anywhere else.”

عن لندن…روحتها مرتين وكنت ناوية علي التالتة. يمكن بالنسبالي كانت من أكتر المدن اللي عجبتني واكتر مدينة فيها نظام. من تجربتي في المرتين دول هشرح أهم الأماكن اللي لازم تروحها لو زورت لندن.

الإقامة

من تجربتي في الفنادق لو حد حابب يقعد في حاجة اكتر من خمس نجوم ممكن يحب Thistle اللي في اوكسفورد سترييت اللي فيه كل حاجة وكل المحلات والمطاعم واكتر شارع حيوي ولازق في المحطة بتاعت Marble Arch ،اما لو حد حابب حاجة بسيطة ثلاث نجوم للنوم والفطار بس وفي نفس الوقت مكانه حلو جداً في كذا حاجة عند شارع Bayswater على بُعد محطتين مترو من oxford street، جنبه محطتين مترو Bayswater و Queens Park وفي وشه الهايد بارك وجنبه محطة اوتوبيس وجنبه شارع كله مطاعم شاورما و Fish & Chips

لندن Regent Park

المرتين اللي روحتهم كانت ساقعة جداً وفي وقت الكريسماس بس انا بالنسبالي موضوع الجو مش بيفرق بس لو حد مش بيحب الساقعة هينبسط اكتر في الصيف. هناك ال Shopping حلو جداً وفي كل الماركات والشوارع والفاترينات بتبقى كلها ديكورات الكريسماس وشكلها مفرح، التمشية لوحدها هناك ممتعة.

المواصلات

اهم واول حاجة تتعمل انك تشتري كارت ال Oyster بتاع المواصلات وتملاه على حسب ال Zones اللي هتروحها وعلى حسب الايام اللي هتقعدها. انا كنت قاعدة إسبوع كانوا بحوالي ٣٥ سترليني مثلاً علي ما اتذكر.

تعمل ايه هناك:

London Eye

اول حاجة زرتها كان من المترو نزلت محطة Westminster ومنها بتلاقي الBigben وLondon eye و Aquarium، ال Aquarium حلو جداً للي غاوي اسماك وكده، وLondon eye رائعة والمنظر فيها جميل بس الطابور بيكون زحمة شوية لكن تستاهل للي برضه غاوي يشوف البلد من فوق.

بيج بن

Madame Tussaud

تاني حاجة Madame Tussaud وده المتحف الشهير اللي بالشمع وفيه كل المشاهير بالشمع تقدر تتصور معاهم وممتع جداً مع الاصحاب، وقبل الخروج عاملين فيلم كده 3D حلو جداً وممتع. المتحف ده بيتراح بالاوتوبيس من شارع اسمه Baker street وسهل توصله.

Piccadilly Square

ده ميدان هناك ممكن تتصور فيه وبيبقى ساعات فيه عازفين او حد بيغني وعروض شارع، وانا بتمشى بالليل شفت متحف اسمه Ripley Believe it or not بس مش فاكرة مكانه، و قلت لما اجرب اشوف ده ايه وكان فيه الحاجات الغريبة سواء مواهب او ناس زمان كان عندهم قدرات مش طبيعية بس عارضينه بطريقة لذيذة، وعاملين في الاخر لعبة كده زي متاهة مرايات كبيرة تحاول تخرج منها.

مسرحية في لندن

لندن مشهورة بالأنشطة الثقافية والعروض المختلفة. روحت المسرح حضرت مسرحية Le Miserable وكانت خرافية! و ناس اعرفهم حضروا Mama Mia برضة انبسطوا جداً.

هايد بارك

خامس حاجة تعملها هي التمشية في هايد بارك. تقدروا تاخدوا عجل او تشربوا حاجة على البحيرة وتتصوروا مع البجع والطيور في المياه وبيبقى ساعات فيه تلج.

لندن هايد بارك

Queen Mary

سادساً، في بارك اسمه Regent park جواه جنينة اسمها Queen Mary ودي مفروض كلها ورود والوان وصورها كده علي الإنترنت بس للاسف انا لما رحت كان خريف وشتاء فملقتش اي حاجة ممكن تتشاف بس عامة التمشية في البارك لوحدها كانت ممتعة بالنسبالي.

London Zoo

ودي بقى كانت محبطة شوية لإن اليوم ده كان ساقعة جداً  والتذكرة ب ٢٣ ستيرليني. ساعتها مفيش حيوانات كتير كانوا موجودين، كلهم نايمين جوه من الساقعة ويمكن الحلو في الجنينة هو المكان نفسه والنظام بس ماكنش في اي حاجة تستاهل الفلوس اللي دفعتها.

الShopping

في Outlet روحته في مكان بعيد ركبتله الاوتوبيس من عند Madame Tussaud حوالي ساعة وربع هو في مكان اسمه Wembley بس هو مش كبير، كان فيه Nike, marks & spencer ,Gap, H&M, Next بس باقي ال Outlets المشهوره اللي بره المدينه ملحقتهاش.

عرض Changing the Guard

في كمان حاجة اساسية، في الوقت اللي كنت موجودة فيه كانت كل يوم أحد، لكن في شهور مختلفة في السنة الوقت بيختلف، وهي تغيير الحرس في القصر الملكي وده Show اساسي في لندن والناس بتروح تتفرج عليه وانا شوفته مرة وكان لطيف بس الوقوف فيه كتير خصوصاً لو ساقعة بيكون صعب.

تغيير الحرس في لندن

لندن عامةً كبلد جميلة أوي ومنظمة. كل خطوط المواصلات بتوصلك لاي مكان والاوتوبيسات هناك مريحة جداً ومكتوب على كل إتوبيس بيروح فين ورقمه فصعب جداً حد يتوه. لو بتدور على مكان حلو تروحه يبقى لازم تجرب لندن.

لو عندك أي اسئلة سيبها في الكومنتس

هالة عبدو
هالة عبدو
مقولة هالة المفضل هي: "I travel not to escape life, but for life not to escape me" ورغم انجزء من شغلها هو السفر إلا انه السفر هوايتها في نفس الوقت. هالة بتساعد المسافرين في تنظيم رحلات وخصوصاً رحلات شهر العسل.