٥ اسئلة ممكن تتسئلها من ظابط الجوازات في اوروبا

جوازات في اوروباالمصدر: ksyu.files.wordpress
September 24, 2016

فرحة الحصول على فيزا بلد فرحة ما تتوصفش. بالذات لما تكون فيزا شينجن بتسمحلك تدخل ٢٦ بلد في اوروبا. لكن لازم تعرف ان بعد حصولك على الفيزا لسة عندك خطوات بسيطة تعملها عشان من حق ظابط الجوازات يمنعك من الدخول حتى لو معاك فيزا.

هتحتاج تظبت كام حاجة بسيطة قبل ما تقف في شباك الجوازات وتاخد ختم الدخول وتتسئل كام سؤال من ظابط الجوازات عن رحلتك. أوراق بسيطة وحجوزات بتأكد لظابط الجوازات اللي بيدخلك اوروبا إنك ناوي ترجع مصر تاني خصوصاً أنهم بيبقوا خايفين من العرب من الهجرة الغير شرعية.

قبل ما تطلع الطيارة، حضر الإجابات اللي هترد بيها على الأسئلة ديه:

معاك حجز الفندق/هوستيل؟

ظابط الجوازات بيبقى مهم بالنسباله يعرف انك عارف هاتقعد فين وأحياناً بيطلب منك أنه يشوف حجز مكان الإقامة اللي هاتقعد فيه. لو مش هاتقعد في فندق أو هوستيل أو هتأجر أي حاجة وهتقعد عند صاحبك أو حد تعرفه أو حتى حد من على Couchsurfing، يبقى لازم يكون معاك عنوانه بالتفصيل.

سبب الزيارة؟

اجابة واحدة من الإتنين، Work أو Holiday. يإما تقوله إنك طالع رحلة عمل لو أنت فعلاً مسافر عشان شغل يا إما هتقوله إنك مسافر تتفسح في أجازتك زي أي سائح.

معاك فلوس تصرف على الرحلة؟

على قد ما هو سؤال رخم بس إحنا إتسئلناه قبل كدة في جوازات المانيا في مطار ميونيخ. السؤال كان بنفس الصيغة بالظبط وبعد ماجاوبنا بالإيجاب اتسئلنا اذا كانت الفلوس اللي معانا كاش ولا فيزا. بعدها قلناله أن الفلوس المخصصة للرحلة كاش، فطلب يشوف الفلوس! الظابط اخد الفلوس وعدها ورقة ورقة بعد كدة رجعهم وختم لنا دخول.

هتوصل مكان إقامتك ازاي؟

مش كل الظباط بيسئلوا السؤال ده عامة، وحتى لو معرفتوش مش هتبقى مشكلة، وممكن الظابط يوصفلك تركب أيه عشان توصل. في كل الحالات خليك جاهز واعرف على الأقل المواصلات اللي محتاج تركبها من المطار لأقرب مكان لمكان إقامتك. لو عايز تعرف ازاي تجيب المواصلات اللي تركبها في أي بلد، شوف المقالة ديه.

هتروح فين بعد كدة؟

ماتكذبش. بغض النظر عن أنه مستحيل الظابط يقدر يعرف أنت عايز تروح فين في اوروبا بعد أول بلد وصلتها، بما ان التنقل جوا اوروبا أسهل ما يكون، بس مفيش أي داعي أنك تضحك عليه وتقوله إنك مش هتروح حتة وهتفضل في نفس البلد عشان تطمنه إنك مش هتهرب. قوله عادي خططك للسفر بالتفصيل.

باسبور مصري

مفيش حاجة بتشترط إنك تتسئل الأسئلة ديه، لأن ده في الآخر بيعتمد على وجهة نظر ظابط الجوازات. ممكن يسئلك أكتر وممكن مايسئلكش خالص. كل اللي عليك تعمله إنك تبقى مبتسم ومتضايقش من أي سؤال بيسئلهولك وتكون محضر كل الأوراق اللي ليها علاقة برحلتك، بعدها هتاخد ختم الدخول وتبدأ تستمتع بأجازتك.

لو إستفدت من المقالة ديه، شوف كل مقالتنا عن اوروبا هنا.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.