سعد الدين مصطفى: تجربة تأجير عربية في امريكا وازاي تطلع رخصة دولية

تأجير عربية في امريكا
November 30, 2016

لما حد بيبقى خلاص هيسافر بلد معينة، أول حاجة بيبتدي يعملها هي انه يخطط الحاجات اللي هيعملها في البلد ديه.انا هتكلم عن حاجة ممكن يكون مفيش حد بيفكر فيها اوي وهي السواقة .اه زي ما قريت كده بالظبط السواقة وأنت مسافر، اللي هي حاجة من الحاجات اللي بتضغط علي الواحد في مصر وممكن تكون اصلا سبب انه مضغوط ومسافر يغير جو بسببها.

انا عن نفسي واحد بيعشق السواقة، خصوصا بليل والدنيا فاضيه بس لما كنت بسوق برة اكتشفت اني عمري ما سُقت قبل كده. معرفش عن اوروبا اوي بس المقالة ديه هتكون عن امريكا، اللي قعدت فيها لمدة ثلاث شهور. والعربية في ولايات كتير تعتبر أساسية هناك. في ولاية كبيرة زي لوس انجلوس مثلا، صعب انك تروح مناطق كتير فيها من غير عربية . المكان اللي كنت قاعد فيه كان بعيد عن وسط البلد بحوالي ٤٠ ميل تقريبا يعني ساعتين بالباص.

تكلفة التأجير في امريكا

مبدئيا الايجار في امريكا يعتبر مش غالي اوي، خصوصا لو مسافر مع صحابك وكل واحد هيدفع جزء وفي المقابل هتاخد عربية نضيفة ومحترمة جدا مقارنة بمصر. ممكن تأجر من مكان اسمه Hertz أو Avis ودول مشهورين أوي. طبعا السعر على حسب العربية بس لو حاجة معقولة هتقف عليك ب200 دولار في الاسبوع بس لازم يكون سنك ٢١ سنة.

في حاجات تانية بتبقى تحت بير السلم لو أنت تحت ال٢١ بس بتبقى أغلى عشان مش قانوني. الجزء الاحلى والاجمل في التجربة ديه هي السواقة نفسها. بتبقى سايق في شوارع فاضية وواسعة، غالبا بيكون في مناظر طبيعية حواليك في طرق السفر. مفيش حاجة اسمها مطبات وحفر ونقر وحد بيكسر عليك ولا تشتم حد بالكلاكس والكلام الفاضي ده.

كنت هعيط من كتر الفرحة لما شفت يافطة مكتوب عليها ان الطريق هيكون مقفول في يوم معين كمان شهرين. طبعا دي ممكن تبقي حاجة عادية لناس عايشة بره او سافرت كتير بس بالنسبة لواحد زيي ساق حوالي ١٠٠ الف كيلو كانت حاجة لازم اجربها.

تأجير عربية في امريكا

أجر عربية عشان تعمل Road Trip

اهم حاجة في فكرة انك تأجر عربية  برة مصر هي انك تعمل Road Trip وتسافر بالعربية لمدينة تانية أو حتى بلد تانية لو ده متاح. عدي على مدينة بالعربية وقضي فيها اليوم وكمل بعد كدة على اللي بعدها عشان تشوف أكبر قدر من المدن في البلد اللي أنت فيها. التجربة ديه لواحدها هتحسسك انك عملت انجاز رهيب.

طبعا زي أي حاجة، الموضوع لازم يكون ليه عيوب .اول حاجة البنزين بيبقي مكلف جدا تقريبا الليتر بدولار في امريكا و تاني حاجة ان لازم يكون معاك رخصة دولية بس دي خطواتها سهلة جدا لكن في ناس مش عارفاها او مش بتهتم تطلعها و بتقول اكيد انا مش مسافر علشان اسوق.

ازاى تطلع رخصة دولية

علشان تطلع رخصة دولية هتروح نادي السيارات وعنوانه ١٠ شارع قصر النيل. لو رايح مواصلات هتنزل التحرير وهما بالظبط خمس دقائق مشي ولو عربية هتركن في  جراج التحرير وتتمشى برضه. الورق اللي هتحتاجه ٢ صورة شخصية و أصل رخصة السواقة وتبقى سارية على الاقل لمدة سنة وشهادة مخالفات دي بتطلعها من هناك وانت واقف و ٢٦٠ جنيه.

الموضوع كله مش هياخد اكتر من ساعتين بس لازم طبعا تكون موجود بنفسك مينفعش حد يطلعهالك. مش لازم على فكرة يكون معاك فلوس كتير جدا علشان تسافر ولا لازم تقعد في مكان غالي ،سافر علشان تتبسط وعلشان كل حاجة بسيطة و ممكن تكون مزعجة هنا ليها طعم مختلف تماما برة حتى السواقة.

شوف في المقالة ديه اجرائات استخراج فيزا امريكا.

سعد الدين مصطفى
سعد الدين مصطفى
مهندس مدني مهتم بالكورة، العلم والسفر. سعد بيحب ان السفر يعيشه تجارب جديدة ويخليه يعمل حاجات مختلفة لأول مرة.