محمد كامل: أخذت فيزا الشينجن؟ اعمل الخطوات ديه قبل ما تسافر

مصري في السويدمحمد كامل في السويد
December 11, 2016

احبابي الاعزاء، اتكلمنا قبل كده عن مرحلة الحصول على تأشيرة شينجن بالتفصيل ومتطلباتها كلها. المرة ديه هنتكلم عن مرحلة ما بعد الحصول على .تأشيرة الشنغن

لا تقل هذه المرحلة أهمية ابدا عن مرحلة الحصول على التأشيرة. ولازم تعرف ان تأشيرة شينجن في الباسبور هي ثروة حقيقية لصاحب الباسبور وممكن تساعد في الحصول على تأشيرات بلدان تانية. فوجود تأشيرة شينجن على الباسبور (واستعمالها استعمال صحيح، مهم جدا استعمال التأشيرة استعمال صحيح والا ستكون نقمه في الجواز وليست نعمة وهنتكلم أكتر عن كيفية الاستعمال الصحيح للفيزا) يعطي لصاحبه مكانة وبرستيج هام جدا .خاصة في اي قنصلية

أول ما تستلم الباسبور

– تبدأ هذه المرحلة من استلام جواز السفر وبه التأشيرة. أول خطوة هي التأكد من صحة البيانات المكتوبة على استيكر الفيزا ( يجب التأكد ان اسمك مكتوب بطريقة مطابقة لأسمك في الباسبور – والتأكد من ان رقم الباسبور مكتوب بطريقة صحيحة – والتأكد من نوع الفيزا عن طريق الحرف المكتوب امام خانة نوع الفيزا وهو حرف (Cانا اتحدث عن التأشيرة بغرض السياحة )

فيزا شينجن

ثم معرفة تاريخ صلاحية التأشيرة وتاريخ انتهاء استعمالها واخيرا عدد ايام الاقامة في منطقة الشنجن) لازم تتأكد شخصياً من هذه البيانات عند استلام الفيزا .

إبدأ جهز سفريتك

– تأتي الخطوة الثانية، وهي التجهيز الفعلي للسفر (انسى تماما حجز الفندق المبدئي وحجز الطيران وتواريخ السفر اللي قدمتها للحصول على الفيزا ) – ابدأ خطط لرحلتك من جديد على ضوء بداية تاريخ استخدام الفيزا فمثلا لو كان تاريخ صلاحية الفيزا يبدأ يوم واحد ابريل وحتى ٢٠ ابريل فلازم يكون سفرك ودخولك منطقة الشنجن يبدأ يوم واحد ابريل ويفضل لو كان اتنين ابريل يكون افضل ويجب الا يتعدى تاريخ دخولك منطقة الشنجن عن يوم ٢٠ ابريل ويفضل يكون ١٩ ابريل عشان تكون في امان .

إستخدم الفيزا صح

لااااااااازم تاخد بالك جدا من مدة الاقامة داخل الشنجن (اوعى تكسر الفيزا او تقعد اكتر من المدة المسموح لك فيها ولو حتى يوم واحد والا ستكون ضمن القائمة السوداء طول حياتك في قنصليات الاتحاد الاوروبي وامريكا ومعظم قنصليات العالم) وخلي بالك لو كان مكتوب لك مدة الاقامة (٧) فده معناه سبع ايام وليس سبع ليالي (يعني لو دخلت الشنغن يوم سبعة ابريل لازم تخرج يوم ١٣ ابريل مش ١٤ ابريل ) سبع ايام وليس سبع ليالي (دي نقطة مهمه جداً ) .

ادخل البلد اللي أخدت فيزتها الأول وإبعد عن الترانزيت

من اهم النقاط في استعمال الفيزا استعمال صحيح هو انك لاااابد انك تدخل البلد اللي منحتك التأشيرة أولا وليس عن طريق الترانزيت – ركز معايا – أو تقيم بها اكبر مدة، يعني لو أخدت الفيزا من قنصلية فرنسا لازم تدخل فرنسا أولا وبطريقة مباشرة مش ترانزيت في بلد اوروبي تاني حتى لو كانت عضوة في الشنجن، يعني مينفعش انك تحجز لفرنسا على الطيران النمساوي وتنزل ترانزيت فيينا ولو ساعة وبعد كده تدخل فرنسا. انت بكده بتكون استعملت الفيزا غلط وده بيعرضك للرفض بعد كده لو طلبت الفيزا من اي قنصلية للاتحاد الاوربي.

ختم شينجن على الباسبور

لو انت حصلت على الفيزا من قنصلية فرنسا وناوي تزور المانيا وبلجيكا مثلاً، لازم تدخل فرنسا الاول زي ما قولنا أوتقيم فيها اطول مدة يعني مثلا .ثلات ليالي في فرنسا وليلة في المانيا وليلتين في بلجيكا

مش مهم كما يشاع انك تدخل وتخرج من نفس البلد الحاصل من خلالها على الفيزا. يعني لو حصلت على الفيزا من القنصلية الفرنسية بيكون شرط انك تدخل فرنسا اولاً أو تقعد فيها أكتر لكن مش شرط انك تغادر الشنجن من فرنسا يعني ممكن جدا تغادر من المانيا أو أي بلد عضو في الاتحاد الاوربي.

 إحجز الطيران والإقامة وخلي معاك ورق الحجز وأنت مسافر

على ضوء الملاحظات السابقة الهامة جدا، تبدأ تحجز تذكرة سفرك سواء من خلال الإنترنت او من خلال شركة سياحة موثوق بها، بحيث تحدد تاريخ سفرك حسب صلاحية الفيزا من حيث الدخول والخروج ثم من حيث مدة الاقامة المسموح لك بها ثم من الدولة اللي لازم تدخلها اولا والبلد اللي هتغادر منها.

 بعد كده تيجي مرحلة حجز الفنادق. وعلى العموم مستوى الفندق بيرجع لحضرتك سواء خمس نجوم أو اربعة او انك تحجز هوستيل ومش فارقة معاك مستوى الاقامة او الخدمة.

لازم وانت مسافر يكون معاك نسخة من حجوزات الفندق المؤكدة لانهم ممكن جدا يسألوا عنها في المطار ولو كانت غير مؤكدة ممكن جدا كل تعبك أللي فات يروح على الفاضي ويمنعوا دخولك البلد ويرجعوك بلدك تاني لانهم هيشكوا انك ناوي تقيم في الاتحاد الأوروبي للعمل بطريقة غير قانونية.

– في السفر دائما فلوسك وباسبورك هم اعز اصدقاءك. احرص ان يكون معاك على الاقل ألف دولار كاش في جيبك ونسخة من الباسبور ونسخة من الفيزا ونسخة احتياطي من التأمين الدولي.

نصائح مهمة أثناء السفر

– شنطة الرحلات مهمة جداً وهي الشنطة اللي هتشيلها دائماً على ضهرك وانت بتتجول في البلد ولازم يكون فيها (نسخة احتياطية من الباسبور وصورة من الفيزا – مخدة فايبر صغيرة – زجاجه مياه – خريطة للبلد والمدينة اللي بتزورها – باور بنك لشحن الموبايل واللاب توب ويكون دائماً مشحون – قلم واجنده صغيرة – كتيب لمفردات لغة البلد اللي بتزورها ) .

احرص دائماً انك تحتفظ في جيبك بكارت الفندق اللي انت مقيم فيه عشان اكييييد هتتوه وهتضطر تاخد تاكسي يرجعك لمكان اقامتك  ..

محمد الجزار
من مواليد دولة الكويت سنه 1974 وعاش هناك مع اهله عشرين سنة قبل ان يجبره الغزو العراقي للكويت سنة 1990 للعودة الى مصر والاستقرار فيها.