لعشاق الأكل: ٧ مهرجانات للأكل في أوروبا لازم تحضرهم

مهرجان أكل في أوروباالصورة: Pastemagazine.com
December 14, 2016

شوف العالم بطريقة مختلفة أو بمعنى أصح بطعم مختلف. فيه مهرجانات أوروبية لكل حاجة تقريباً بس دلوقتي هنتكلم عن مهرجانات الأكل المشهورة ألي ناس كتير بتسافرلها كل سنة زي ما بيسافروا لماتشات الكورة و Tomorrow Land. فلو بطنك دائماً بتاخدك لأماكن غريبة جوا مصر لمجرد انك سمعت عن مطعم جديد أو عربية سجق وكبدة فتحت في شارع جانبي، جه الوقت أن بطنك تاخدك لبلد تانية.

مهرجان ستراجوستو، إيطاليا

ده مهرجان أكل الشارع لدول البحر المتوسط، يعني هتلاقي أكل شارع من مختلف دول العالم زي اليونان والمغرب وصربيا في مكان واحد. بالإضافة طبعاً للأكل الإيطالي والبيتزا الصقلية التقليدية. المهرجان بيبقى في مدينة تراباني وبيدأ يوم ٢٣ يوليو ليوم ٢٦ يوليو كل سنة وكل التفاصيل الصغيرة هتلاقيها على موقعهم.

مهرجان الأكل في إيطاليا

مهرجان المحار الدولي في ايرلندا

في آخر ويك إند كل سبتمبر، عشاق السي فوود بيتجمعوا في مدينة جالواي عشان يحضروا تاني أهم مهرجان في ايرلندا كلها بعد St. Patrick’s Day. محار في كل حتة وسمك وجمبري ومسابقات لأكل المحار وكل ما له علاقة بالسي فوود مع موسيقى جاز في الخلفية. ادخل على الموقع بتاع المهرجان لو عايز تعرف أكتر.

مهرجان الأكل في ايرلندا

مهرجان جاسترو، أسبانيا

مهرجان الأكل ده بيهتم بال Gastronomy، يعني فن تحسين الأكل. وبرنامج المهرجان ألي مدته بتبقى إسبوعين مليان أنشطة مختلفة ليها علاقة بالأكل من خلال الأفلام والألعاب والفن وطرق مختلفة بتخليه مهرجان ثقافي مهتم بالأكل. روح مدريد في أي يوم من ٣٠ يناير ل١٥ فبراير، بس اعرف التفاصيل كلها الأول من هنا.

مهرجان الأكل في أسبانيا

مهرجان الشوكلاتة الدولي، سويسرا

سيب برطمان النوتيلا دلوقتي وركز في الكلام ألي هيتقال. يوم ١٠ و ١١ اكتوبر كل سنة، كل صناع ومحبين الشيكولاتة بيتجمعوا في جينيف عشان يجربوا كل أنواع الشوكلاتة ويتكلموا عن الشوكلاتة ويعملوا كل حاجة ليها علاقة بالشوكولاتة. مفيش الصراحة مكان يتعمل فيه مهرجان زي ده أحسن من بلد الشوكلاتة نفسها، سويسرا. ادخل على موقع المهرجان لو عايز تعرف ازاي تحجز تذكرة وبكام.

مهرجان الشوكلاتة في سويسرا

مهرجان La Gastronomie، فرنسا

المطبخ الفرنساوي مشهور بكونه فن أكتر منه طبخ، وده من الحاجات ألي بتميز الأكل في فرنسا. مهرجان La Gastronomie بيهتم برضوا بفن تحسين الأكل وبيجمع طباخين من كل فرنسا يتكلموا عن وصفات أكل وطرق تحضيرهم وأنشطة تانية مختلفة كلها بتتعلق بحاجة واحدة بس، الأكل. المهرجان بيكون في أكتر من مدينة في فرنسا، تقدر تعرف الأماكن ألي المهرجان هيتعمل فيها من خلال الموقع
الرسمي.

مهرجان الأكل في فرنسا

مهرجان Taste of Roma، إيطاليا

أحسن الطباخين الإيطاليين بيجوا المهرجان ده ألي بيستمر لمدة ثلاثة أيام من ١٧-٢٠ سبتمبر كل سنة. المهرجان ده بيركز على الأكل تركيز أساسي لكن مليان أنشطة بتضمن إنك ما تزهقش وبتضمن كمان انك ماتبقاش قاعد بتاكل وبس لكن بتشوف عروض بتتعمل بالأكل ومسابقات وموسيقى. شوف الفيديو ده وأنت هتفهم بنتكلم على أيه وتابع موقع المهرجان.


مهرجان The NeighbourFood Market، هولندا

فكرة مهرجان الأكل ده هو إنه يجمع كل الناس ألي بتطبخ في هولندا في العاصمة أمستردام عشان يعرضوا الأكل ألي بيعملوه. كل أنواع الأكل بتبقى هناك سواء حلو، حادق، لحمة، جبنة، فراخ، سمك، ساندوتشات ألخ ألخ. الفكرة مش بس في انك تروح تاكل لكن عشان كمان تبقى فرصة للناس يتعرفوا على بعض ويتكلموا في أنواع الأكل المختلفة. المهرجان بيتعمل في أوقات كتير تقدر تعرفها من على موقعهم الرسمي.

مهرجان الأكل في هولندا

جوعناك؟ قولنا على أكلات نفسك تجربها في بلادها الأصلية.

مصادر الصور: Foodfestivalseurope.com, huarenzhi.com,  Presspage.com, Laopinion.com, Information.fr, yourlittleblackbook.me, lineadiretta24.it

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.