الان كارل، الراجل اللي لف العالم بالموتوسيكل بتاعه

حول العالم بالموتوسيكلالصورة: Forbes
December 18, 2016

في سنة ٢٠٠٣، جواز الان كارل اللي دام لسنين طويلة انتهى بالطلاق. بعدها قرر كارل أنه يستقيل من شركة الماركتينج اللي هو أسسها ويعمل أكتر حاجة بيحبها ونفسه يعملها من زمان وهي السفر. ولمدة ثلاث سنين بعد القرار ده، كارل زار ٣٥ دولة من على الموتوسيكل بتاعه اللي ساقه من بيته في كاليفورنيا لمعظم بلاد أمريكا الشمالية وأمريكا الجنوبية ووصل لأفريقيا وأسيا.

كارل غير عجلة موتوسيكله ٢٢ مرة وعدى صعوبات كتير واضطر يرجع بيته بسبب حادثة عملها لكن في الآخر قدر يكمل ويكتب كتاب عن رحلته.

حلم السفر حول العالم

عشان تقرر تعمل حاجة زي اللي عملها كارل، محتاج يكون عندك دافع رهيب يخليك تبدأ وتكمل ومتستسلمش في النص. دافع كارل كان حبه الشديد للسفر وحلمه من زمان أنه يلف العالم بالإضافة لاهتمامه بالتصوير والكتابة والموتوسيكلات، فقرر أنه يجمع كل اهتماماته في حاجة واحدة ويسافر. الفكرة مش بالسهولة طبعاً اللي أي حد متخيلها لكنه استغل الظروف اللي اتحط فيها بطلاقه من مراته وفقدانه لاهتمامه بشركته وشاف المشاكل ديه كفرص تساعده يحقق حلمه.

حول العالم بالموتوسيكل

الصورة: Gessato

سنتين كاملين من التخطيط قبل ما يبدأ رحلته. الخطة في الأول كانت أنه يسوق الموتوسيكل من بيته في أمريكا لبانما ومع الوقت خططه توسعت أكتر لغاية ما قرر انه يكمل أبعد وأبعد. “اتعلمت أن في رحلة زي ديه، أن عدم التخطيط بزيادة والعفوية وتغيّر الخطط هو أهم شىء. ده اللي بيخليك توصل لكل الإحتماليات،” كارل قال لموقع Rider Experience

حادثة في بوليفيا

من ضمن المشاكل الكبيرة اللي خلت كارل يوقف رحلته لفترة هي حادثة عملها في بوليفيا لما الموتسيكل بتاعه اتزحلق ووقع من عليه. الموتسيكل نفسه وقع كمان على كارل وكسرله رجله. فضل لوحده مدة طويلة مش عارف يتحرك وبعد كدة تم إنقاذه بصعوبة، واضطر يقعد في بوليفيا ثلاث أيام قبل ما ياخد ثلاث طيارات ويسافر لمدة ٢٠ ساعة عشان يقدر يوصل أمريكا ويتعالج.

رحلة الان كارل حول العالم

الصورة: موقع Allan Karl

ديه مش الحادثة الوحيدة لكن كانت أخطرهم. بعد ما خلص علاجه ورجع لبوليفيا عشان يكمل رحلته، عمل حادثة تانية على كوبري قابله في طريقه. وفي تنزانيا، اتوبيس خبطه وخلاه يقع، أما اثيوبيا، فلحق نفسه قبل ما يقع من على منحدر بسبب اتوبيس كبير قرر يلف من غير ما ياخد باله من الموتسيكل بتاعه. كل ده ما منعوش أنه يكمل طريقه أو خوفه وزار البلاد اللي نفسه يزورها.

كتاب السفر والصور والأكل

بعد وصوله لتركيا، حاول يدخل إيران لكن فيزته اترفضت ثلاث مرات. قرر بعدها ان ده احسن وقت ينهي رحلته ويرجع أمريكا. أول ما رجع بدأ في الشغل على كتابه FORKS (Three Years. Five Continents. One Motorcycle. A Quest For Culture, Cuisine, and Connection) وهو كتاب بيحتوي على قصص من الرحلة وصور ووصفات أكل من كل مكان في العالم. كارل إهتم أنه يوصل تجربته بالظبط للعالم من خلال انهم يشوفوا صور الأماكن اللي كان فيها ويقروا تفاصيل وقصص ويعرفوا الأكل اللي سكان العالم بياكلوه من خلال وصفات هو جمعها وصور للأكل نفسه.

حول العالم بالموتوسيكل

الصورة: موقع Allan Karl

“في كتابي بشارك الثقافات والإكتشافات والعلاقات اللي عملتها من خلال قصص، صور ووصفات أكل شوفتها في رحلتي حول العالم. FORKS بيحكي قصتي وبيوري القراء العالم من خلال كرم ناس معرفهاش، جمال الإنسانية وألوان الثقافات والقدرة على التواصل الإنساني.”

الفيديو ده فيه تفاصيل أكثر عن رحلته:

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.