حاجات تعملها عشان تحتفل بال Bastille Day ببلاش في باريس

عيد باريسالصورة: consulfrance-losangeles.org
December 18, 2016

العيد الوطني الفرنسي أو Bastille Day هو وأحد من أهم الأيام بالنسبة للفرنسيين. بيتم الإحتفال بالحدث ده يوم ١٤ يوليو من كل سنة إحيائاً لذكرى إقتحام سجن الباستيل في الثورة الفرنسية في ١٤ يوليو ١٧٨٩. أجازة رسمية في كل فرنسا والناس كلها بتنزل الشوارع تحتفل باليوم ده بألعاب نارية وحفلات وعروض وأنشطة كتير.

كل المعالم السياحية المشهورة زي برج إيفيل، متحف اللوفر، كنيسة نوتردام ألخ ألخ بيشاركوا في الحدث السنوي ده بطريقتهم. لو هتكون موجود في اليوم ده بالصدفة أو قاصد انك تروح مخصوص عشان تحتفل في فرنسا فمهم تبقى عارف تروح فين وأيه الحاجات ألي ماينفعش تفوتها عشان تعيش تجربة ال Bastille Day زي الفرنسيين.

اتفرج على العرض العسكري في Champs-Elysees

ديه تعتبر بداية اليوم والفرنسيين بيروحوا عند أشهر شارع في فرنسا من الصبح بدري عشان يلحقوا مكان كويس يقدروا يتفرجوا منه على العرض العسكري ألي بيعتبر من تقاليد اليوم ده. العرض بيبدأ قريب من Arc de Triomphe وبيكمل لغاية القصر الرئاسي بالإضافة لعرض طيران وعرض طيارات هليكوبتر بيتعمل في نفس المكان. هتحتاج تروح بدري عشان تلحق مكان كويس.

العرض العسكري في فرنسا في يوم الباستيل

متحف اللوفر ومتاحف تانية ببلاش

فرصة ذهبية انك تدخل المتاحف ألي نفسك تزورها في باريس من غير ما تدفع فلوس لأن متاحف كتير بتديرها الدولة بتكون فاتحة ببلاش لأي حد عايز يدخل ومن ضمن المتاحف ديه، متحف من أشهر المتاحف في العالم، اللوفر.

متحف اللوفر

حفلات المطافي

تقليد بيتعمل من الثلاثينات في باريس في اليوم ده وهو أن المطافي بتعمل حفلات صغيرة قدام مقراتهم وبيحتفلوا مع الناس بطريقتهم. الحفلات ديه بتبقى أحلي من ما أنت متخيل وبتبقى زحمة لأن ناس كتير جداً بيروحوها، كل ألي محتاجه انك تكون عارف مكان مطافي قريب أو تسئل حد في الشارع على Bal des Pompiers.

حفلة في يوم الباستيل

بيكنيك في جنينة Champs de Mars

ديه الجنينة ألي قدام برج أيفيل على طول. بتكون واجهة أساسية لكل الناس بعد العرض العسكري ما بيخلص وبيبدأوا بممارسة عادة التنزه أوالبكنيك. الزحمة هتبقي مش طبيعية لكن لو عايز تعيشة تجربة فرنسية كاملة في اليوم ده لازم تجيب ملاية صغيرة وأكلك وشربك وتقعد مع صحابك تستمتع بالجو حواليك. هناك بيكون فيه عروض غنائية على مسرح كبير موجود في اليوم ده بس.

الجنينة ألي قدام برج إيفيل

الألعاب النارية عند برج إيفيل

بعد ما تخلص أكلك وتستمتع بالموسيقى إوعى تفكر تمشي قبل ما تشوف عرض الصواريخ والألعاب النارية ألي بيتعمل عند برج إيفيل لأنه من أحلى العروض ألي ممكن تشوفها. العرض بيبدأ أول ما الشمس بتختفي خالص، وده ممكن يكون الساعة ١٠ أو ١١ مثلاً في فرنسا في الوقت ده. ماتسيبش العرض غير لما البرج يتلون بالعلم الفرنسي والناس تبتدي تمشي. لو مش هتستحمل الزحمة لف في الأماكن حواليك ألي ممكن تبقى شايف منها البرج، المهم ماتفوتش العرض.

برج إيفيل وألعاب نارية يوم Bastille

بما أن ناس كتير بتسافر في شهر يوليو وأغسطس، حاول تظبط سفرك أو زيارتك لباريس إنها تكون في اليوم ده عشان هتشوف باريس بشكل تاني مختلف. والأجمل في كل الأنشطة الي قولناها أن مفيش أي حاجة فيهم هتكلفك فلوس غير الأكل والشرب ألي هتكله في الجنينة وده كدة كدة كنت هتجيبه إنما أي حاجة تانية ببلاش ومفيش أي تذاكر هتشتريها.

لو تعرف حد عايز يروح فرنسا في الوقت ده إبعتله المقالة ديه.

مصادر الصور: telegraph.co.uk, thebuckeyetraveler.com, pompiersparis.fr,

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.