٧ نصائح تعرفها قبل ما تشوف برج ايفيل لأول مرة

برج ايفيل في فرنساالصورة: certainlyher.com
December 19, 2016

انك تروح باريس وماتشوفش برج ايفيل زي انك تكون في مصر وماتشوفش الأهرامات أو في إيطاليا وماتكلش بيتزا أو في برشلونة وما تشوفش الكامب نو. برج أيفيل مش الحاجة الوحيدة ألي تتشاف في باريس بالعكس في حاجات تانية كتير وممكن تكون ممتعة أكتر، بس ماينفعش تكون هناك وتفوت الفرصة ديه خصوصاً أن القاعدة عند برج أيفيل بالجناين حواليه والشوارع مش حاجة عادية.

مش انت لوحدك ألي بتفكر تروح هناك أول ما بتوصل باريس، المنطقة ألي حوالين البرج، Champ de Mars، مزدحمة بالسياح طول الوقت، عشان كدة لازم تعمل حسابك على كام حاجة هيخلوا تجربتك أفضل.

١- هات ملاية صغيرة أو حاجة تقعد عليها

فية جنينة قدام البرج على طول وفيه كذا جنينة تانية ممكن تقعد فيهم وتتفرج على البرج وانت بتاكل أو بتشرب حاجة، وديه حاجة هتلاقي نفسك بتعملها تلقائياً بعد ما تطلع البرج وتنزل. يُفضل تجيب معاك ملاية صغيرة تقدر تقعد عليها عشان لو الجنينة مبلولة من مطر مثلاً أو فيه حد سايب بواقي أكل وموسخ الدنيا.

ناس قاعدة على ملاية عند برج ايفيل

٢- أركب المترو وأنزل في محطة Trocadero

المترو أسهل وأحسن طريقة تروح بيها هناك. بلاش تنزل في محطة برج أيفيل نفسها ،محطة Bir-Hakeim، وأنزل في محطة Trocadero عشان لما تزل من المحطة ديه هتشوف البرج من view رائع وهتتمشى خمس دقائق عشان توصل عنده بدل ما تطلع على البرج على طول.

برج ايفيل من بعيد

٣روح مرة الصبح ومرة بليل

البرج الصبح مختلف عن بليل، بالذات لأن بليل البرج بينور والساعة عشرة بيعمل الشكل ألي في الفيديو. لو مش هاتعرف تروح غير مرة واحدة يبقى تروح قبل الغروب بحيث انك تلحقه في أحسن وقت.

٤- احجز تذكرة طلوع البرج من بدري لو ضامن المعاد

لو ماعندكش وقت تقف في الطابور الطويل بتاع تذاكر الطلوع يبقى تحجز من بدري من على موقع برج أيفيل الرسمي. لازم تاخذ بالك أن التذكرة ألي بتحجزها بتبقى بمعاد محدد لو فوتّ المعاد ده يبقى راحت عليك التذكرة.

تذكرة طلوع برج ايفيل

٥- اطلع السلالم لغاية الدور التاني

لو هتاخد السلالم، مش هتقف في الطابور الطويل بتاع الأسانسير وهتقدر تقف براحتك كل شوية تصور وتستمتع بالمنظر عكس الأسانسير ألي بيطلع على طول، وتقدر بعد كدة تاخد الأسانسير عشان تطلع آخر دور خالص. لكن لو صحتك على قدك تجنب انك تستخدم السلالم عشان فيه تقريباً فوق ال٦٠٠ سلمة مستنياك.

الدور الثاني من برج ايفيل

٦- خد بالك من النشالين

حتى اليُفط عند البرج بتحذرك من الموضوع ده. كأي منطقة سياحية فيها سياح كتير دائماً بيبقى فيه نشالين، فلازم تخلي بالك من حاجتك خصوصاً وانت في الطوابير وفي الأسانسير.

يافطة بتحذر من النشالين عند برج ايفيل

٧- هات أكلك وشربك معاك

برج أيفيل ممكن ياخد منك نص يوم لو قررت تقضي وقت كتير هناك. هتلاقي نفسك تعبت ومحتاج تاكل وتشرب ومفيش اختيارات كتير في المنطقة فلازم تبعد شوية عن البرج عشان تاكل في مطعم. ده غير أن معظم المحلات ألي قريبة بتبقى أغلى طبعاً. فحاول تاخد أكلك معاك وتقعد تستمتع بيه وانت بتتفرج على أشهر معالم باريس والعالم.

أكل وشرب عند برج ايفيل

روحت باريس قبل كدة؟ عندك أي نصيحة زيادة على دول؟ شاركنا رأيك في الكومنتس.

مصادر الصور: Jamiekevinpars.com, delcampe.net, frenchmoments.eu, corporatetravelsafety.com, chelseaandgeoff.com

عبدالرحمن عمرو
عبدالرحمن عمرو
مؤسس مشروع سفر. مابيسافرش غير لوحده عشان يعمل اللي هو عايزه في الوقت اللي يناسبه. أكتر حاجة عبدالرحمن بيحبها في السفر، الأكل وانه يتعرف على مُسافرين زيه ويتمشى في الشوارع بالساعات من غير ما يزهق.