عبدالرحمن: ازاي تقدم على فيزا شينجن من سفارة فرنسا خطوة بخطوة

فيزا فرنسا باسبور مصري
December 21, 2016

ناس كتير بعتتلي من خلال مشروع سفر عايزين طريقة التقديم على الشينجن من فرنسا خطوة بخطوة من البداية لغاية إستلام الباسبور. قررت أني أشرح هنا الخطوات ديه من خلال سفارة فرنسا، أللي قدمت فيها على شينجن مرتين وجاتلي الفيزا في المرتين الحمدالله وقدرت ازور باريس.

باختار فرنسا دائماً عشان أولاً فرنسا من أكتر الدول أللي بتقدم الشينجن للسياح، وفي ٢٠١٠ وافقوا على حوالي ٢.٢ مليون فيزا ،ثانياً لأن بداية سفريتك لأوروبا من بوابة باريس وأي مدينة فرنسية تانية هتكون بداية ممتعة جداً. فحط فرنسا في دماغك حتى لو مش عايز تروح هناك بس ممكن تعدي بس عليها لأن السفارة بتهتم بالسياحة والفيزا احتمال تكون أسهل.

حاول تروح في شهر سبعة وتحديداً يوم ١٤ يوليو عشان بيبقى في عيد إسمه Bastille Day وباريس كلها بتحتفل بيه. ممكن تعرف هنا ازاي أنت كمان تحتفل بيه لما تروح.

أحجز معاد في السفارة ازاي؟

لازم تعرف الأول أن لو مسافر سياحة، فتعاملاتك هتكون مع مركز TLScontact أللي بيستلم أوراقك وبيبعتها للسفارة، فمش هتتعامل مع السفارة مباشرةً. عشان تحجز معاد هتحتاج تسجل على موقعهم وتمشي خطوة بخطوة وتحجز المعاد أللي يناسبك.

ممكن تكلمهم لو مش عارف تحجز وهما هيرشدوك وهيقولولك تحجز ازاي. TLScontact مقره في المهندسين في ٨ شارع جزيرة العرب، نفس عمارة بنك HSBC.

امتى أقدر أقدم على معاد؟

تقدر تقدم على معاد تقدم فيه ورقك في أي وقت المهم أنه يكون على الأقل قبل معاد السفر بتاعك بثلاث شهور. السفارة بتنصحك انك تحجز معاد يكون قبل سفرك بعشرين يوم عمل على الأقل.

أيه الورق أللي محتاجه وأنا بقدم؟

أبليكيشن التقديم على الشينجن أللي بتاخده من على الموقع وأنت بتحجز المعاد ويكون عليه إمضتك وصورتين خلفية بيضاء مدبسين فيه. –

باسبور صالح وتقدر تدبس فيه أي باسبورات قديمة فيها فيزا قديمة عايزهم يعرفوا انك خدتها قبل كدة عشان تحسن موقفك – 

حجز مبدائي لفندق أو هوستيل – 

كشف حساب بنكي لآخر ٦ شهور –

حجز مبدئي لتذكرة طيران –

ورقة HR Letter من شغلك أو سجل ضريبي وتجاري لو أنت فاتح شركة خاصة أو شهادة قيد من الجامعة لو أنت لسة طالب –

تأمين صحي بيغطي الكام يوم أللي هتسافرهم –

التقديم على الفيزا بيكلف كام؟

هتدفع ما يساوي ٦٠ يورو بالمصري نقداً. واتأكد من السعر عن طريق أرقام خدمة العملاء قبل ما تروح عشان لو زودوا المبلغ فجأة.

أقول أيه في الإنترفيو؟

مفيش أصلاً إنترفيو. أنت مش بتقدم في السفارة وممثلين مركز TLScontact مش بيسئلوك غير أسئلة بسيطة زي مسافر اجازة ولا شغل أو هتقعد فين لما تسافر.

كل أللي هعمله أني اديهم الورق وبس؟

بعد ما تديهم الورق والفلوس هياخدوا بصمة إيدك وبصمة عينك وتدفع وتاخد إيصال الإستلام وخلاص.

هستنى قد أيه عشان أعرف النتيجة؟

في الغالب هتستنى حوالي ١٥ يوم عمل وممكن يبقوا أقل. في إحتمالية أن النتيجة تتأخر لو إحتاجوا منك معلومات زيادة بس.

هعرف إزاي إن باسبوري جاهز؟

هما هيتوصلوا معاك برسالة على الموبيل ويقولولك ان باسبورك رجع من السفارة أو شركة الشحن هتتواصل معاك لو كنت إتفقت معاهم يبعتولك الباسبور على البيت.

لازم أروح أخد الباسبور؟

لأ مش لازم، وانت هناك تقدر تطلب من شركة TNT أللي بتقدم خدمات النقل والتوصيل أنهم يجبولك الباسبور لغاية باب البيت.

ماتقلقش من يوم التقديم وروح قبل معادك بفترة وما تخافش. ولو هتروح بعربيتك خد بالك أن الركنة هناك صعبة وهتاخد منك وقت. التقديم كله مش هياخد منك أكتر من نص ساعة وبعدها هتستنى لحوالي إسبوعين على ما نتيجة التقديم تظهر. أهم حاجة في يوم التقديم كله هو إنك ماتتأخرش.

بعد ما تاخد الفيزا وتستعد للسفر، شوف المقالة ديه عشان تعرف ازاي تتحرك من مطار شارل ديجول في باريس والمواصلات أللي ممكن تركبها وأسعارها.

لو إستفدت من المقالة ديه اعملهّا شير مع صحابك أللي عايزهم يطلعوا معاك.

عبدالرحمن عمرو
عبدالرحمن عمرو
مؤسس مشروع سفر. مابيسافرش غير لوحده عشان يعمل اللي هو عايزه في الوقت اللي يناسبه. أكتر حاجة عبدالرحمن بيحبها في السفر، الأكل وانه يتعرف على مُسافرين زيه ويتمشى في الشوارع بالساعات من غير ما يزهق.