تاكل أيه لما تروح تايلاند

الصورة: Travelsecretsmag.comالصورة: Travelsecretsmag.com
December 28, 2016

قضيت في تايلاند عشر أيام كنت باكل فيهم ٢٤ ساعة. الحلو هناك إن أنواع الأكل مختلفة وفي نفس الوقت مش غالية. الأكل ألي هشرحه هناك أغلبه ان ماكنش معظمه في بانكوك. والمدينة ديه اتلكمت عنها في مقالة لواحدها عن كل الحاجات ألي ممكن تعملها هناك والإقامة والمواصلات. المهم ان الأكيد انك على طول هتلاقي أكل تاكله ومش غالي.

عربيات الأكل

الأكل أهم حاجة فيه كل لما بتمشي في الشارع تجرب. فيه ناس بيتعبوا من الأكل هناك لإنهم مش متعودين عليه أو عشان بيبقى مش نظيف، بس أنا ماحصليش أي حاجة الحمدالله رغم اني أكلت كل حاجة. أول نوع عربية أكل قابلته كان بيبيع عقارب وصراصير وذباب. بيبقى ليه طريقة بيقشرلك الزيادات ألي مش بتتاكل وبيديك الحتة ألي ممكن تاكلها. لغاية دلوقتي مش عارف طعمه كان حلو ولا وحش الصراحة بس أكلته. وهي حاجة تجربها حتى لو مقروف.

صرصار بيتاكل في تايلاند

تاني حاجة قابلتها كانت عربية شارع بتبع كل حاجة في الفرخة سواء بقى رجل الفرخة ،الكبد ،القلب، وبيحمرهالك قدامك ويدهالك في عصاية. العصاية الواحدة مثلاً بتنين جنيه ونص. ثالث نوع عربيات روحته كان عربيات الفاكهة. وديه حاجة تايلاندا مشهورة بيها. في أنواع فاكهة هناك عمري ما سمعت ولا هسمع عنها. أكتر فاكهة مشهورة العربيات بتعملها هي الأنانس والمانجا ولازم تجرب الإتنين. عربيات النودلز منتشرة برضه هي وعربيات الرز، شرق آسيا أصلاً مشهور بالرز وأنواعه. هناك الأكل فعلاً طعمه مميز وغريب في نفس الوقت. الأكل الصيني ألي بناكله هنا ده يعتبر ولا حاجة بالنسباله.

أما السي فوود فهو حاجة مقدسة. سمك وجمبري ولابستر ويعتبر نفس سعر مصر. وفيه أنواع أكتر من ألي أنت ممكن تتخيلها.

المطاعم

فيه بقى أكل المطاعم نفسه. معظم المطاعم بتعمل أوبن بوفيه، فيه كل الأكل ألي ممكن تتخيله بما فيه السوشي ولحمة وفراخ ورز. في أنوع من المطاعم بتعمل أوبن بوفيه تختار الأكل ني والراجل يشويهولك ومعاه الحلو والمشروب، كل ده بحوالي ستين جنيه. بس لازم تاخد بالك أن فيه محلات بتكتب برة أن لو ما كملتش الأكل ألي طلبته بتدفع فلوس زيادة أو ممكن نص الثمن أو ثمن معين حسب كل مطعم . في مطاعم كوريية بتقدم باستا وفيه مطاعم صيني برضه حاول تجربها لأنها أقرب حاجة ممكن تاكلها من الأكل الصيني. كل المطاعم ديه موجودة في معظم المولات.

مطاعم في نايلاند

من الآخر أي أكل هناك لازم تجربه بس إبعد عن مطاعم الفاست فوود زي ماكونالدز و Subway لإني جربتهم وما كانوش حلوين قوي وأقل حتى من ألي عندنا. والسوشي عامة مش رهيب لإن تايلاند مش بلد السوشي لكن هتلاقيه هناك.

عموماً لو عايز بلد رخيصة وأكلها طعمه حلو يبقى تطلع على تايلاند وهناك هتلاقى كل ألي أنت عايزه. غير كدة الإقمامة والمواصلات والمعيشة أسعارها زي مصر فمش هتحس انك محتاج تصرف كتير. أكتر فلوس هتصرفها هتكون في تذكرة الطيران، وممكن تحجزها بدري بسعر أرخص.

تم كتابة المقالة بالتعاون ما بين فريق عمل مشروع سفر وياسين أمير*

مصادر الصور: asiawebdirect.com, anachak.co.uk

ياسين أمير
ياسين أمير
مهندس بيحاول يسافر كل ما الظروف بتسمح. أستغل أجازات الجامعة عشان يروح اوروبا واسيا ولسة عنده خطط كثير للسفر.