إسلام أشرف ابراهيم: دليلك الكامل للسفر إلى تونس

ابواب مزخرفة تونس
December 29, 2016

تونس الخضرا، يعيشك برقا. طبعاً مافيش حاجة أسمها برقا، ده هجس يا بايب هي برشا، فخلونا نبتدي الله يباركلكم عشان فيه سفريات تانية جاية ألحق أكلمكم عنها. تونس ببساطة من أجمل البلاد اللي ممكن تروحوها، رخيصة وكمان شعبها نظيف أوي في نفسه حاجة ديليكاه كدة خالص (وأعمل صوابعك كدة كأنك بتفرفت حاجة وخليك أنف وأنت بتقول ديليكاه)

تونس كأنك في أوروبا بس بيتكلموا عربي، ثقافة السهر مقدسة عند الشعب التونسي ونفسهم عزيزة أوي، وكمان البنات حلوين أوي! فشخ! يخربيوتكم إيه ده فيه إيه؟! لو فاتتك سفرية لبنان اللي اتكلمت عنها في المقالة ديه يبقي عوضها هنا ولو حابب تقرأ عن سفرية لبنان عشان أنا واخدهالكم من أول البلد اللي مش عايزة فيزا، للعايزة فيزا، للي بتبهدل اللناس عشان الفيزا زي ماهنشوف كمان شوية.

سفر تونس

تونس الخضرا:

شمال وشرق تونس ممتد على طول البحر المتوسط حاجة كدة أوف ستروف وهنشرح مع بعض الأماكن اللي من الضروري أننا نروحها.

السفرية تقريباً كلفتني حوالي ٢٥٠٠ جنيه غير تذكرة الطيران وكانت ٢٢٠٠ جنيه يعني الليلة كلها شاكب راكب ٤٧٠٠ يعني قول ٥٠٠٠، هنا بقي تيجي زوفة الأسئلة والأصوات اللي بتصدر بشكل غير مبرر أهدوا بس شوية كل ده مقترن بالمكان اللي هتباتوا فيه وكمان طبعاً هتكلوا ايه، عشان بلاقي الناس داخلة تسبلي عملت ده إزاي؟ منا مش حاوي ولا بضرب الودع بس بأقتصد على قد ماقدر.

معالم تونس

الإقامة عن طريق CouchSurfing

على سبيل المثال، أنا في السفرية ديه مادفعتش جنيه في الإقامة. إزاي؟! فيه Application وموقع أسمه Couch Surfing، ده ببساطة تقدر من خلاله تتعرف على حد وتبات عنده كمان من غير مايكلفك لأن الـcommunity  ده أبو عشم شوية يعني جمعية ودايرة، هو أستضافكم المرة ده فيه ناس هستضيفه لما يسافر وأنت لو نافع معاك هتستضيف حد كدة يعني.

*اقرأ أيضاً: ازاي تستخدم CouchSurfing

يجي سؤال بيزنطي طاب أنا لو مش نافع معايا أستضيف حد وجه حد أستضفني هيحصل مشكلة، أولاً شرط من شروط الإقامة عند حد أن يكون المعاد مناسب ليه وكمان هو أتعرف عليك من الـProfile  اللي أنت عامله وبالتالي كل حاجة بتبقى واضحة من الأول إذا كان هينفع تستضيف أو لأ أو أنت أصلاً من اللي بيستضيفوا الناس أو لأ.

أتفضلوا السؤال اللي بعده المؤمنين تماماً بنظرية المؤامرة وأن وأنت نايم هيجي واحد يبقلشك وكدة، الحقيقي أن ده مش طبيعي أنه يحصل بس حصلت مع بنت من فرنسا في نيبال في حادثة غير اعتيادية بس اللي أطمنك بيه ان مش دايم إلا وجه الله ومش مهم هتموت إزاي ما انت كدة كدة هتكون مت. المهم ماتقرفناش عشان بقالك نص ساعة بتقرأ الكلام ده وماتكلمناش عن البلد في حاجة لسة.

سياحة تونس

فامتتعبنيش معاك وروح فندق بس المصاريف هتختلف عشان نبقي على نور من أولها، وبالمناسبة الـ Couch Surfing  طالع بشكل يبهر في تونس ومنتشر جداً ومهم أنك تطلب من الشخص اللي هيتضيفك أنه يجيب بس موافقة من البوليس الأجنبي وولاية الأمن عندهم أنك ١) هتكون متواجد في الفترة من X إلي X و٢) وأنه هيستضيفك الفترة ديه.

أنا و القنصل صديقي أحمد كويتي، أجرنا عربية من موقع أسمه Tunisia Car Hire وده ارخص بكتير من الشركات التانية ليه بقي لأن مالهمش مكتب جوا المطار وبالتالي لا يخضع للشروط اللي المكاتب اللي جوا المطار بتخضعلها وفي الحالة ده بيجيلك الراجل بالعربية يجيبك من جوا المطار وتتكل على الله. العربية كانت فئة الفيات بونتو والفترة كلها أجرناها ب800 جنيه مصري.

*طبعاً أنتم عارفين إزاي تتطلعوا الرخصة الدولي من نادي السيارات اللي في وسط البلد زي ما قلنا في مقال بتاع زوروا لبنان

الفيزا

كل ده إحنا لسه مابتدناش الرحلة، مش كفاية أسئلة بقي. حاضر أخر سؤال هاجوبهلكم ونبتدي الرحلة، هل تونس محتاجة فيزا؟ الإجابة إن شاء الله تونس!

تونس للأسف من أسخف الدول المانحة للفيزا السياحية وفي منتهى السخافة والموظفين الحقيقة في منتهى قلة الذوق وأحنا حقيقي بنتهان عشان نطلع الفيزا، بس ده ولا يهمنا احنا هنسافر ملناش فيه.

الورق المطلوب:

  1.  HR Letter أو شهادة قيد
  2.  حجز مبدئي للطيران والفندق من على Booking
  3.  تأمين عليك الفترة اللي هتكون فيها في تونس
  4. 4) Bank statement  مايقلش عن عشرين ألف مثلاً وطبعاً يكون على الحساب ستة شهور فاتت وفيها معاملات عشان الناس اللي بتشغل دماغها وتروح تلبس في الحيط.
  5.  تحصيل الرسوم منك حوالي ٢٥٠ جنيه مصري.
  6.  استمارة الفيزا نفسها بتاخدها من الشباك

*مدة استخراج الفيزا ١٥ يوم

*ما تحجزش الطيران أبداً إلا والفيزا في إيدك عشان عادي ممكن يرفضوك بحجة أن الرفض جاي من الأمن

*أي نسخة هتقدمها صوَرها صورتين، بمعني أنك تقدم الورق نسختين أصل وصورة وتحطهم فـFile لكل نسخة مقدمة

*التقديم الأحد والثلاثاء والخميس من 9 إلي 12 والإستلام في نفس الأيام من 3 لـ4 عصراً

*الـ250 جنيه رسوم استخراج الفيزا لاترد، فالله لا يقدر واترفضت أدعي يصرفوها على علاجهم.

* لو ليك حد جوا أعتبر اللي فوق ده كله هري وكل حاجة هتخلص على طول

* ممكن تخلي شركة سياحة تقدملك الورق بس وفي الحالة ده هيبقى سعر استخراج الفيزا ٤٠٠ مش ٢٥٠، بس هتشترى نفوخك من قلة القيمة اللي هتقابلها.

* لو تعرف حد في مجلس إدارة النادي الأهلي هيسلكك زي السلامو عليكوا هناك.

وبكدة أنتم جاهزين تسافروا إلى جمهورية تونس الخضراء، نبتدي الرحلة، شدوا الأحزمة وأعقدوا النية انكم مسافرين بإذن الله. يلا اخذكم في جولة على استحياء كدة في تونس.

تونس العاصمة:

بعد ما تأجر عربيتك أو تركب تاكسيك اللذيذ المطار قريب أوي من المدينة يعني تخرج منها تلاقي زي الدائري كدة، خريطك الجميلة وعيش وأنت في المطار هتلاقي الجماعة بتوع Orange هناك وهيدوك  SIM Card ببلاش وفيه نت وبتاع فهتروق على حالك.

مصريين في تونس

تونس مافيهاش حاجات كتير تتعمل، بس عامة المدينة القديمة والسهر ووسط البلد عندهم ده الأماكن اللي الواحد ممكن يلف فيها، عايز نفسك يبقي طويل طول ما أنت في تونس العاصمة بشكل خاص وتونس البلد بشكل عام، لأن الشرطة والدرك عندهم حاجة أسمها أرتكريا الأمن والتأمين، فتقف تتسئل أنت مين؟ وبتعمل إيه هنا؟ ووصلت إمتى؟ وهتمشي فين؟ وقاعد فين الفترة ده؟، وناوي تزور مدن إيه؟، وهتخرج من البلد أمتى؟، كل ده هتتسئلوا على الأقل 20 مرة فعادي خالص وكونك مصري هيسرع العملية.

الفترة الصباحية

يوم تروح فيه المتحف الوطني عندهم Bardo وده المتحف الشهير بعملية احتجاز الرهائن، هناك فيه أحسن ما أنجبت الحضارة الرومانية من تماثيل وأثريات من الحقبة ديه. حاجة تاخدك حسبة ٥٠٠ أو ٦٠٠ سنة كدة، المهم المتحف ده حقيقي من أعظم ما شفت، فبالتالي ماتبقاش متسربع عشان تخلصه، تأني كدة وانبسط وأنت بتتفرج وكليوباترا بقى وأنطونيوس والآلهة كل ده هنا حاجة تهبل الحقيقة. سعر تذكرة الدخول ١٥ دينار تونسي.

سافر تونس

تخلص وتطلع على المدينة القديمة بقى عشان تشتريلك شوية سوفنيرز *مهم* خلي بالك التوانسة أصيع مننا ومش عيب نعترف بده ماتحتكش بحد ولف الأول شوف الاسعار عشان لو أشتريت من حد هتمشي شوية جوا هتلاقي السعر أرخص وضروري طبعاً تشتروا الشاشية التونسية وديه الطاقية التقليدية لدى التوانسة وديه سعرها تقريباً ثمانية دينار تونسي أكتر من كدة ماتفرهدش تفاصل مع الراجل عشان هيبقي مقلبك وسيبك من نمر الجودة وبتاع في الأخر ده طاقية.

الليل بقي هنا بينقسم نوعين: ١) بيوت الدعارة ٢) الـNight Clubs

١) بيوت الدعارة هناك مرخصة من الدولة وتمام يعني والبنات هناك واخدة كارنيه هوية من الشرطة التونسية وليهم كشف طبي وتأمين وحاجة جميلة، وده إيماناً من الدولة التونسية أن ده هيحد من عملية التحرش بأنه يسهل الوصول لغرض إشباع غريزتك وبالتالي هتبقى سكنت الغريزة فتسيب بنات الناس في حالهم. تتفق أو تختلف مع الفكر ده بس أنا انبهرت بصراحة، أنا للأسف ماروحتش بس صحابي قاللولي لازم يبقي معاك تونسي هناك وتروح ومعاك على قد الفلوس بس، عشان غالباً هتتقلب فبنصحكوا ماتجربوش يعني، ماحبكتش خالص.

٢) NightClubs من أشهرهم هناك الـCarpediem  و Terminal 2B  و Les Jasmins Ardjan Club   دول حلوين أوي والـCommunity اللي بيروح هناك اللي هو ولاد الناس يعني فهتلاقوا الموضوع لطيف، وخليني أفكركم إن بنات تونس حلوين بس، فأكيد هتقع فغرام حد هناك، فبشياكة كدة لم الدور، يعني مش لازم خالص تقولها بحبك من أول ما تعرف اسمها أتقل لما تاخد نمرتها.

سيدي بوسعيد

خلصت تونس العاصمة نلف بقي شوية، وأنت في تونس العاصمة ضروري إن ماكنش لازم انك تزور سيدي بوسعيد، اللي صور فيها صابر الرباعي أغنيته (الله الله يا بابا). المكان هناك يهبل بألوانه الزرقاء، بس المكان شوية سياحي فامتشتروش حاجة من هناك، كل حاجة هتلاقوها في شارع الأحد والمدينة القديمة في تونس وفي المدينة القديمة في سوسة وفي الجيم، فماتستعجلوش تشتروا هداياكم.

تونس

المهم سيدي بو سعيد فيها قهوة مشهورة أوي -هتشوفوها كمان شوية- والـView منها يهبل حقيقي. لازم تشوفوه مرة بليل ومرة الصبح حاجة تاخد العقل لأن سيدي بو زي مايسميها التوانسة، باصة على البحر فا رد روحك هناك.

سيدي بوزيد تونس

من هناك نطلع علي سوسة أو الشمال بزرت

بنزرت Bizerte

بتقع بنزرت في الشمال، هنا بقي الموضوع مختلف شوية، لأن ببساطة، الطريق لبزرت، زي ما التوانسة بينطقوها، يهبل والطبيعة على يمينك وعلى شمالك ترد الروح الحقيقة. الأهم دلوقتي انك توصل كعب زبيب لأن هناك البحر بقى قصة تانية خالص ولا الشباب بقى بينوطوا من فوق الCliff  والمنظر أصلاً هناك ياخدك اللانهائية وما بعدها.

بحر تونس

سوسة:

التوانسة بينطقوا سوسة – سوس- وده لأنهم ما بينطقوش غالباً نهاية الحروف في كلامهم. المهم سوس بتقع في الطريق اللي متجه ناحية الجنوب، وهي بتقع على البحر، سوس ميزتها بتقع جنب كام مدينة تانية فيها كام مزار هنتعرف عليهم سوا، زي المنستير،الجيم ومهدية.

المدينة القديمة في سوس حاجة تاخد العقل والقيروان اللي هناك والأسواق عشان السوفنيرز تقدروا تشتروا اللي أنتم عايزينه بس هتلاقوا كل حاجة في الجيم وده ارخص الأماكن في تونس فأشتروا من الجيم وكسبوا أصحاب الحرف اليدوية هناك، الناس هناك تستاهل المساعدة.

جامع تونس

الليل في سوس خلاب والسهر كمان ممكن تروحوا pub أسمه Jobi، وده ستايل بتاعه شوية أيرلندي بس لطيف يعني وكمان المارينا في سوس حلوة تتمشي فيها وتشوف اللانشات والمراكب باهظة الثمن. حاجة تعقد.

الجم El-Djem

يا ربي على جمال الجيم، أنتم مش فاهمين يعني ايه مكان بالعبقرية ده في المعمار أولاً المكان هناك يبعد عن سوس حوالي ساعة، فيه رحلات بتطلع من هناك من تونس العاصمة، لكن أنا كان معايا العربية والقنصل الكويتي وأجدع من قبلت بنت سوس فاتيمة جويزيني هي اللي كانت معانا وأتعرفنا علي بعض على فكرة على  Couchsurfing هتقبلوها طول منا في سوس.

تونس ومصر

المهم بقى يقع المسرح الأمبيثيتر الروماني Amphitheatre  في الجيم وده مسرح أكبر من اللي موجود في روما، أقسم بالله أنا ماشفتش حاجة بالجمال ده، طراز ايه بقي وهندسة ايه وجمال ايه، حقيقي مدينة الجيم مظلومة والناس كلها لازم تعرف عنه، المهم هناك بقى الأسواق يا معلمي بتبيع السوفنيرز برخص التراب فحطها من ضمن الأماكن اللي تشتري منها السوفونيرز، تذكرة دخول الجيم بـ١٠ دينار تونسي.

فيزا تونس

بعد كدة بقي يجي المنستير، حيث يرقد الحبيب بورقيبة بس تتنطقبالـ(ج)، وده أول رئيس لتونس  زيه زي السادات عندنا، برضه سايبين ماكنة الحلاقة بتاعته ومتعلقاته الشخصية وكدة، المكان اللي مدفون فيه بورقيبة وسط مدافن كتير، ماتندهشوش من اللي هتشوفوه لأن هناك ده مكان الخروج للشباب الجميل اللي لسه ماشي في الخفاء ولم يعلن عن علاقته تبقى للنور، فده أنسب مكان للتسكع عندهم.

الحبيب بورقيبة

المنستير تبعد عن سوس نص ساعة بالضبط وهي على البحر. هناك برضه تقدر تزور مهدية وهناك بقي تاكل الأكلة الشعبية هناك وهي اللبلابي. في الحالة ده عندك اختيار من اختيارين، وهو أنك تكمل للجنوب وروح علي توزور وتشوف جمالها وتزور المكان اللي اتصور فيه The English Patient ، يا إما ترجع عشان تكمل رحلة الشمال.

أكل تونسي

طبعا المصريين كلهم هيبقو باصين يروحوا صفاقس عشان بس سمعوا عن نادي الصفاقسي التونسي لكن الحقيقة مافيش حاجة تتعمل هناك، بلح يا بابا. فبشياكة كدة، أحلقلها وأطلع على دجيربا وتوزور.

توزور

هناك بقي Universal Studios و الـLocation اللي اتصور فيه فيلم The English Patient ورحلات الصحراء وكدة وده في أقصي الجنوب ولذلك لزم التنويه أن هناك تقضي على الاقل ثلاث أيام، المهم كدة الجنوب خلص، أطلع بقي علي الشمال.

Tatouine

تشوف بقي هناك القيروان الطبي والفندق الإستشفائي حاجة كدة تعالجك من كونك بس مصري وترجع بني آدم تاني.

حمامات Hammamat

هتستظرف هطلعك برا، ده بقي زي الساحل عندنا كدة، حتى هناك برضه لازم يبقي عندك الوحدة السكنية بتاعتك (الشاليه). وكمان الكابريهات والـClubs حاجة جميلة خالص، البحر عامة في تونس أنا مش عارف ليه مختلف عن اللي عندنا في مصر، ماتفهم العيال هناك مابترطرش في المايه ولا إيه، بس البحر الحقيقة يهبل هناك.

سيدي بوسعيد

هنا بقي أسيبكم مع مختارة في الظريف كدة من التراث والفلكور التونسي هياخدك مطار قرطاج الدولي وأنت قاعد مفخد على الكنبة.

1- لاموني اللي غاروا مني، للسيد لطفي بوشناق: https://soundcloud.com/mostafa-saad-11/3ndgc28ijlcr

2- الله الله يا بابا وده كانت متصورة في سيدي بوسعيد لحبيبنا صابر الرباعي: https://soundcloud.com/yasmeen-alaa-1/drzdhovv3jga

3- حاجة بقي من التراث التونسي للعلّامْة الصادق ثريا: https://soundcloud.com/mostafa-saad-11/3ndgc28ijlcr

4- الزين الزين للفنان الرقيق كما يلقبه التوانسة هادي الجويني: https://soundcloud.com/you/likes

5- وختامها ضروري يبقي مسك يا مسافر وحدك لـغالية بن علي: https://soundcloud.com/amr-sabry/ghalia-benali-ya-msafer

جمال تونس

*نصيحة ماتشتروش من أول حد يقع عنيكم عليه لفوا في السوق الأول لأن الأسعار متباينة وسهل تتختنق هناك فهدي أعصابك وماتتكلمش كتير هناك عشان التوانسة مش سهلين وسهل يغلطوك، عايز تشتري من السوق القديم في تونس أمشي للآخر جوا واد هناك فاتح محل جده ومتوارثاه الأجيال وأسعارها أرخص من السوق من برا. عشان توصلوله هيكون أتخرب بيتكم فبشياكة أشتروا من عنده ووفروا!

وهنا بقي المفرادات والقاموس التونسي المصري عشان تبقوا عرفتوا فروقات اللغة.

مصري تونسي
كويس؟! باهي؟!
تمام؟ مريجل؟
بسرعة فيسا
فاسية بياص
متجوز معرس
يستهبل يتمنيك
مابيجمعش كينجمش!
العربية الكرهبة
الله يباركلك                     يرحم بوك!
خنقتني كرزتني!
بيض عظم
البيت الدار
التكيف الكليما
الريموت التليكوموند
واقي ذكري كابوت
الصانية الرونبوان
البنت الطفلة
لبس ماريول
الطاقية الشاشية
البوليس الدرك
القلعة القيروان
زحمة معمرة
سلام عسلامة
واد مُز قاطوس
مُزة قاطوسة
واد مش تمام طحان

وبكدة أسيبكم في الأراضي التونسية وأنا مطمن عليكم تنبسطوا وتشوفوا أحلى ما في خضارها.

عسلامة!

إسلام أشرف ابراهيم
إسلام أشرف ابراهيم
مش مغترب، لأن العالم بيته والطيارة ملعبه والغُرب أحبابه، شنطة السفر هي دولابه. كم الفرحة والأدرنالين اللي بيجيلوه لما بياخد فيزا جديدة لا يوصف، بيبقي ليها ريحة وطعم ولون. مايعرفش أنام إلا والباسبور جنبه ولازم يحلم بفيزا جديدة. من الأخر إسلام رحال ومايعرفش يعمل ايه غير السفر!