٢٠ جملة بالأسباني هيساعدوك لو رحت اسبانيا

مصري في اسبانيا
December 30, 2016

اسبانيا من البلاد الجميلة أللي بنعلم بيها أوروبا، سواء بسبب برشلونة، مدريد، فالنسيا، قرطبة أو الباسك. ولو روحت أوروبا لايمكن هتقدر تفوت انك تزورها. بس لازم تبقى عارف أن الأنجليزي لغة نادرة في أسبانيا وناس قليلة أللي بتتكلمه. وعلى عكس بعض الفرنسيين مثلاً، الأسبان مش بيضايقوا من الناس أللي بتتكلم معاهم بالإنجليزي وبيحاولوا يساعدوهم على قد مايقدروا.

ده مش معناه ان رحلتك هناك هتبقى رخمة ومش هتستمتع بوقتك بس لو عارف كام جملة بالأسباني مش هيضروا بالعكس هيخلوا الدنيا أسهل بالنسبالك. ديه قائمة بعشرين جملة هتستخدمهم يومياً وأنت هناك وهيخلوا الناس أللي هتقابلهم مبسوطين انك عملت مجهود بسيط في تعلم لغتهم.

ملحوظة: الأسباني ده ممكن يختلف شوية عن أسباني أمريكا اللاتينية مثلاً.

شوية أساسيات:

هاي – Hola

كل الناس بتقولها لبعض وهتلاقي نفسك طول الوقت بتقولها، لو قابلت حد في أي مكان أول حاجة هتقولها هي Hola. لو دخلت تشتري حاجة من محل أو مطعم أو في الهوستيل برضه نفس الكلام. مفيش حرف H في أسبانيا فا بتنطقها كدة oh la

صباح الخير – Buenos Dias/ مساء الخير – Buenas Tardes

عادة بتقول واحدة منهم بعد Hola، يعني مثلاً داخل محل الظهر هتقول Hola! Buenas Tardes، أو ساعات ممكن تختسرها وتقول Hola! Buenas  أما Buenos Dias مالهاش إختصار.

بتتكلم إنجليزي؟ – Hablas ingles؟

هتسئل السؤال ده على طول بعد ما تقولهم هاي أو صباح الخير عشان يمكن الشخص أللي بتسئله يكون يعرف إنجليزي حتى لو بسيط ويساعدك.

نقطة مهمة. الجملة ديه بتتقال لشخص في نفس سنك أو أصغر، انما لو هتقولها لشخص أكبر منك هتقوله Habla ingles؟

عامل أيه؟ Que tal

وديه بتستخدمها مع حد ماتعرفوش أو لسة متعرف عليه، أما لو شخص شوفته أكتر من مرة وعايز تقوله عامل أيه فهتقوله Como estas لو شخص في نفس سنك، أما لو شخص كبير فهتقوله Como esta. لكن Que Tal بتتقال أكتر في أسبانيا عموماً عن Como estas

أنا كويس شكرا – Bien, gracias

عشان لما هتسئل حد عامل أيه أكيد هيقولك وأنت؟ ممكن برضوا تقول Muy Bien ومعناها كويس جداً.

من فضلك – Por favor

محدش بيحب الشخص أللي بيسئله على طول من غير ما يقول من فضلك أو لو سمحت. غير من فضلك تقدر تقول بعد إذنك وهي Disculpa بالأسباني بنفس معنى Excuse me. وممكن برضه تقول Perdona بنفس المعنى وأسهل من Disculpa.

مع السلامة – Hasta Luego

لو بتقولها لحد هتشوفه بعد فترة، أما لو مش هتشوفه تاني وبتودعه يعني هتقوله Adios!

فرصة سعيدة Encantado/a

قولها كتير كل لما تتعرف على حد عشان تعتبر جملة بيستخدموها كتير.

إتجاهات:

يمين – a la derecha

شمال – a la izquierda

على طول – Todo Recto

على الناصية – En la esquina

فين كذا – Donde esta

هتستخدم كلمة Donde esta بمعنى (أين يكون) للسؤال عن مكان حاجة، بعد كدة تقول المكان أللي عايز تروحه. سواء شارع مشهور أو بنك أو مكان سياحي.

قشطة – Vale

نطقها ba-leh وديه أكتر كلمة ممكن تسمعها في اسبانيا ولو اتعودت عليها هتلاقي نفسك بتقولها كتير! وهي بمعنى أوكي أو قشطة بالمصري.

أكيد طبعاً مش هتعرف تتكلم أسباني بسهولة بس لما تبقى عارف كام كلمة أساسية الناس هيهتموا أكتر أنهم يساعدوك لأنك بذلك مجهود وقلت كام كلمة من لغتهم. لو بتفكر تروح اسبانيا أو رحت قبل كدة.

اللغة الأسبانية

*تم كتابة المقالة بالتعاون ما بين فريق عمل مشروع سفر وحسن عمرو.

عايز تروح اسبانيا قريب؟ سيب أسئلتك في الكومنتس وهنرود عليك على طول.

حسن عمرو
حسن عمرو
بيعشق اسبانيا والأسباني وحالياً بيدرس المجاستير بتاعه هناك في مدينة زاراجوزا. حسن قدر يعلم نفسه أسباني بطلاقة من غير أي دروس وفي نفس الوقت بيلعب Jiu Jitsu اللي من فنون القتال.