٣ مشاكل ممكن تقابلك قبل/بعد تحضير شنطة السفر وازاي تحلهم

تحضير شنطة السفر
December 31, 2016

أسخف مرحلة بالنسبة لناس كتير بسبب الوقت والمجهود أللي تحضير شنطة السفر بياخده مننا. الناس أللي بتسافر كتير هتاخد بالها من المشاكل أللي بتحصل كل مرة بنكون بنحضر فيها الشنطة، وبنضطر نشيل حاجات ونعيد ترتيب اللبس ونقعد على الشنطة عشان نعرف نقفلها ومشاكل تانية من النوع ده. جمعنا قائمة بسيطة فيها المشاكل ديه وازاي تحلها بطريقة بسيطة.

الهدوم بتتكرمش في الشنطة

مفيش حد محصلتلوش المشكلة ديه، والمصيبة بتبقى في احتمالية عدم وجود مكوة لو قاعد في هوستيل أو فندق على قده. شنطة السفر لو حطيت فيها الهدوم متطبقة يبقى الهدوم هتتكرمش لازم. بس فيه أكتر من طريقة بسيطة تحل بيها الموضوع ده. أول حاجة لازم تحط الهدوم بتاعتك قبل ما تتحرك من البيت للمطار بفترة قصيرة، جهز كل حاجة عادي وقبل ما تنزل من البيت إبدأ حطهم في الشنطة عان تقلل الوقت أللي هايكونوا فيه في الشنطة.

تحضير شنطة السفر

تاني حاجة ماتطبقهمش وتحطهم، الأفضل انك تلفهم وتلف أكتر من حاجة من نفس النوع مع بعض. يعني لف ثلاث تيشيرتات مع بعض، هتوفر مكان في الشنطة وكمان هتقلل نسبة الكرمشة. ممكن تحطهم مفرودين وتحط طبقة بلاستيك ما بين كل قطعة لبس وده هيساعد برضوا على تقليل الكرمشة. المهم انك أول ما توصل المكان أللي هتقعد فيه تبدأ تعلق كل لبسك وتسيبه يتفرد.

*اقرأ أيضاً: تعمل ايه لو شركة الطيران ضيعت شنتطك وأنت مسافر؟

وزن الشنطة زيادة/الشنطة مش بتقفل

مبدئياً من أسواء الجمل أللي ممكن تسمعها في المطار قبل ما تسافر هي “الشنطة وزنها زايد عن الحد المسموح.” ده لسة في سفرية بتبدأ ومصاريف هتتصرف، كمان هنصرف على الشنطة؟ تقريباً كنت المفروض تلاحظ أن وزن الشنطة كان زيادة لما اضطريت تنده على إخواتك وأبوك وأمك عشان يقعدوا على الشنطة عشان تعرف تقفل السوستة. بس هتشيل أيه ولا أيه، كل أللي في الشنطة مهم بالنسبالك.

تحضير شنطة السفر

لازم تعمل قائمة بأهم الحاجات أللي لازم تاخدها وتبتدي تحط الحاجات أللي في أول القائمة ديه في الشنطة وتضطر تشيل الحاجات أللي في آخر القائمة. إعرف الجو هيبقى عامل ازاي في الأيام أللي هتروحها وشيل أي لبس مالوش لازمة. ادخل على موقع الفندق أو الهوستيل أللي هتقعد فيه واعرف الخدمات أللي بيقدموها، لو مثلاً بيوفرولك في الأوضة شامبو شيل الشامبو بتاعك من الشنطة وهكذا.

السوفنيرز أللي كنت جايبها اتكسرت لما وصلت

حاجة سخيفة جداً الصراحة أن الطبق الإزاز أللي اشتريته لجدتك لقيته متفتفت مليون حتة في شنطة السفر أول ما رجعت. في إحتمالية كبيرة ان شنتطك تترمي وتقع والناس أللي شغالة في المطار تعاملها بإهمال فلازم تاخد حذرك ولو شاري أو معاك أي حاجة ممكن تتكسر يبقى لازم تلفها في ورق جرايد أو تحطها بين الهدوم. ممكن السوفنيرز الصغيرة أللي ممكن تتكسر تحطها في أماكن زي جوا الجزمة أو الشرابات. غير السوفنيرز والهداية لازم أي حاجة فيها سوائل تكون مقفولة كويس وملفوفة بورق الجرايد وإلا هتفتح شنتطك وهتلاقيها متغرقة.

تحضير شنطة السفر

تابعنا على تويتر وشوف نصائح أكتر عن السفر.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.