عبدالرحمن عمرو: تركب ايه من مطار روما الرئيسي لوسط البلد

الكوليسيوم
January 7, 2017

مطار روما الرئيسي هو مطار فيومتشينو وليه اسم تاني وهو مطار ليوناردو دا فينشي وده في رأي من المطارات الجميلة اللي زرتها في اوروبا. بصراحة كان من أسهل المطارات اللي اتعاملت فيها من غير ما احتاج اسأل كتير عن بوابات الخروج وأماكن ركوب القطر أؤ الاتوبيس وكدة لإن كل حاجة واضحة جداً. في نفس الوقت مكاتب الإستفسار متوزعة كويس وسهل تلاقيها.

عشان تتحرك من المطار اللي يعتبر بعيد عن وسط البلد ب٢٦ كيلو هيبقى قدامك ثلاث حلول، ودول اللي هنتكلم عنهم في المقالة ديه.

القطر

أسرع طريقة توصل بيها لكن تعتبر طريقة غالية شوية. القطر اللي اسمه Leonardo Express بيتحرك كل ٣٠ دقيقة من المطار لمحطة Termini في وسط المدينة واللي منها بتركب المترو أو الاتوبيس وتروح وجهتك أو مكان إقامتك.

تذكرة قطر محطة روما

سعر التذكرة بيكون ١٥ يورو وبتوصل لوسط المدينة في ٣٠ دقيقة بالظبط، بعيد عن الزحمة وكله. أول ما بتشتري التذكرة بتعملها Validation من خلال المكنة وبعدها بتبقى صالحة لمدة ٩٠ دقيقة.

اتوبيس Terravision

ده الاتوبيس الShuttle بتاع المطار. ثمن التذكرة بيكون ٩ يورو وبتروح لنفس النقطة اللي القطر بيروحها: Termini Station. ممكن تشتري تذكرة ذهاب وعودة للمطار عشان لو هتركب طيارتك من هناك ب١٥ يورو. الاتوبيس بياخد من ٤٠ تقريباً٦٠ دقيقة حسب الزحمة طبعاً.

التاكسي

ده طبعاً أغلى حاجة بالنسبة للشخص اللي بيسافر لوحده، انما لم هتتقسم مع صحابك فالوضع مختلف. في تسعيرة موحدة للتاكسي من المطار لوسط المدينة وهي ٤٠ يورو وبياخد يورو على كل شنطة.

في كل الأحوال سواء هتاخد اتوبيس أو قطر أو تاكسي، فهتقدر تلاقيهم بسهولة بمجرد ما طيارتك توصل. كل اللي عليك انك تمشي ورا اليفط اللي موجودة في المطار اللي بتشرح كل حاجة ولو محتاج معلومات أكثر عن المطار شوف اللينك ديه.

اقرأ أيضاً تجربتي في روما لمدة يوم واحد وايه اللي تلحق تعمله هناك في أقل وقت.

عبدالرحمن عمرو
عبدالرحمن عمرو
مؤسس مشروع سفر. مابيسافرش غير لوحده عشان يعمل اللي هو عايزه في الوقت اللي يناسبه. أكتر حاجة عبدالرحمن بيحبها في السفر، الأكل وانه يتعرف على مُسافرين زيه ويتمشى في الشوارع بالساعات من غير ما يزهق.