عبدالرحمن عمرو: تقييم هوستيل St Christopher’s Inn في باريس

هوستيل St Christopher's Innالصورة: Hostlez.com
January 7, 2017

روحت باريس في نوفمبر ٢٠١٦ في وقت تعتبر فيه الدنيا هادية والأسعار مقبولة. قعدت في هوستيل St Christopher’s Inn في منطقة Monmarte اللي من المناطق السياحية المشهورة هناك وعلى بعد ١٥ دقيقة من برج ايفيل.

التجربة في المجمل كانت تجربة مميزة والهوستيل كان مستواه حلو جداً خصوصاً بالنسبة لسعره اللي في بلد تعتبر من أغلى البلاد السياحية لينا كمصريين. في المقالة ديه هتكلم عن الحاجات الأساسية في الهوستيل زي السعر والسراير والموقع وغيرها من الحاجات اللي بتفرق مع المسافرين لما بيقرروا يختاروا مكان يقعدوا فيه.

هوستيل St. Christopher's inn

السعر

السعر اللي حجزت بيه يعتبر طبعاً رخيص في الوقت ده خصوصاً انه مش وقت سياحي. الليلة كلفتني ١٨ يورو وفي الأوقات السياحية بتوصل ل٢٠ يورو بس لازم تحجز بدري. السعر ممتاز لان انت تعتبر قاعد في وسط البلد وقريب من كل حاجة.

الموقع

لما تروح برج ايفيل في ١٥ دقيقة واللوفر في نص ساعة فده يعتبر موقع كويس جداً. الهوستيل على قناة مياه منظرها رائع، كفاية الفطار كل يوم الصبح عليه، وقريب من محطتين مترو. في نفس الوقت، هتلاقي قريب منك مطاعم أكل مختلفة وسوبرماركت منها الكبير زي كارفور مثلاً والصغير. في محلات مختلفة تشتري منها أي حاجة تحبها وعلى بُعد ٥ دقائق تقريباً بالمترو من Sacre Coeur.

هوستيل في باريس

الموظفين

عملية التسجيل والدخول سريعة مش بتاخد أكثر من خمس دقائق. الموظفين ودودين جداً وبيساعدوك في أي معلومة محتاجها سواء عايز تعرف تروح مكان ازاي أو عندك مشكلة في حاجة معينة.

الأكل

الهوستيل مش بيقدم أكل مع الإقامة لكن بيقدم فطار أوبن بوفيه بثمن رخيص أوي (٢ يورو) ويستاهل الصراحة لانه بيكون فيه كورن فليكس ولانشون وزبدة ومربى وعسل وكرواسون وعيش وقهوة وشاي. المشكلة الوحيدة في موضوع الأكل ان مفيش مطبخ تقدر تطبخ فيه أكلك ولا ثلاجة تخزن فيها حاجة اشتريتها فهتضطر تشتري اكل من برة على مدار اليوم لكن فيه مايكرويف.

اقرأ أيضاً: الحل الأمثل للأكل الحلال وأنت مسافر

الإقامة

كل سرير ليه ستارة لمزيد من الخصوصية وديه ميزة مش موجودة في هوستيلز كتير. كنت بستغل الموضوع ده دائماً لما بحتاج انعزل عن الأوضة اللي انا فيها والناس اللي معايا. كل سرير ليه الفيشة بتاعته كمان ونور صغير. الحمامات مشتركة ونظيفة وفيه أوضة تحت تقعد فيها تريح وتغير جو وتقدر تستخدم الكمبيوترات اللي بيوفروها في الزوضة ديه ببلاش.

هوستيل St Christopher's Inn

الأنشطة

الهوستيل بيعمل أنشطة كتير بتساعدك تتعرف علي الناس اللي معاك. منها مثلاً حفلات وألعاب للناس اللي في الهوستيل واللي من برة الهوستيل كمان، وده ساعدني أكون صداقات كتير بسهولة.

في المجمل، أرشح هوستيل St Christopher’s Inn لأي حد رايح باريس ومش هيبقى عنده مشكلة يجيب أكل من برة معظم الوقت بسبب موضوع ان مفيش ثلاجة. تقييم الهوستيل ٨ من ١٠.

لو عايز تحجز هوستيل في باريس يبقى تشوف المقالة ديه عن أفضل وأرخص الهوستيلز الموجودة هناك.

عبدالرحمن عمرو
عبدالرحمن عمرو
مؤسس مشروع سفر. مابيسافرش غير لوحده عشان يعمل اللي هو عايزه في الوقت اللي يناسبه. أكتر حاجة عبدالرحمن بيحبها في السفر، الأكل وانه يتعرف على مُسافرين زيه ويتمشى في الشوارع بالساعات من غير ما يزهق.