٦ نصائح مهم تعرفهم لو إضطريت تنام في المطار

ازاي تنام في المطارالصورة: New York Times
January 15, 2017

أكيد مفيش حد بيحب ينام في المطار، بس زي ما العنوان بيقول، أحيانا بنضطر نعمل كدة بسبب الظروف اللي بتحصل في المطار من رحلات ملغية أو متأجلة لترانزيت طويل وكدة. ولأن المطارات معظمها مش مسلي أوي، المُسافرين بيحبوا يستغلوا الوقت الفاضي ده ويناموا لغاية معاد الطيارة لأن مفيش أحسن من انك توصل البلد اللي هتروحها وانت واخد كفايتك من النوم وجاهز تبدأ تلف وتستكشف.

محتاج بس تكون عارف شوية أساسيات كدة قبل ما تبدأ تفرش رجلك على الكرسي وتاخد وضعية النوم.

هات أدوات تساعدك على النوم

مش كل الناس زي بعض في النوم، فيه ناس بتقدر تنام عادي وسط الدوشة وفي ناس ما بتقدرش. فلو مش عارف تنام من دوشة ونور المطار يبقى تشتري من هناك سدادة للودان وقناع النوم وممكن المخدة الU عشان يساعدوك أكتر انك تنام. طبعاً لو معاك الحاجات ديه في الشنطة من الأول تبقى وفرت على نفسك شوية فلوس.

ادخل على sleepinginairports.net

زي ما الإسم بيقول كدة، الموقع بيساعدك تعرف معلومات عن كل مطارات العالم. تقدر تدخل عليه وتقرأ reviews ورأي ناس راحت المطار ده وتعرف الأماكن اللي هما عرفوا يناموا فيها جوا المطار والأماكن اللي ماعرفوش يناموا فيها. الموقع كمان مفيد في كل ما يتعلق بالمطارات زي انك تعرف المطار فيه انترنت ببلاش ولا لأ وأنواع المطاعم الموجودة جوا المطار ألخ ألخ.

نوم في المطار

الصورة: Sleepinginairports.net

أمن حاجتك

لأن أكتر مشكلة هتقابلك لما تيجي تنام في المطار هو خوفك من أن حاجتك تتسرق وأنت نايم وده شيء طبيعي. لكن تقدر تعمل شوية إجراءات أمان بسيطة تساعدك تنام وانت بالك مرتاح. لو مسافر مع حد يبقى تعملوا شيفتات لكل واحد ينام شوية والتاني ياخد باله من الشنط وتبدلوا. تقدر كمان تنام في حتة في المطار تكون قريبة من مكتب الأمن أو الشرطة أو أي مكان فيه فرد أمن واقف على طول، لأنه هيلاحظ لو أنت اتسرقت وأنت نايم.

حاول تحط شنطك في أماكن ذكية لا يمكن حرامي يفكر يسرقها، شنطة صغيرة تحت راسك كمخدة مثلاً والشنطة الكبيرة تسند رجليك عليها. الباسبور والتذكرة وأي أوراق مهمة لازم يبقوا في جيبك طول الوقت وأنت نائم لأن كلنا عارفين ازاي ممكن أي سفرية تبوظ لو ضاعوا وأنت في المطار.

إسئل الLounge بكام

دائماً عندنا نظرة كدة أن أي Lounge في المطار لازم يا إما هتكون للركاب اللي حاجزين First Class أو هتدفع مبلغ خيالي عشان تدخلها. ده مش صح في كل الحالات، أحياناً ممكن تبقى أرخص من ما أنت كنت متخيل فلازم تسئل لو عايز تدخل هتدفع كام لأن جوا هتلاقي حمامات ممكن تستحمى فيها وإنترنت وهدوء أكثر وكراسي مريحة تنام عليها.

كيفية النوم في المطارات

إسأل شركة الطيران على أي تعويض

لو رحلتك إتلغت أو إتأجلت لفترة فشركة الطيران هي المسئول الأول. رغم أنه في أوقات كتير بيكون غصب عنهم لكن في شركات طيران هتساعدك بشوية تعويضات سواء فاوتشرز تدخلك الLounge أو ليلة في فندق المطار. ما تتكسفش انك تسئل واتكلم معاهم بهدوء وشوف هيقدمولك ايه.

توقع أن ممكن حد يصحيك

النومة في المطار مش بس مش مريحة لكن كمان في شوية مطارات ممكن ترخم عليك وماتسمحلكش انك تنام. فحاول تحط دائماً إحتمالية ان يجي ظابط يصحيك ويقولك ما ينفعش تنام هنا. ماتقولوش أي حاجة ولا ان طيارتك اتلغت وكل الكلام ده لأنه سمعه مليون مرة. شيل حاجتك ودور على مكان تاني تقدر تنام فيه.

الصورة: Sleepinginairports.net

الصورة: Sleepinginairports.net

اقرأ أيضاً: حلول سريعة تعملها لو وزن شنطتك زيادة ومش عايز تدفع غرامة

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.