أشرف علام: ازاي توفر فلوس مواصلاتك وتذاكر المعالم السياحيه في لندن

مواصلات لندن
January 28, 2017

لندن من اجمل بلاد العالم وأكثرها نظاما في موضوع التنقلات سواء مترو او باص او قطر او حتى مشي او بالعجل. لكن اللي ناس كتير متعرفوش انك ممكن توفر مبالغ طائله في موضوع المواصلات بس.

ازاي؟

سيبك من كارت Oyster لو ناوي تقعد في لندن اكتر من يوم واشتري travel card سواء كارت ليوم واحد او اسبوع او شهر الكارت مالهوش ليميت لتنقلاتك عكس Oyster اللي بيحسب كل رحلة ويخصمها من حسابك اللي شحنته مقدماً.

كارت الموصلات لندن

المصدر: Visitbritainshop

الاهم بقى انك ممكن تاخد تخفيض على معظم المعالم المشهوره وتدفع لشخص بدل شخصين يعني ٥٠٪‏. ازاي؟

الناس كلها بتروح تشري الكارت من محطة الاندجراوند او المترو، لا غلط، روح اي محطة قطر واشتريه من هناك واطلب من الكاشير يديلك الكتيب بتاع التخفيضات وهو عبارة عن كتاب صغير كله فاوتشرات تخفيض وممكن تاخد اكتر من كتيب ولو ضاع منك هتلاقي في اي محطة قطر جنب الكاشيرات ستاند عليه الكتيبات دي تاخد منه زي ماتحب.

ماينفعش تشري الكارت من محطة مترو وتستخدم الكتيب لازم يكون الكارت صادر من من محطة قطر وعيش بقى وادعيلي. حتلاقي في الكتيب كل المعالم اللي تتخيلها حتى متحف الشمع وعين لندن وحديقة الحيوان وتقدر تعرف اكتر عن المعالم السياحية على اللينك ده.

التوفير في لندن

ولو عايز تغير عمله احسن محل صرافة واحسن سعر محل تذكارات مش فاكر اسمه في اكسفورد ستريت قبل اوكسفورد سيركس وانت رايح من ماربل ارش تلاقيه على اليمين جنب الدو للاحذية قبل اوكسفورد سيركس على طول. احسن سعر في كل صرافات لندن كان ٦٢ جنيه استرليني لل١٠٠ دولار المحل ده اداني ٧٠ استرليني.

انا بسافر لندن من سنة ١٩٧٧ سافرتها اكتر من ٣٠ مره وعشت فيها فتره وانا صغير. اللي محتاج استفسار يقوللي في الكومنس وانا هساعده.

أشرف علام
أشرف علام
عايش في دبي بيسافر من عمر ١٦ سنة وبيعشق السفر. اول بلد زارها كانت لندن وزارها اكتر من ٣٠ مره وعاش فيها فترة في السبعينيات. سافر باريس وامريكا قريب هيروح رحلة كروز اوروبا على باخرة رويال كاريبيان بريليانس اوف ذا سيز دول المتوسط ناوي يزور حوالي ثماني دول. وطبعا حيعمل عن الرحلة تقرير مفصل