شريف وهبي (تطوع): تفاصيل سفريتي إلى المغرب مع AIESEC

تطوع في المغرب
March 6, 2017

في صيف ٢٠١٦ سافرت لأول مرة مع AIESEC وروحت المغرب. عايز اتكلم في المقالة ديه عن تجربتي وازاي غيرت فيا للأحسن.

البداية

الموضوع كان غريب اوي اني اسافر بره مصر لمدة شهر ونص لوحدي وخاصة اني مكنتش بعرف اعتمد على نفسي. بس انا كنت عايز اسافر وخلاص. شوفت الستاند بتاع AIESEC عندي في الجامعة فروحت اعرف ايه الموضوع. ولقيت ان الموضوع سهل وجميل وأقدر أعمله. طبعا على الناحية التانية، الدنيا كانت مختلفة مع أهلي عشان صعب يفهموا كل حاجة عن السفرية، بس بعد الكلام معاهم وشوية نقاش فهموا ليه لازم أعمل السفرية ديه. انا كنت مخطط اسافر بلد غريبة وكنت فاكر ان اي بلد عربية هتبقى زي مصر بس اللي اكتشفته اني طلعت غلطان تماماً.

*اقرأ/ي أيضاً | ازاي تطلع فيزا المغرب

مدن المغرب

قبل السفر

بعد ما خلصت كل الإجرائات وجه يوم السفر كنت مرعوب جداً بس في نفس الوقت كنت متحمس جداً. المشروع بتاعي كان في مدينة والطيارة كانت رايحة مدينة تانية، مكنش فيه ولا طيارة رايحة على هناك على طول، فسألت الناس هناك اعمل ايه أول ما أوصل ودلوني على كل خطوة محتاج أعملها.

مدينة أكادير

المهم سمعت الكلام ونزلت من الطيارة وركبت الاتوبيس لحد المدينة اللي كان فيها المشروع وكان اسمها أكادير. أكادير ديه عاملة زي الغردقة في مصر مدينة سياحية على المحيط على طول. التنقل في اكادير سهل اوي في تكاسي وفي الأتوبيس العمومي. المشروع بتاعي كان عبارة عن ترويج للسياحة في المغرب. كنا بنروح اماكن مختلفة ونصورها ونحطها على فيسبوك وإنستاجرام. شغل بسيط.

*اقرأ/ي أيضاً | اسبوع في المغرب ب٦٠٠٠ جنيه قبل التعويم

معالم سياحية في المغرب

مراكش

قعدنا فى أكادير اسبوعين ونص وبعد كدة روحنا المدينة اللي بعدها، وهي مدينة مراكش وهناك اشتغلنا على نفس المشروع لكن مراكش مدينة غير عادية ومختلفة جداً وفائقة الجمال. بعد ما خلصت شغلي في مراكش كان فات خمس اسابيع واتبقى كدة اسبوع واحد في السفرية ولغاية ما أرجع مصر.

الإسبوع ده قضيته لف على ميادين المغرب اللي لسة مروحتهاش، وعملت كدة مع صحابي من مختلف جنسيات العالم اللي عملتهم هناك وكانوا معايا في المشروع وقضينا أحلى اسبوع.

سافر مع ايسيك

في الاخر ممكن اقول ان تجربتي في المغرب جميلة جدا والبلد كانت مختلفة تماماً عن مصر. روحت قابلت ناس من كل أنحاء العالم وكونت صداقات جميلة ولغاية دلوقتي على تواصل معاهم. اشتغلت في مشروع ينمي المجتمع وفي نفس الوقت لفيت البلد. تعاملت مع ناس من بلاد مختلفة وده لوحده بيديك خبرة في التعامل مع الناس عموماً وكدة يبقى عندك ثقافات مختلفة من أماكن ماكنتش تعرف عنها حاجة.

سافر المغرب

لو عايز تقدم في برنامج AIESEC للتطوع ادخل على اللينك ديه

شريف وهبي
شريف وهبي
طالب في الاكاديمية العربية للعلوم والتكنولوجيا والنقل البحري كلية هندسة الحاسبات بيحب كرة الطائرة و السفر طبعاً غير انه و عضو في AIESEC