دنيا الفولي: التطوع في الصين مع Have A Dream

رحلة تطوع في الصين
March 19, 2017

اتكلمنا في الفترة اللي فاتت عن تجارب للتطوع مع AIESEC في دول زي الهند والمغرب واندونيسيا. دلوقتي هنعرض وجهة نظر تانية للتطوع مع منظمة تانية وهي منظمة Have A Dream. اتعرّفوا أكثر عليهم من خلال تجربة تطوع لدينا الفولي في الصين.

– في البداية يا دنيا كلمينا شوية عن نفسك وإزاي عرفتي Have A Dream؟

انا اسمى دنيا الفولى، عمري ما سافرت برا قبل كده. مكنتش اعرف اى حاجة عن Have A Dream و بالصدفة حد قالى عن برنامج الصين قمت قلت اقدم مع اني كنت فاكرة ان ممكن اوي متقبلش (تفاؤل مصريين عادى) بس اتقبلت 😀

– ايه اكتر حاجة عجبتك فى الصين؟

اكتر حاجة عجبتنى فى الصين المناظر الطبيعية هناك. احنا قعدنا ثلاث اسابيع فى مكان اسمه Guilin و ده مكان معروف بأنه حاجة كده زى مصيف فى الصين وبعدين قضينا اسبوع فى شنغهاي وبكين.

المناظر الطبيعية فى Guilin مش ممكن توصف بالكلام. كنت ببقى شايلة اوي هم اني هرجع مصر ومش هشوف المناظر دي تاني. الجبال كتير جداااا ومهما حاولت تعدهم مش هتعرف ومتغطية بنباتات واشجار جميلة جدا. الاوضة بتاعتنا هناك كان الview بتاعنا من الشباك جبل والجبل ده سميناه Paradise من كتر ما شكله تحفة.

المطر بيمطر كتير و ده بيخلى المكان شكله نظيف جدا كان الشجر مغسول وده بيخلى لون الخضرة جميل و نظيف.

حاجة تانية الناس هناك خدومه اوى اوى ..كنا ساعات لما بنحتاج مساعدة حد يوصفلنا عنوان حاجة مثلا. كانت الناس تتلم علينا و يحاولوا بقدر المستطاع يساعدونا أو حتى يوصلونا بعربياتهم للمكان اللي احنا عاوزينه ببلاش. وعادي اوي تلاقي ناس بتساعدك في شيل الشنطة.

الصينيين مبيخدوش Tips خالص ..هما ثقافتهم كده..ولو ليك باقى قرش واحد هتاخده من غير ما تطلبه. (كلمة “كل سنة و انتى طيبة ” دى مسمعتهاش غير و انا فى مطار القاهرة 😀 )

تطوع مع Have A Dream

– طيب في حاجة معجبتنيش هناك؟

قبل ما اسافر قريت معلومات كتير اوى عن الصين و آراء السياح فيها، وكلهم كانوا بيقولوا ان الصينيين مش بيتكلموا غير اللغة الصينية بس ونادر اوي اوي لما تلاقى حد بيتكلم انجليزى مثلا. بس طبعا كأي مواطن مصري اصيل كنت فاكرة اني هعرف اتعامل وافوت في الحديد. فوجئت ان الكلام ده بحق وحقيقي وان ٩٥% من الناس اللي قابلتهم مش بيفهموا ولا كلمة انجليزى، ولا حتى الأرقام أو كلمة Taxi او Bus.

انا حتى دخلت صيدلية هناك سالت الدكتور “Are you the doctor ?” مفهمش انا بقول ايه ..قولتله شكرااااا ومشيت.

برضه كل حاجة كل حاجة مكتوبة بالصيني بس. يعني تدخل السوبر ماركت كله صيني، تدخل اي مطعم كله صيني وده كان صعب اوى لان احنا مكناش عارفين ناكل ولا نشرب عشان الاكل شكله غريب اوي وحتى اللى بيبيعوه مش عارفين يشرحولنا ده ايه.

Have A Dream

– ازاى التجربة دى فرقت معاكي؟

انا سافرت حمادة رجعت حمادة تانى خالص. من ناحية الامكانيات انا ممكن دلوقتي اعيش على اقل اقل الامكانيات المتاحة، انا حتى ساعات دلوقتى وانا في مصر بحاول اصعب الامور عليا في اي حاجة عشان اتمرن على لما اسافر برا تانى.

الحياة فيها حاجات كتير اوي احنا لسه منعرفهاش..مبقتش اركز فى خلافاتي مع حد و شيلت تفاصيل كتييير في حياتي كنت قبل السفر فاكراها حاجات مهمة بس لما رجعت فهمت ان فيه حاجات تانية اهم لازم اركز فيها ولازم استمتع بالحياة ومضيعش وقتي اكتر من كده.

*اقرأ/ي أيضاً | عايز تعمل رحلة تطوع؟ دول ٥ أماكن يساعدوك

انا كنت قريبة اوى من نفسى وكنت بتكلم مع نفسي كتير عشان دى كانت اكتر فترة كنت مسئولة عن نفسي فيها. عرفت نقاط ضعفي اللي مكنتش واخدة بالي منها ولقيت نقاط قوتي واتحديت نفسي كتير وكنت بفرح اوي لما أنجز حاجة كنت فاكرة انها مستحيلة. قابلت ناس كتير وجنسيات كتير واتعلمت منهم حاجات كتير اوي سواء اتفقت أو اختلفت معاهم كل واحد فادني بطريقة مختلفة، الحاجات دى كلها اثرت على رأيى فى نفسى ومنظوري لحياتي.

قوليلنا اكتر حاجة مجنونة عملتيها هناك 😀 ؟

اني سوقت العجلة على طريق مظلم تماما في نص الليل على ضوء القمر بس، مع العلم اني اول مرة اطلع على الطريق ده والطريق عبارة عن حارتين بس حارة رايح وحارة جاى ومفيش فاصل بينهم ومحاط بجبال من ناحية ومن الناحية التانية حقول مستواها منخفض اوي عن مستوى الطريق والمسافة حوالى ثمانية كيلو رايح جاى ومع العلم اني لسة متعلمة اسوق العجلة اصلا ومع ان فيه كذا حد حذرني من الطلعة دي بس انا فخورة جدا اني قررت اتحدى نفسي.

فى الاخر بس حابة اقول حاجة، فيه ناس كتير بتسافر وترجع توصف قد ايه التجربة كانت ممتعة ومفيدة وانا كنت من الناس اللي بتقرا الكلام ده وتقول “ممكن الناس دى تكون بتأفور..اهي سفرية زي اي سفرية تانية” بس احب اقول ان الكلام ده مش حقيقي، مش هتصدق الكلام غير لما تجربه بنفسك و لو جربته مرة هتدمنه. هترجع من السفر بتخطط للسفرية اللي بعدها. السفر جوا مصر حاجة وبرا مصر حاجة تانية تماماً.

لو مهتم بالتطوع وعايز تعرف أكثر عن Have A Dream تقدر تشوف صفحتهم على الفيسبوك هنا واتعرف على برنامجهم الجديد سفراء أفريقيا

Have A Dream
Have A Dream
منظمة بتساعد على توفير رحلات تطوعية ثقافية وفرص تدريب للشباب في مختلف دول العالم. هدف الفرص ديه هي تعليم وتطوير الأفراد من خلال تجارب جديدة عليهم بتساعدهم يشوفوا العالم في نفس الوقت.