انترفيو سفر: محمود عبدالمجيد، شريك مؤسس لHave A Dream

Have A Dream محمود عبدالمجيد
March 23, 2017

محمود عبدالمجيد هو أحد مؤسسي منظمة Have A Dream. واللي مايعرفش لسة Have A Dream، فهما منظمة مهمة جداً في عالم التطوع في مصر ساعدت عدد كبير من المصريين انهم يسافروا العالم عن طريق التطوع ويشوفوا دول وتجارب مختلفة ومتنوعة. اتكلمنا عنهم بالمناسبة قبل كدة وعن منظمات تطوعية تانية في المقالة ديه.

قابلنا محمود في مقر المنظمة الجديد وهو Co-working Space في مصر الجديدة ودردشنا معاه عن فكرة التطوع عموماً وايه الإستفادة اللي ممكن تحصل للشخص اللي بيسافر عن طريق التطوع بدل من السياحة. غير ان احنا عرفنا منه شوية نقط أساسية تساعدك تتقبل في برامجهم التطوعية وعرفنا كمان أحدث البرامج اللي هيعملوها في الفترة الجاية.

افريقيا تطوع Have A Dream

قولنا ايه هي Have A Dream وايه الخدمات اللي بتقدموها؟

Have A Dream منظمة مصرية تأسست فى أكتوبر 2014 تهدف لمساعدة الشباب لخوض تجربة التطوع الدولي لاكتساب خبرات حياتية كبيرة من خلال السفر وترك بصمة عظيمة من خلال التطوع بالإضافة للتعايش مع ثقافات اخرى وتقبل أفكار جديدة.

التطوع قد يكون تدريس لغات او مواد زى العلوم والرياضيات أو أنشطة تانية زي الزراعة، الرعاية صحية، بناء مدارس. سفرنا لغاية دلوقتي ٢١٠ متطوع في برامجنا منهم مصريين وأجانب.

احنا بننظم برامج تطوعية وبرامج تبادل ثقافي للشباب فى كل بلاد الدنيا. عندنا برامج فى الهند، ماليزيا، اندونيسيا، كمبوديا، نيبال، فيتنام، تايلاند، الاردن، غانا، جنوب افريقيا، فرنسا وأوكرانيا.

في رأيك وكواحد مسئول عن منظمة بتساعد على التطوع، ايه أهم الحاجات اللي هتعود عليا من السفر عن طريق التطوع؟

التطوع برة ميزته فى التحديات اللي بتقابلها لانك بتروح تعيش فى ثقافة مختلفة تماما عن ثقافتك وحياة مختلفة من عادات وتقاليد واكل وطريقة لبس وأسلوب تعامل. التجربة هتساعدك تخرج من ال comfort zone بتاعتك عشان تكتشف عالم آخر دائماً بتسمع عنه بس.

الممتع فى الموضوع انك بتعمل كل ده وانت مستمع يعنى الموضوع مش تكدير ولا خنقة. بتصحى بدرى وتقوم تعلم اطفال تخلص يومك تقعد مع جنسيات تانية تتعرف عليهم وتعرف عالم جديد وفي الويك اند تخرج وتشوف البلد.

اسيا Have A Dream

ايه هي البرامج المتاحة حالياً اللي نقدر نقدم عليها؟

فى برنامج حاليا لأفريقيا وده عبارة عن مغامرة كبيرة جداً. هناخد سبع مصريين من القاهرة لكيب تاون بالطيارة ونرجع من كيب تاون للقاهرة برى فى رحلة هتستغرق حوالى ٣٧ يوم هدفها اكتشاف القارة اللي احنا عايشين فيها.

الرحلة مغامرة محسوبة الكنز فيها هو الرحلة نفسها. هنعدى فيها على ١١ دولة، بلاد تشيلنا وبلاد تحطنا عشان عايزين نوصل رسالة للأفارقة نقولهم اننا عايزين نعرفهم ونعرّفهم بينا اكتر.

سبع أفراد اللى هيسافروا دول هيبقوا اكثر سبعة محظوظين في ٢٠١٧ فى مصر بجد عشان هيشوفوا حاجة مش سهل تشوفها كل فترة. البرنامج مكلف جدا تكلفة الشخص حوالي ٢٠٠٠ دولار واحنا بنحاول مع رعاة دلوقتي انهم يغطوا جزء من تكاليف الرحلة عشان المتطوع ميدفعش المبلغ ده.

Have A Dream Co-working Space

المفروض لو هقدم على برنامج من برامجكم، أقدم قبل معاد السفر بقد ايه؟

احنا بننزل البرامج والابليكشن بمدد محددة وبيبقى مكتوب فيها الـ Deadline وغالباً دة بيكون قبل السفر بشهرين او ثلاثة

ليه ادفع فلوس إذا كنت بعمل عمل تطوعي وبقدم وقتي ومجهودي؟

لان الخبرة اللى هتاخدها بجد كبيرة وتستحق ولو جربت مرة هتعرف ده واسأل اى حد جرب قبل كدة هيقولك وخصوصا اللى سافروا سياحة قبل كدة بيحكوا دائما أن التطوع تجربته أعمق بكتييير. السفر التطوعى موفر كمان لانه بيشيل عنك فلوس الإقامة والأكل فى برامج مدتها قد تتعدى الشهرين.

هل في مواصفات معينة لازم تكون فيا عشان اطلع رحلة تطوع مع Have A Dream ؟ يعني قولنا على معايير أساسية لكل شخص بيقدم

اللغة الانجليزية تكون متوسطة مش لازم اقوى حاجة في الدنيا. المرونة مهمة جداً، لازم الشخص يكون عنده مرونة انه يتقبل اشياء كتير، متفتح يتقبل ثقافة الآخر وعنده هدف وحلم من السفر مش مجرد انه لقى سفر سعره قليل.

سافر مع Have A Dream

تابعوا صفحة Have A Dream على الفيسبوك أو على موقعهم عشان تتعرفوا على برامجهم المتاحة

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.