مصطفى نبيل: ازاي تسافر جورجيا بأقل التكاليف

فيزا جورجيا
March 27, 2017

انا سافرت جورجيا مع زوجتي وقدرنا نعمل كدة بتكاليف قليلة جداً. في المقالة ديه هتلاقي شرح كامل لكل تفصيلة محتاج تعرفها عشان تعمل رحلة زي الرحلة اللي عملناها، بداية من الفيزا للإقامة والأكل والشرب والمواصلات ومعلومات هتساعدك وأنت هناك.

الفيزا

فيزا سهلة وممكن تطلعها من اللينك ده على طول وبتكلفة ٢٠ دولار. الفيزا تعتبر إلكترونية لانها بتجيلك على الإيميل بعد سبع أيام عمل. معلومات أكثر عن الفيزا في المقالة ديه.

تذاكر الطيران

ارخص تذكرة لجورجيا من مصر هتلاقيها على شركة Cairo Air اللي بتطلع من مطار الغردقة إلى مطار تبليسي. احنا حجزنا التذكرة وقتها ب ٢٠٥٠ جنيه ذهاب وعودة وده طبعاً سعر خرافي. الاسعار بتتغير كل يوم وممكن تعرف ارخص تذاكر موجودة من على SkyScanner

جورجيا سفر

الإقامة

الأسعار في الفنادق تبدأ من ٥٠ جنيه مصري في الليلة وانت طالع. ممكن تعرف الاسعار المتوفرة في القوت اللي هتسافر فيه وتحجز من على موقع حجز فنادق زي Booking. احنا قعدنا في غرفة دبل في فندق نجمتين في مدينة باتومي بحوالي ١٠ دولار في الليلة.

*اقرأ/ي أيضاً | السفر لجورجيا خطوة بخطوة

الغرفة كان فيها تكييف سخن وبارد، مكواه ، استشوار ، تلفزيون ، ثلاجة ، وبلايستيشن! حاجة زي فنادق السبع نجوم في مصر.

فنادق جورجيا

الانتقالات

تعتبر تقريباً ببلاش من كتر ما هي رخيصة.

المترو: ١ لاري

التلفريك: ٢ لاري ذهاب و عودة

الاتوبيس: ٥٠ تيتري (نص لاري)

في مدينة باتومي الاتوبيس ب ٤٠ تيتري (٠.٤٠ لاري)

القطر درجة أولى: ١٨ لاري، درجة ثانية: ١٠ لاري

سافر جورجيا

الاكل

الاكل الأشهر في جورجيا هو المعجنات واسعارها بتكون من أول نص لاري إلى ٢.٥٠ لاري أو أكثر. واسعار متوسط الوجبات عموماً بيكون ٦-٨ لاري. المشروبات الأشهر هناك الكحوليات طبعاً والمشروب الرسمي في جورجيا هو Chacha وهو مشروب كحولي أيضاً.

أهم المدن

تبليسي (العاصمة)، باتومي، كازبيجي، متسخيتا، جودوري، انانوري

لو عندك أي أسئلة بخصوص جورجيا سيبها في الكومنتس وادخل هنا عشان تشوف كل مقالات مشروع سفر عن جورجيا.

سياحة جورجيا

مصطفى نبيل
مصطفى نبيل
مصطفى وزوجته رضوى مجدي من عشاق السفر وسافروا لغاية دلوقتي سريلانكا وجورجيا وتركيا. مصطفى شغال مهندس ورضوى محاسبة.