رحاب أحمد: تعمل ايه لما تروح جورجيا

من مصر إلى جورجيا
March 31, 2017

من أجمل الدول اللي ممكن تسافرها في أي وقت خلال السنة غير ان اجراءاتها سهلة جدا والبلد رخيصة لينا كمصريين. المقالة ديه فيها تجربتي الجميلة في أكثر من مدينة في جورجيا وهرشح فيها أهم الأماكن اللي ممكن زوروها.

مجرد ما تنزل البلد دي هتحس كدة انك دخلت فيلم تاريخي..المباني والبيوت ومعمارها حاجة كدة شياكة من معمار زمان. والشوارع والناس لوحدها كفاية تحسسك بالراحة النفسية. جورجيا من دول شرق اوروبا من الشمال روسيا ومن الغرب تركيا.

سياحة جورجيا

خلينا نبدأ بالمدن هناك:

١- Tbilisi العاصمة

انا قعدت اسبوع كامل فيها لان باقي المدن ممكن تتراح يوم واحد رايح جاي ومش متعبة. كنت برجع اقضيها لف بليل في تبليسي لغاية الصبح من جمالها. أهم الأماكن اللي ممكن تشوفها هنا:

  1. Mother of Georgia (بتشوفوا التمثال من أي مكان في العاصمة لأنه موجود في أعلى قمة في المدينة.)
  2. Old tbilisi – (التلفريك)
  3. مسجد Jummah
  4. Secret waterfall
  5. Sulfur Baths
  6. Melekti Cathedral
  7. Mount Mtatsminda
  8. The bridge of peace
  9. Narikala fortress
  10. Tsminda sameba church
  11. Mtatsminda Amusement park (تاخدوا القطر هناك هيطلع بيكم على حديقة .National Botanical park
  12. في لعبة بقى اسمها 13th floor زي horror house عندنا شوية رعب بقي لازم تجربوها موجودة في شارع شاردن

تيبليسي جورجيا

٢-Guduari

دي فيها الثلج بقي ومنتجع للتزحلق Guduari Ski resort. ثلج ولعب للصبح، ممكن تركبوا هناك snowmobile وسعره ٥٠ لاري.

*اقرأ/ي أيضاً: السفر لجورجيا خطوة بخطوة

وتقدروا تعملوا Parasailing ودي بالنسبالي كانت احلى فعلاً. تجربة جمدوا قلبكوا وانطلقوا. سعره كان ٢٥٠ لاري انا نزلت معاه وركبتوا ب ٢٠٠ لاري.

٣- Kazbegi

وديه مدينة جبال القوقاز، أعلى قمة في جورجيا. الجبال طول الشتاء متغطية بالثلج عشان تطلع فوق بتاخد عربية دفع رباعي

ب ٥٠ لاري بيطلعك لجزء من الجبل والباقي تطلعوا ماشي. هتشوفوا فوق جورجيا كلها وفي كنيسة انانوري فوق أعلى تلة هناك تقدروا تزورها. دي هتبقي تجربة مش هتتنسي حاجة خيال

فيزا جورجيا

٤- Borjomi

تقدروا تروحوا فيها Mineral water park و Monument to Prometheus

غير Vardzia وهي مغارة على جبل في كهف حاجة كدة ميكس من الاتنين. وفي الآخر شوفوا منظر رائع من Rabati castle.

٥- Kutaisi

بسبب الوقت اللي روحت فيه كان في أماكن كتير قافلة، دول أهم الأماكن اللي روحتها:

Prometheus cave

Gelatin Monastery

David Agmashenebeli Square

٦- Mtskheta

مدينة هادية جدا وفيها كنائس وقلاع مختلفة. هناك زورت كنيستين وهما: Jvari church و Samtavro church

بالنسبة لباتومي وهي مدينة مشهورة هناك انا مروحتهاش عشان الوقت ماساعدنيش وهي مدينة صيفية اكتر.

طيران جورجيا

نيجي بقي للمهم، الإجراءات وازاي تروح هناك:

الفيزا

مفيش اسهل منها، اونلاين بصورة شخصية وصورة الباسبور على الموقع وشكراً كدة. في خلال خمس ايام بالظبط هتكون جاهزة وسعرها ٢٠$ بس.

أهم حاجة تتأكد وأنت مسافر تاخد معاك حجز الفندق والطيران وخطة للرحلة وتأمين وكشف حساب. في الغالب محدش هيطلبهم في المطار بس ده اللي مكتوب على الموقع.

الطيران

معظم الطيران في ترانزيت في تركيا ونظراً للجدل على التصريح الأمني هحتاجه لا مش هحتاجه، ريحت دماغي وحجزت على Aircairo من الغردقة طيران مباشر على جورجيا وارخص كتيير. وممكن تحجزوا على Flydubai من اسكندرية بس دي فيها ترانزيت في دبي.

الإقامة

مفيش أكتر من الهوستيلز في البلد دي. ادخلوا علي HostelWorld واختاروا الهوستيل المناسب. اسعارهم كلها تبدأ من ٨ لاري لغاية ١٥ لاري.

الأكل

الاكل الحلال موجود كله في تبليسي في شارع Merjanshevili هتلاقوا مطاعم تركي وعراقي وايراني كتيرر واحلاهم التركي.

اشهر اكله هناك الخاتشبوري زي فطيرة بالجنة أو البطاطس وممكن لحوم مش بتكون لحوم حلال طبعا فجربوا الجبنة فظيعة. أشهر مشروب ليمونادا.

الشوبينج

موجود كله في Merjanshevili و Rustaveli مناطق في العاصمة تبليسي وفي Tbilisi Mall

العملة

الدولار هناك بيساوي ٢.٥٠ لاري. غيروا ٢٠ او ١٠ دولار من المطار بس وبعد كدة مفيش اكتر من الصرافات برا وجمب بعض وفي المترو صرافة بيكون سعرها عالي،

المواصلات

لما تطلعوا من المطار في اتوبيس رقمه ٣٧ ده بنص لاري هيوصلكم لغاية Merjanshevili. المواصلات عموماً رخيصة جدا هناك. الاتوبيس بنص لاري والمترو لاري والتلفريك 2 لاري.

عشان تتنقل من مدينة لمدينة انا كنت مأجرة عربية ارخص واريح كتير واتفقوا معاه ياخدكوا المطار من ضمن التكلفة.

سافروا جورجيا لانكم هتتبسطوا جدا وهترجعوا عندكوا طاقة إيجابية فظيعة. لو عايز تعرف أكثر عن ازاي تطلع الفيزا ادخل هنا. ولو عايز تعرف ازاي تسافر هناك بأقل التكاليف شوف المقالة ديه.

رحاب أحمد
رحاب أحمد
رحالة مصرية