ازاي تحضر شنطة صغيرة خفيفة لرحلة ١٠ أيام في اوروبا (في الصيف)

تحضير شنطة سفر
April 3, 2017

مازلت بستغرب لغاية دلوقتي الناس اللي بتاخد معاها شنطة كبيرة مليانة هدوم وجزم واكسسوارات مالهاش لازمة لسفرية مش هتعدي ١٠-١٥ يوم بالكتير. بالذات لو رايح اوروبا وهتستخدم فيزا شينجن إستخدام كامل وهتستغل فرصة انك تقدر تدخل ٢٦ بلد مختلفة لأن كل ما البلاد تكتر موضوع الشنط بيبقى أرخم ومتعب أكثر في انك تفضل ماشي بشنط كتير في المطار وتتنقل من مكان لمكان.

عشان كدة الحل المثالي بالنسبالي هو شنطة واحدة carry-on أو شنطة Backpack فيها اللي أنا محتاجه وبس وبرتبها بطريقة بسيطة تسمحلي اخذ كل اللي محتاجه في نفس الوقت.

أول حاجة محتاجها هي انك تعرف هتعمل إيه هناك

يعني المدن اللى هتروحها النشاطات اللي هتعملها فيها عاملة ازاي. هتطلع جبال ولا هتقضيها تمشية ولا خروجات وسهر  وحفلات ولا كل الحاجات ديه. ده بيحدد الهدوم اللي هتخش الشنطة لأن عشان الشنطة تكفي، أي حاجة مش محتاجها مش هتاخدها. بعد ما تعرف أنت هتعمل أيه هناك هتخش على الخطوة اللي بعدها.

شنطة سفر

ورقة فيها كل اللي انت محتاجه

أنا عارف أن الأسهل انك تبتدي تحط حاجاتك كلها وتشوف بعد كدة إيه اللي أنت شايفه ناقص، بس الطريقة ديه بتمنع إمكانية أنك تنسى أي حاجة انت محتاجها وفي نفس الوقت بتخليك ما تاخدش غير اللي انت محتاجه. بالنسبالي الورقة ديه بيبقى مكتوب فيها الآتي:

تيشيرتات نص كم للخروجات اليومية العادية

قميصين للسهر والحفلات

ملابس داخلية

شرابات

فوطة

شورطين

بنطلون جينز

جاكت خفيف

شنطة ظهر صغيرة

شاحن

فرشة سنان ومعجون

كريم أو جيل

قفل

باور بانك

طبعاً القائمة ديه بتختلف على حسب الوقت اللي بتكون مسافر فيه وعلى حسب الجو هيبقى عامل ازاي لكن ديه القائمة اللي بمشي عليها لو مسافر اوروبا في شهور الصيف.

أفضل طريقة لتحضير شنطة سفر اوروبا

لف اللبس ما تطبقهوش

ديه أحسن طريقة توفر بيها مكان في الشنطة بسهولة وبتقلل من كرمشة الهدوم. بالذات في أنواع اللبس اللي بتاخد مساحة كبيرة زي بنطلونات الجينز.

بالإضافة للف الهدوم، حاول تستغل كل جزمة او جيب بنطلون عشان تحط فيهم حاجات مش لاقيلها مكان، زي الحزام مثلاً في الجزم وفرشة السنان والمعجون في جيب البنطلون. الفيديو ده بيشرحلك أكتر ازاي تقدر تلف هدومك في الشنطة وتستغل كل جزء فاضي:

لو هتسافر ومعنكش وقت تشتري الحاجات اللي محتاجها ادخل على Yaoota.com، أول محرك بحث إلكتروني للتسوق في مصر.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.