نور العدوي: ١٢ يوم في آسيا ب٢٩٥ دولار

أماكن سياحية تايلاند
April 6, 2017

رحلتي كانت كالآتي: (القاهرة/بانكوك/بوكيت/كوالالمبور/القاهرة). هتكلم في المقالة عن أهم الأماكن اللي زورتها وفيزا تايلاند وحجز الطيران الرخيص اللي عملته عشان اروح هنا.

ازاي تطلع فيزا تايلاند

هبدأ بالورق المطلوب لفيزا تايلاند ومبدئياً تايلاند مالهاش تصريح أمني والأوراق المطلوبة حالياً هي:

-باسبور ساري

-صورة شخصية ٤ × ٦ خلفية بيضاء حديثة

-كشف حساب بنكي لآخر ثلاث شهور لا يقل عن ١٠ آلاف جنيه مصري

-Hr letter موجه للسفارة التايلاندية أو سجل تجاري مترجم او لو طالب شهادة إثبات قيد مترجم

-حجز طيران مبدأي

-حجز فندق مبدأي

-أبلكيشن السفارة وبتملاها اونلاين وتطبعها من على موقع السفارة

-٧٠٠ جنيه سعر الفيزا

الفيزا بتطلع خلال ٤٨ ساعه ومفيش رفض واللي على الشباك بيستلم منك الورق هيقولك لو في أي حاجة ناقصة .

مناظر سياحية تايلاند

حجز الطيران

انا حجزت مصر للطيران (القاهرة/بانكوك/القاهرة) كان سعرها كويس جداً لانها دايركت كانت فارقة عن الترانزيت حوالي ٥٠ دولار

أما بخصوص الطيران الداخلي فاحجزوه من هنا قبل ما تمشوا و ياريت ميكونش معاكوا وزن أكثر من سبعة كيلو.

خلصنا الورق و حجزنا الطيران و قفلنا الشنط يبقي يلا بينا ع المطار!

فيزا تايلاند

أول محطة بناكوك

الرحلة من القاهرة إلى بانكوك كانت ٨ ساعات و ٣٠ دقيقة دايركت.

لما توصل مطار بانكوك و تخلص اوراقك اطلع الدور الأخير لو هتركب تاكسي بيكون أرخص وفي ابلكيشن اسمه Grab.

*اقرأ/ي أيضاً | تاكل ايه لما تروح تايلاند

العملة بتاعتهم اسمها بات THB أعلى سعر صرف للدولار هناك ٣٤.٨٠ و أقل سعر ٣٣ ونصيحة غيروا من المطار ٣٠ دولار بس وماتشتروش خط تليفون من هناك هتلاقوه أرخص في Seven Eleven وده عبارة عن سوبر ماركت منتشر بشدة هناك لدرجة أن بين كل محل ومحل في محل بينهم.

فيزا تايلاند

من وجهة نظري الشخصية بانكوك أقصى مدة للإقامة فيها ٤٨ ساعة. ديه أهم الحاجات اللي عملتها:

  • أشهر الشوارع هناك Sukhumvit وهناك في مطاعم عربية كتير وأكل حلال
  • شارع Khao san Road و ده Nightlife.
  • المعابد هناك Wat pho تذكرته ب ١٠٠ THB المعبد جميل جداً و ممتع.
  • معبد اسمه Grand palace انا بصراحه مروحتهوش كان ب ٥٠٠ THB بس واضح انه رهيب
  • معبد تاني اسمه Wat Arun سعر التذكرة ٥٠ THB بس من رأيي بصراحة لا يستحق الزيارة
  • رحلة نهرية و دي مختلفة عن ال Floating Market خلوا بالكوا.

بوكيت وجمال بوكيت

أما بوكيت بقى فديه الدلع كله والبحر والبلبطة. حبيت بوكيت جداً ورحلتي هناك كانت ممتعة لأقصى درجة. فيها أنشطة كتيرة اوي أشهرها الرحلات البحرية زي Phi phi island و James Bond island.

جزيرة بوكيت سياحة

وفي ركوب أفيال و Rafting و Zip lining وحاجات كتير جدا ومن وجهة نظري الشخصية بوكيت محتاج تقعد فيها مش اقل من ٦ ايام. الحذاء الخاص بالبحر مهم جداً تلبسه في الرحلات البحرية في بوكيت.

بحر اسيا

*ملحوظة مهمة: اللي راجع تايلاند تاني وهو فيزته مش مالتي هيدفع في المطار ٢٠٠٠ THB عشان ياخد فيزا جديدة ومن وجهة نظري ده أرخص من الفيزا المالتي لانها دلوقتي بقت ب ٣٢٠٠ جنيه.

مواصلات تايلاند

رحلة قصيرة لكوالالمبور

أما عن ماليزيا ويا وعدي على كوالالمبور! جميلة جدا بس للاسف وقتي كان ضيق اوي فيها فمعرفتش أزور حاجات كتير. أعتقد في رأيّ تستحق انك تقعد فيها حوالي ٥ أيام فأكثر.

 اقرأ/ي أيضاً | ماليزيا…طيران وإقامة ومواصلات وفسح

فيزا ماليزيا للمصريين

الأماكن اللي انا زرتها واستمتعت فيها:

  • مرتفعات جنتنج
  • المعبد الصيني
  • كهف باتو
  • كهف الظلام
  • البرجين التوأم بتروناس
  • المنارة وهناك في أعلى المنارة غرفة زجاجية على ارتفاع ٤٢٠ متر تقريباً لأصحاب القلوب الجريئة اسمها Skybox.
  • ده غير كمان China town.

بإختصار كوالالمبور جميله جداً وهي كانت المحطة الأخيرة في رحلتي وفي اخر المغامرة ديه كانت كل مصاريفي الشخصية أثناء السفر ٢٩٥ دولار بس. نلتقي في المغامرة القادمة.

سياحة ماليزيا

لو عايز تشوف تجارب أكثر في ماليزيا ادخل هنا ولو مهتم بالسفر لآسيا عموماً شوف كل مقالتنا هنا.

Noor El-Adawy
Noor El-Adawy
طالبة في كلية حقوق جامعة القاهرة وبتشتغل كمساعدة لذوي الإجتياجات الخاصة في مدرسة دولية. نور بتحب الألعاب المائية المختلفة والقراءة والكتابة. في رحلتهل لإكتشاف العالم بتعشق انها تندمج مع ثقافات مختلفة وتعيش مغامرات جديدة