حسن عمرو: عن الأكل وتقاليده في اسبانيا

المطبخ الأسباني
April 30, 2017

مواعيد الأكل في اسبانيا مقدسة بمعنى الكلمة. بياكلوا ثلاث وجبات أساسية في اليوم. الساعة تسعة الصبح واتنين الظهر والساعة ١٠ بليل. مرة كنت بذاكر مع واحد والوقت سرقنا والساعة بقيت اتنين استأذني انه يمشي عشان لازم يروح ياكل مع إننا كنا في وسط المذاكرة بس بالنسبالهم ماينفعش يفوت معاد الاكل. الأسبان عموماً بياكلوا اكل كتير جداً وكلهم بيلقطوا في الأكل على مدار اليوم طول الوقت.

الأكلة الشعبية

أشهر أكلة في أسبانيا وشوفتها في كل حتة هي Paella ومكونتها عبارة عن رز وفاصوليا ولحمة أو فراخ أو أرانب وفاصوليا بيضاء. لكن فيه ثلاث أنواع للأكل ديه، Valencian Paella, Seafood Paella, Mixed Paella والثلاثة لازم يتجربوا عموماً. أصل الأكلة ديه جه من مدينة فالينسيا ويعتبر الطبق الرئيسي في أسبانيا والأكلة الشعبية في البلد.

أكل اسباني مشهور

الصورة: theroaminggastrognome.com

سي فوود وTapas

من الأكلات المشهورة اللي هتاخد بالك منها كتير هي الTapas، ديه جزء أساسي من ثقافة اسبانيا. الTapas هي مقبلات خفيفة وبسيطة تقدر تاكلها تصبيرة قبل الوجبة الرئيسية أو لو هتقابل حد في مكان لفترة قليلة. المقبلات نفسها ممكن تكون معمولة من أي حاجة ممكن تتخيلها لكن بأحجام صغيرة وكتير منها بيبقى سي فوود.

تاباس اسبانيا

الصورة: purespain.com

أكلات السي فوود مميزة جداً في اسبانيا بس مش رخيصة. لازم تجرب تشتري سندوتشات الكاليماري لأنها أساسية في محلات كتير. أشهر أكلة ممكن تاكلها كمقبلات هي Patatas Bravas، مش حاجة رهيبة هي عبارة عن بطاطس عليها صوص بس طعمها رائع وتعتبر حاجة لذيذة تسخن بيها وتاكلها كأكلة سريعة. برضه اخدت بالي قد أيه الفراخ المشوية طعمها مش طبيعي هناك.

أكلات مشهورة تجربها

في أكلة كمان مشهورة اسمها Salchipapas وهي حاجة سهلة وأي حد يقدر يعملها بس المطاعم والمحلات بيعملوها حلو اوي. مكوناتها عبارة عن سوسيس على بطاطس محمرة وعليها مايونيز وكاتشب. بتلاقيها في الحفلات والمهرجانات وهي أكلة تعتبر ليها أصل ديني. هتاخد بالك من حاجة ليها علاقة بالأكل إسمها Juepincho وديه حاجة المدن في أسبانيا واخدينها من مدن إقليم الباسك زي سان سيباستيان وبلباو وهي انك تاكل Tapa وتشرب معاها حاجة بحوالي إتنين يورو. في زاراجوزا في منطقة كاملة للJuepincho، الناس بتروح تاكلها يوم الخميس.

المطبخ الأسباني

الصورة: Wikipedia

الفترة اللي كل حاجة بتقف فيها عشان الأكل

حاجة مهمة من الثقافة الأسبانية وليها علاقة بالأكل هي ال Siesta. لو مش عارف ايه ال Siesta فهي من الآخر تعسيلة صغيرة الأسبان بياخدوها من الساعة اتنين للساعة خامسة عشان يروحوا ياكلوا ويريحوا شوية بعد كدة يرجعوا للشغل. مفيش حاجة بتبقى فاتحة تقريباً غير مطاعم الأكل والمحلات اللي في الأماكن السياحية. حتى في بنوك بتقفل عادي في نص اليوم عشان الموظفين ياخدوا Siesta.

عادات اسبانيا

الصورة: independent.co.uk

لازم تاخد بالك ان اماكن كتير بتكون قافلة يوم الأحد في المدن الصغيرة ومن الأماكن ديه السوبر ماركت عشان لو عايز تشتري حاجات بسيطة تاكلها تكون عامل حسابك. لكن لو حصلك الموقف ده ومش عامل حسابك يبقى تسئل على أي سوبرماركت من بتوع الصينيين لأنهم موجودين في مدن كتير وبيفتحوا كل الأيام.

عموماً، الأكل في أسبانيا خرافي، ولازم تجرب أنواع مختلفة وتقضيها Tapas طول الوقت. الأسبان بياكلوا كتير جداً، وده بالنسبة لواحد بياكل أكل كتير زيّ جمبهم ولا حاجة.

 لو مهتم تعرف أكثر عن اسبانيا وعن تجربتي هناك شوف اخر مقالة ليا هنا عن اللي اتعلمته من العيشة هناك لأكثر من سنة

حسن عمرو
حسن عمرو
بيعشق اسبانيا والأسباني وحالياً بيدرس المجاستير بتاعه هناك في مدينة زاراجوزا. حسن قدر يعلم نفسه أسباني بطلاقة من غير أي دروس وفي نفس الوقت بيلعب Jiu Jitsu اللي من فنون القتال.