انترفيو سفر: يارا يحي، هزها وسافر

هزها وسافر
May 2, 2017

 

انترفيو سفر المرة ديه مع مقدمة برنامج هزها وسافر على اليوتيبو يارا يحي. حبينا اننا نتعرف أكثر على بدايات هزها وسافر من يارا ونعرف أكثر عن فيديوهاتهم الجديدة في شرق آسيا.

ايه اللي خلاكي تعملي أول فيديو عن السفر وكان ايه رد الفعل ساعتها؟

احنا كانت أكتر مشكلة بتواجهنا واحنا بنسافر هو الوقت اللي بنحتاجه قبل السفر في التحضير وياترى نعمل إيه هناك و هيعجبنا ولأ وهيتكلف كام ومحتاجين وقت قد إيه. ومكنش في اي مكان أو قناه بتعمل فيديوهات بالشكل ده بالعربي فاحنا قررنا نعمل فيديوهات علشان نوفر للناس وقت التحضير وكمان يشوفو هيعملو إيه هناك بعنيهم و يقرروا هيحبوه ولا لأ، وطبعاً ماتوقعناش أبداً الفيديوهات هتتشف بالشكل ده. كنا فاكرين إن أصحابنا بس هما اللي هيتفرجو عليها.

يارا يحي هزها وسافر

ايه الطرق اللي بتتبعيها عشان توفري فلوس وانتي مسافرة؟

إني أرتب للرحلة من بدري واحوش فلوس تذاكر الطيران لأن دي أكبر حاجة هتتدفع في السفرية و أعمل الحجز من بدري. كمان مش بقعد في فنادق غالية بقعد في هوستيلز أو عنابر سيدات وبوفر كمان في المواصلات والاكل من خلال اني مش باخد تاكسي ابداً ومش باكل في مطاعم.

هزها وسافر

ازاي عارفة تسافري بعد موضوع تعويم الجنيه وبعد ما كل حاجة بقت الضعف؟

هو فعلاً الموضوع بقى صعب أوي بس لسه أكبر حاجة هي ثمن تذكرة الطيران والباقي مقدور عليه والتعويم قلل من طريقة سفرنا درجة فبقينا حالياً نلجأ لل dorms مثلاً بدل ال-hostel وال hitch-hiking بدل المواصلات وكدة.

هزها وسافر اوروبا

الموسم الثاني من هزها وسافر مختلف وبيناقش مواضيع مهمة في السفر، هل في مواضيع معينة عايزة تساعدي الناس فيها؟

في الموسم التاني احنا بنحاول نغطي كل حاجة لها علاقة بالسفر من أول الترتيب والحجز إلى الفيزا و ايه يتعمل في البلد للأخطاء والمشاكل اللي بتواجهنا و كمان هنتعرف أكثر على شعوب البلاد اللي بنسافرها. يعني بنحاول نلم كل حاجة وانشالله هيكون في خمس بلاد جداد في شرق آسيا.

هزها وسافر آسيا

بعد فيديو السفر للبنات اللي شجع بنات كتير على السفر، ايه أفضل نصيحة توجهيها للبنات اللي عايزين يبدأوا سفر؟

أهم حاجة عايزة أقولها ليهم انهم ميخافوش و ميترددوش  وانهم لازم يعتمدوا على نفسهم لأن دي حاجة هتفرق جداً في تكوين شخصيتهم.

ايه مشاريع السفر الجديدة اللي شغالة عليها؟

احنا دلوقتي في جنوب شرق اسيا في رحلة لمدة ثلاث شهور هنغطي فيها خمس دول مختلفة ونزلنا حلقات عن الفلبين وسنغافورة.

تابعوا هزها وسافر من خلال صفحتهم هنا أو شوفوا فيديوهاتهم على اليوتيوب هنا.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.