محمد عبدالرحمن: ١٧ يوم في المغرب

موسيقى المغربالرباط
May 5, 2017

وانا في مطار كوالالمبور مستني الطيارة اللي هتوديني على دبي ومنها إلى القاهرة كنت بفكر: الرحلة الجاية هتكون فين؟ مكنتش متردد ولا الاجابة احتاجت تفكير طويل…قلت لنفسي انا رحت آسيا وأوروبا وعايز اروح قارة جديدة وأماكن جديدة، الإجابة ببساطة كانت افريقيا.

بعد الاستقرار على القارة..الوقت جيه عشان احارب على اجازة طويلة في الشغل وعرفت اخد اجازة اسبوعين ودورت على تذاكر طيران من يوم الخميس بليل للحد اللي بعد ١٧ يوم الصبح، رحلة لمدة ١٧ يوم في افريقيا، وكنت وقتها بفاضل بين كينيا وتنزانيا وتونس والمغرب.

بعدها قررت تونس والمغرب، قدمت على فيزا تونس، ولسبب ما، لسة معرفوش اخدت رفض 😀

فيزا المغرب من مصر

شفشاون

بعدها قدمت على فيزا المغرب وده الورق المطلوب للفيزا:

١-Hr Letter

٢- كشف حساب لاخر ٣ شهور

٣- حجز فندق مبدئي

٤- حجز طيران مبدئي

٥- تأمين سفر شامل المدة اللي انت هتسافرها

٦- صورتين بخلفية بيضا مختلفين عن الصورة الموجودة في الباسبور

واخدتها بسهولة وقررت اقضي ال١٧ يوم في المغرب، الِف فيها من جنوبها مرورا بوسطها واختم بالشمال.

معمار مراكش

مراكش

اللهجة المغربية

بدأت ابعت لمغاربة على كاوتش سيرفنج وعملت صداقات مع مغاربة قبل سفري بثلاث أسابيع، وعرفت اني هقابل مشكلة وحيدة ،ألا وهي، اللهجة لأنها مختلفة تماما عن أي لهجة عربية واللهجة المغربية مختلفة من مدينة لمدينة فابتديت اتعلم من على يوتيوب كلمات مغربية واساسيات اللهجة عشان اقدر اتحرك بشكل أسرع في المغرب وابقى أقرب للمغاربة والثقافة المغربية.

زيارة مكناس المغرب

مكناس

التجهيز للسفر والهوستيل

كانت خطتي كالتالي: كازابلانكا – الرباط – مراكش – اوريكا – مكناس – افران – فاس – شفشاون – تطوان – طنجة

لقيت تذاكر طيران على المغربية ب٤٢٠٠ جنيه ولقيت الهوستيلز رخيصة في كل المدن اللي هزورها باستثناء الرباط وكازا، المهم وصلت لكازابلانكا ودورت على هوستيل ولقيت هوستيل رخيص ودي كانت اول مرة اسافر وانا مش محدد هقعد فين بس اكتشفت ان الاسعار الموجودة على بوكينج ممكن تلاقي ارخص منها بكتير لو دورت على رجلك بنفسك في المدينة اللي هتزورها.

*اقرأ/ي أيضاً | دليلك الكامل للسفر لتونس

المهم عشان في تفاصيل كتيرة اوي ممكن اكتبها عن كل مدينة زرتها من ال١١ مدينة اللي زرتهم والناس الكتيرة اوي اللي قابلتها في رحلتي، فانا هكتب ٣ مقالات تانيين واحدة عن مدن الشمال اللي زرتها والتانية عن مدن الوسط والاخيرة عن مدن الجنوب وفي المقالة دي هكتب ملاحظات عن تجربتي في المغرب عموماً.

سياحة مكناس

مكناس

ملاحظات سريعة عن المغرب:

١- انا زرت أكثر من بلد في أوروبا وآسيا بس المغرب اجمل بلد زرتها لغاية دلوقتي وده بسبب التنوع الكبير اللي مش موجود في اي بلد زرتها قبل كده ولقيته في المغرب.

٢- المغاربة اطيب واجدع واكتر شعب مضياف شفته بجد، ٣ مغاربة استضافوني في بيتهم في تطوان ومكناس وفاس، عرب وامازيغ ناس طيبين وروحهم جميلة واللي عايز يعرف معنى كلمة الكرم يروح المغرب.

مدينة الرباط المغرب

الرباط

٣- اللهجة المغربية او زي ما بيسموها (الدارجة) مش صعبة، انا اتعلمت الاساسيات قبل ما اسافر. بعد ما سافرت عانيت اول يومين عشان عقلي كان عقبال ما يترجم الكلام من المغربية للمصرية كان بياخد وقت 😀 بعد كدة بقت سهلة بالنسبالي اني افهمها، لهجة جميلة جدا. فيها مفردات عجبتني جدا مثلا لو حد سألك انت اتولدت فين؟ في المغرب بيقولوا بدل اتولدت (اتخلقت) وبيستخدموا كلمة بصير بدل أعمى.

٤- تمشي من مدينة لمدينة مسافة ٥٠ كيلو بس تحس انك رحت دولة مختلفة!

على سبيل المثال من مكناس المدينة القديمة الرائعة لمدينة افران سويسرا المغرب لفاس المدينة القديمة اللي مختلفة عن مكناس تماما! الدارجة كمان مختلفة من مدينة لمدينة.

فيزا المغرب

كاسا

٥- بلدين زرتهم وحسيت ان البلد والحكومة بتعمل كل اللي تقدر عليه عشان السائح يتبسط ويرجع تاني للبلد المغرب وتايلاند.

٦- الدنيا منظمة في المغرب بالنسبة للمواصلات، فمثلا التاكسي عندهم نوعين:

تاكسي كبير وده بيكون خط سيره من مدينة لمدينة وبيكون ليه محطات اسمها المحطة الطرقية ودي زي موقف الاتوبيس بتاخد منها التاكسي وبيكون عربية مرسيدس قديمة وبيشتغل بالنفر لما يكمل ٦ أشخاص بيتحرك، اما داخل المدينة فموجود تاكسي صغير وده خط سيره بيكون داخل المدينة بس وبتحاسب بالعداد.

عموما المغرب فيها شبكة مواصلات كويسة جدا وتقدر تروح كل المدن عن طريق القطار او الباص.

٧- الاكل المغربي رهيب رهيب رهيب! اعملوا حسابكم انكوا هترجعوا مصر زايدين في الوزن بسبب الاكل هناك

الشعب المغربي

مكناس

٨- انا قابلت في ال١٧ يوم اكتر من ٤٠ مغربي اغلبهم عرفتهم من Couch Surfing واحتكيت بالمغاربة في المواصلات وفي جولاتي بكل مدينة، اقدر اقول بكل ثقة ان اغلب المغاربة بيحبوا مصر جدا، كان احساس جميل جدا اني اصحى من النوم في شفشاون أو كازابلانكا وانزل ادور على مكان افطر فيه اسمع في الطريق وانا ماشي ام كلثوم.

على فكرة عادل إمام ليه شعبية رهيبة جدا في المغرب وناس كتير قابلتهم حافظين افيهات الافلام بتاعته 😀

٩- لما كنت بتوه في مكان وأسأل الناس على الطريق فيسالوني انت منين اقولهم انا من مصر، مش هقولكم كمية المحبة اللي كنت بشوفها في عيون المغاربة قبل ما اسمع منهم ان شاء الله مصر ترجع زي الاول.

الشعب المغربي شعب طيب ومعندوش أحقاد على أي شعوب تانية وبيتمنو الخير للكل ومحبين لكل الشعوب مش المصريين بس، المغرب بصراحة جميلة بشعبها.

١٠- المغرب على عكس اغلب الدول اللي زرتها قبل كدة الواقع احسن من الصور مليون مرة، انا بصراحة خصوصا في آسيا كنت بشوف صور وهمية اماكن كتير ولما اروح اتصدم أن الواقع مش حلو زي الصور عكس المغرب بصراحة الطبيعة اللي شفتها في المغرب طبيعة مشفتهاش في أي مكان زرته قبل كدة.

شلالات أوزود المغرب

شلالات أوزود

١١- المغرب بلد رخيصة سياحيا، الهوستيلز هناك رخيصة، المواصلات معقولة، الاكل رخيص والطيران كمان مش غالي، فلو بتدور على تجربة جديدة انصحك جدا بالمغرب بس اتعلم الدارجة شوية قبل ما تسافر، من ٣٠ – ٤٠ دولار يكفوك يوميا إقامة واكل فسح

١٢- المغرب دولة مش كبيرة من حيث المساحة بس فيها اكتر من ٩ أو ١٠ مدن يستحقوا الزيارة فحاول تزورها اقل حاجة ١٠ ايام ومتقعدش كتير في كازا والرباط.

١٣-سفارة المغرب من أكثر السفارات المحترمة اللي اتعاملت معاها لانهم مش بياخدوا منك تمن الفيزا الا لو خدتها، انت بتقدم ورقك ومش بتدفع حاجة لو خدت الفيزا بتدفع تمنها لو مخدتهاش بتاخد باسبورك ومبتدفعش حاجة.

١٤- مرة تانية اتعلم بعض الكلمات من اللهجة المغربية (الدارجة) قبل سفرك عشان تجربتك تكون ممتعة وتحتك بالمغاربة بشكل افضل وتقدر تفهم ثقافتهم وأسلوب حياتهم ودي متعة السفر الحقيقية.

فنادق رباط

رباط

١٥- الموسيقى الأمازيغية روعة.

١٦- الجميل في المغرب أن الطبيعة منوعة هناك، يعني عايز جبال هتلاقي جبال، عايز شلالات هتلاقي، بحيرات، لاندسكيب، والاجمل ان كل مدينة ليها طابع خاص بيها في المعمار، يعني شفشاون مدينة كل مبانيها وبيوتها وحتى عمدان النور باللون الازرق، مراكش المدينة الحمراء، كازا المدينة البيضاء. انا عيني استمتعت بالالوان اللي انا شفتها في ال١٧ يوم دول.

*اقرأ/ي أيضاً | ليه المصريين لازم يسافروا الجزائر

١٧- اخيرا، متحكمش على مكان قبل ما تزوره، انا مكنتش مقتنع مثلا بماليزيا انها جميلة قبل ما ازورها ولما زرتها حبيتها جدا جدا، كل واحد فينا عينه بتشوف الجمال بشكل مختلف وعنده معايير معينة للجمال، اللي بالنسباله الجمال في الشواطئ الجميلة واللي بيحب الجبال واللي بيحب ال nightlife مش شرط المعايير دي تتطابق معاك، سافر وشوف الجمال بعينك انت بس، كمان متحكمش على شعب قبل ما تتعامل معاه. ال stereotypes دي اغبى حاجة ممكن الواحد يصدقها، انا بحب دايما الناس اللي بتستخدم جملة “انا شفت” مش بيقولوا وبس.

المدينة الزرقاء شيفشاون

شفشاون

الناس اللي بيحبوا يقابلوا locals في كل بلد بيسافروها والناس اللي عايزة تتعلم من السفر زي حالاتي، اللي بالنسبالها السفر وسيلة انها تعرف ثقافات، أسلوب حياة وعادات وتقاليد مختلفة وتتحط في مواقف صعبة وتقدر تتخطاها. وتتحدي نفسها وتوظف خبرتها اللي خدتها عن طريق السفر عشان تخليها افضل في حياتها بعد ما ترجع من السفر، انصحكم بزيارة دول مختلفة في قارات مختلفة وخلي عينك تشوف اماكن مختلفة وودنك تسمع لقصص جديدة واستمتع بجمال واختلاف البشر والعالم.

فيزا المغرب

مكناس

لو عجبتك المقالة ديه ابعتها لحد تعرفه نفسه يسافر بلد رخيصة وفيزتها سهلة!

محمد عبدالرحمن
محمد عبدالرحمن
مهتم بمجال السوشيال ميديا وكرة القدم، بيحب الطبيعة وفن العمارة الروسي، بيستمتع في كل رحلة بالاختلافات بين البشر وحلمه انه يلف كل بلاد العالم.