محمد أبو بكر: ٦ أسباب يخلوك تسافر لوحدك

سافر لوحدك
May 9, 2017

السفر لوحدك أو الـ Solo Traveling له عيوب طبعاً زي انك بتبقى من اسمه فرداني مع نفسك طول الوقت ولو اتعرفت على حد جديد مبتلحقش تعمر معاه يومين على بعض وهوب تلاقي نفسك تاني يوم في بلد تانيه او يكون الشخص اللي انت اتعرفت عليه هو اللي سافر بلد تانية تاني يوم. وانك ممكن تقعد في المواصلات فترة بتاع ٤ ساعات ما بتتكلمش مع حد ده غير انك لازم عينك تبقى في راسك ومفتح علشان حاجتك ما تتسرقش.

*اقرأ/ي أيضاً | ٥ نصائح مهم تعرفهم لو هتسافر لوحدك

مثلاً مرة كنت في فينيس وواحد طلبت منه يصورني وبعد ما صورني لاقيته بيتفرج عالكاميرا وبيسأل على موديلها و الكاميرة طولت في ايده و ما كان مني غير اني شبه الزق له واوريله الكاميرا وهي في أيدي خوفا من انه ياخدها ويجري لاني شكيت فيه جدا وفي الاخر طلع فعلا مش حرامي بس كان رخم ودي المشكله التانيه اللي هتقابلك كشخص مسافر لوحده  انك فين وفين اما تلاقي حد بيعرف يصور لأن حط في اعتبارك تفضي اكبر ميموري عندك سواء موبايل او كاميرا لان نص الميموري او تلتها هتطلع صور غريبة وعجيبة.

اتقفلتوا من الـ Solo Traveling خلاص؟

طيب تعالوا بقى احكيلكوا ليه السفر لوحدك حلو برضوا ويستحق واليكم التالي:

١- في السفر لوحدك انت مش مضطر ترتب مع حد او تتربط بحد زيك زي اللي بيرتب لخروجة ويوعدك انه هنخرج في الويك اند وهوب في آخر لحظة يقولك سوري حصلتلي ظروف مش هقدر اسافر معاك او الفلوس قصرت معايا او عليا التزامات الخ الخ الخ.

٢- في السفر نفسه وانت لوحدك انت مش هتبقى مربوط بحد معين يكسلك انك تروح البلد دي او يقولك مش هنلحق أو يأخرك عن خطه معينه أو يلهوجك ولا هتبقى خايف انك تتوه من جروب أو أصحاب انت بالفعل لو تهت فهتبقى لوحدك اصلا اذن مفيش ما يعوقك ووقت ما تضرب في دماغك تسافر البلد دي تسافرها طوالي وتغير في خطتك أو تطول في مدة إقامتك في مدينة ما عن مدينة تانية كنت مخططلها أو تحذف بلد ما من خريطتك و تستبدلها ببلد تانية.

٣- في الصولو ترافلينج انت غير انك بتقوي لغتك جامد لانك مجبر ما تتكلمش بلغتك الأم لأن مفيش صحاب تتكلم معاهم عربي انت كمان عندك فرصة أكبر انك تعرف ناس جديدة ومن بلاد مختلفة تلافياً للعيب اللي قلنا عليه انك تقعد فترة طويلة مسافر لوحدك ساكت زهقان.

ومنها تتعرف على ثقافات جديدة ونظرة مختلفة للناس ليك وازاي بيتعاملوا معاك وتنسى بقى المعلومات اللي بتسمعها من الميديا عن البلد دي او الشعب ده.

٤- في السفر لوحدك انت بتشيل مسئولية نفسك يعني اي قرار لو فيه مخاطرة واحدة عليك فأنت بتاخده وانت مقتنع بيه مفيش حد هيندمك ويقعد يقولك انت ايه اللي عملته ده او ورطتنا أو مشتنا في السكة أو الطريق ده..وعليه، السفر لوحدك بيقوي قلبك ويخليك جرئ اكثر واحيانا مجازف وبتعتمد على نفسك.

٥- في السفر لوحدك انت بتكتشف ذاتك وماهية نفسك هل انت منافق مثلاً ولا ليك مبادئك المرتبط بيها. ناس كتير لما بتسافر ممكن تقول ما اجرب أو اعمل حاجة مابعملهاش في بلدي في وسط أهلي واللي انا بقوله انك انت طبعا حر في كامل تصرفاتك لأنك ببساطة أنت رقيب نفسك قصاد ربنا ومن هنا هتكتشف ذاتك و تعرف نفسك. 

٦- جربت تتوه قبل كده وتمشي في حتة مقطوعة و تصر انك عايز تكمل بالرغم انك مش عارف اخرة الطريق ده ايه؟ هو ده السفر لوحدك. متع نفسك بنفسك و متستناش حد، اعتمد على نفسك وخد المجازفة و زي ما واحد حكيم قالها في يوم العالم زي الكتاب لو فضلت في مكان واحد طول حياتك فأنت ما قريتش من الكتاب ده غير صفحة واحدة بس.

مصري سافر

لو سافرت لوحدك قبل كدة قولنا تجربتك على اللينك ده وهنساعدك تنشرها. وشوف مقالتنا عن ازاي تتعرف على ناس وانت مسافر لوحدك

محمد أبو بكر
محمد أبو بكر
محمد بيحب السفر ببساطة لانه تنفيس عن الشخص و بيكتشف فيه حقيقة نفسه وحقيقة الشعوب التانية من غير حواجز الميديا او وسطاء