انترفيو سفر: سفرني – ازاي تخلي الأطفال يكتشفوا العالم؟

Safarni workshopsالصورة: سفرني
May 16, 2017

أول مرة اتعرفنا على سفرني كانت بالصدفة البحتة لما كنا بنفكر في أسامي لموقعنا قبل ما نستقر على مشروع سفر! كنا مذهولين بصراحة من وجود فكرة لطيفة جداً زي سفرني اللي ببساطة بتساعد الأطفال اللي ما يقدروش يسافروا برة مصر انهم يكتشفوا بلاد العالم كلها ويتعرفوا على ثقافات جديدة من خلال ورش عمل تفاعلية وتعليمية.

*اقرأ/ي أيضاً | انترفيو سفر: يارا يحي، هزها وسافر

الأطفال بيبقى عندهم الفرصة انهم يقابلوا أجانب من البلاد اللي بيتعلموا عنها وبيتم ربطهم بالبلاد ديه عن طريق الالعاب والرقص والمشاركة بطريقة تساعد الأطفال دول انهم يشوفوا العالم بطريقة تانية ويحسن من مستواهم الثقافي.

مبادرة سفرني

الصورة: سفرني

اتعرفنا على مؤسسة ومديرة المبادرة، رفايل عاياش اللي من فرنسا في الأساس لكن عايشة في مصر، وساعدتنا في أننا نغذي فضولنا ونعرف أكثر عنكم وبداية الفكرة الجميلة ديه وازاي ناويين يطوروا من نفسهم.

-كمؤسسة للمبادرة، كلمينا عن المبادرة والخدمات اللي بتقدموها؟

سفرني هي مبادرة بتوفر ورش عمل متعددة الثقافات للأطفال اللي ماعندهمش فرصة للتعرض للتنوع. منهجنا بيشمل ٨ أيام محاكاة لمغامرة سفر حول العالم. في خلال الثمانية أيام دول، الأطفال اللي عمرهم ما سافروا قبل كدة ومش بيقابلوا أجانب كتير وعندهم معلومات بسيطة عن الجغرافية بيكتشفوا وبيتواصلوا مع ثقافات العالم المختلفة.

مؤسس سفرني

الصورة: سفرني

– إمتى بدأت مبادرة سفرني؟

بدأنا كمبادرة في ٢٠١٢ ضمن فعاليات Artellewa  في منطقة أرض اللواء.

– بما انك مش مصرية، قد ايه كان صعب عليكي انك تبدأي مبادرة زي سفرني؟

ماظنش ان كوني أجنبية خلى الموضوع أصعب. أنا بتكلم عربي مصري وفي كل مكان كنا بنروحه كسفرني بنكون فريق مكون من مصريين وبنشتغل مع منظمات غير حكومية ومراكز اجتماعية معروفة.

– ازاي بتعرفوا توفروا التمويل الكافي لسفرني

بصعوبة طبعاً! ديه من أكبر التحديات اللي بتواجهنا، لأن منظمات غير حكومية كتير ماعندهمش التمويل الكافي لتغطية نفقات ورش العمل، عشان كدة بنحاول نعمل اللي نقدر عليه عشان نوفر التمويل اللي محتاجينه من خلال المؤسسات الثقافية والشركات اللي بتوفر دعم عن طريق المسئولية الإجتماعية وعن طريق المتبرعين.

سفرني

الصورة: سفرني

-احكيلنا عن فريق العمل، هل فيه ناس من الفريق بيشتغل في سفرني Full-time ولا بتعتمدوا على المتطوعين.

سفرني فيها نوعين من الموظفين. فيه فريق عمل رئيسي بيشمل منسق، مدير البرنامج ومدربين، وفي نفس الوقت مانقدرش نستغنى عن المتطوعين اللي بيساعدونا نحقق فكرتنا وأهدافنا على أرض الواقع. سبب نجاح الفكرة في الأساس هو تفاني عدد كبير من المصريين والأجانب اللي بيشتغلوا بهمة وبيتبرعوا بوقتهم ومجهودهم عشان ينشروا القبول والحب بين الثقافات المختلفة.

Safarni team

الصورة: سفرني

– ايه الخطوات الجاية اللي ناويين تعملوها وايه خططكم في المستقبل

المبادرة بتكبر كل يوم. مش بس بنعمل ورش عمل بصفة دورية في القاهرة، لكن كمان بندرب المدرسين برة مصر عشان ينفذوا ورش سفرني بنفسهم. دلوقتي هدفنا الأساسي هو ظبط منهجنا عشان نقدر نخليه مؤثر على قد ما نقدر، وبنطور طرق عشان نقيس تأثير اللي بنقدمه على الأطفال.

لو حابين تعرفوا أكثر عن سفرني ونشاطتهم ادخلوا على موقعهم هنا أو على صفحتهم على الفيسبوك.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.