ازاي تقضي يوم كامل في منطقة مونمارت في باريس بأقل فلوس

حي مونمارت باريس
June 4, 2017

منطقة مونمارت من أشهر الأماكن السياحية في باريس اللي لازم تزورها على الأقل مرة. المنطقة ديه تُعتبر لسة جديدة بعد ما الحكومة الفرنسية عملتها في سنة ١٩٩٥ لكن المكان نفسه موجود من زمان واشتغل فيه فنانين عالميين زي فان جوخ وبيكاسو وسلفادور دالي. غير طبعاً الأفلام الكتير اللي اتصورت هناك وأهمها Moulin Rouge، Amelie، La vie en rose.

*اقرأ/ي أيضاً | أعمل ايه في باريس في يوم واحد؟

كنيسة Sacre Coeur هي من أشهر المعالم اللي بتجذب السياح لباريس ولمونمارت خصوصاً. بالإضافة لمعالم وأماكن تانية مشهورة ممكن تخليك تقضي نص يوم او يوم كامل في مونمارت بس. وعشان ده مكان سياحي فطبعاً الأسعار هناك بتبقى أغلى لكن تقدر بسهولة تستمتع بوقتك هناك بأقل فلوس لو بعدت عن شوية حاجات غالية السياح بيعملوها في معظم الأوقات.

فندق في باريس

تصوير عبدالرجمن عمرو

طريقة الوصول لمونمارت

هتعرف توصل للمنطقة ديه بكل سهولة في أي مكان أنت فيه من خلال شبكة مترو باريس الممتازة. إركب مترو رقم ١٢ وانزل في محطة Abbesses اللي هطلعك في نص المنطقة بالظبط وهتبقى على بُعد كام خطوة من كنيسة ال Sacre Coeur. أما لو عايز تبدأ مونمارت من أوله، يبقى تركب مترو رقم ٢ وتنزل في محطة Blanche.

مترو باريس

الصورة: Wikimedia

إبدأ بال Sacre Coeur

كنيسة القلب المقدس في باريس والمحيط حواليها من أجمل الأماكن اللي ممكن تروحها في باريس. الجنينة اللي قدام الكنيسة نفسها بتخليك تشوف باريس كلها من فوق في منظر خرافي غير كدة تقدر تدخل الكنيسة من غير ماتدفع اى فلوس.

كنيسة القلب المقدس باريس

الصورة: res.cloudinary.com

زور Place du Tertre ومعرض سيلفادور دالي

بعد كام خطوة من الكنيسة تقدر تروح المكان اللي هيحسسك بالفن الفرنسي واللي هيأكدلك أن فيه فنانين كتير اشتغلوا في المنطقة ديه. Place du Tertre مكان مليان فنانين مختلفين بيعرضو شغلهم في الشارع وممكن تشتري منهم. خد بالك بس أن حاجتهم بتبقى غالية جداً. في نفس المكان ده لازم تروح معرض الفنان العالمي سلفادور دالي الدائم اللي بيتم فيه عرض حوالي ٣٠٠ قطعة فنية من أعماله معظمها تماثيل ومنحوتات.

منطقة مونمارت

الصورة: panoramio

عدي على Moulin Rouge

لأن ممكن تدفع فلوس كتير عشان بس تدخل أي عرض في Moulin Rouge ففي الغالب هتستخسر لكن ده مايمنعش انك لازم تعدي وتشوفها من بره وتاخد صورة قدام واحد من أشهر أماكن الإستعراض في العالم.

مولان روج

الصورة: Bluefox

إتمشى في Boulevard de Rochechouart

زي ما هو واضح من الصورة، الشارع لوحده عبارة عن قطعة فنية. مجرد التمشية هناك هتكون مسلية بالنسبالك.

شوارع باريس

الصورة: Wikimedia

شوف Place Dalida

ده جزء في مونمارت فرنسا خلدته تكريماً للمغنية المشهورة اللي اتولدت في مصر وعاشت جزء من حياتها في مونمارت. عشان توصل للمكان ده هتركب المترو وتنزل في محطة Lamarck. ولو عايز تشوف المكان اللي داليدا إدفنت فيه، إطلع على مقبرة مونمارت وهناك هتلاقي مقابر أهم الناس اللي عاشت في مونمارت زي داليدا وفنانين تانيين.

داليدا في باريس

الصورة: panoramio

لو قررت انك تشتري سوفنيرز وتقعد في مطاعم وكافيهات في منطقة مونمارت فاحتمال كبير تدفع فلوس كتير. إنما لو عملت الكام حاجة اللي اتكلمنا عليهم هتلاقي نفسك مش هتدفع ولا مليم وفي نفس الوقت هتقضي يوم لطيف. لو عندك أي أسئلة بخصوص باريس إسألنا في الكومنتس وإحنا هنجاوبك. ولو عايز تعرف أكثر عن باريس شوف مقالتنا هنا.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.