محمد رضا: ليه لازم تزور نيبال ولو مرة واحدة

سافر نيبال
July 12, 2017

نيبال كانت دولة استثنائية بالنسبالي على قد ما هي امكانياتها متواضعة ولسه طالعة من زلزال مدمر من سنتين بس إلا أن الناس فيها كانو مُصرين “من الاصرار مش من مصري” انهم يبنو اللي اتهد ويعيدو تطوير البلد ويخلوها تقوم تاني

اقامة نيبال

انا سافرت نيبال  من الكويت أول شهر يوليو على الطيران العماني ترانزيت مسقط وبعدين يطلع على كاتماندو عاصمة نيبال. وكحال اغلب دول شرق آسيا المطر في الصيف حاجه واردة جدا وشبه متوقعه كل يوم. اول ما وصلت المطار كانت بتشتي شتى جامد جدا يادوب اخت عربية وطرت عالفندق.

طيران إلى نيبال

فيزا نيبال

نيبال فيزتها عند الوصول للمصريين. اول لما توصل بتحط جوازك على شاشة كده بيعمل سكان لبياناتك وتلاقيها قدامك مزهزه كده. وبتدخل بعض البيانات على الشاشة وبتقوم ضاغط اوك بيديك ورقة وتروح تدفع ٢٥ دولار وبعدين تدخل على موظف الجوازات. أغلب الدول اللي مش غنية اوي موظفي الجوازات بيبقو بيهزرو وهما مكشرين فتعامل مع الموضوع عادي وخليك انت اللي تضحك.

جمال نيبال

أماكن تروحها في نيبال

اول يوم كان يوم خاص بالمعابد نظراً لان اكثر ديانتين في نيبال الهندوسيه والبوذيه فالمعابد هناك كتيره جدا شبه المعابد اللي في تايلاند وفي نفس الوقت قريبة من الهندوسية بتاعت الهند وده المميز في نيبال. باختصار هي خليط من الهند والصين. من احلي الاماكن برضوا اللي زورتها هناك كان ميدان دربار، وهو ساحة كبيرة ضامة عدد كبير من المتاحف مع بعض.

من مصر إلى نيبال

*اقرأ/ي أيضاً | ١٠ أسباب يخلوك تفكر تزور هونغ كونغ 

من اشهر المناطق السكنية واللي فيها اغلب الفنادق والأسواق الشعبية منطقة التاميل واللي ميعرفش التاميل ديه لغة بيتكلم بيها ناس في كذا حتة في الهند وشرق اسيا. اشتهرت اوي منطقة التاميل بالاسواق الشعبية والحاجات الرخيصة جداااا اللي ممكن تجيبها من هناك.

فيزا نيبال

جبال الهيمالايا و إيفرست

ومن الحاجات الجميله برده اللي ممكن تعملها وانت في العاصمة انك تاخد عربيه وتطلع بيها قمة جبل ناغاركوت ومن هناك تقدر تشوف غروب الشمس من على جبال الهيمالايا اللي فيها أعلى قمة في العالم -قمة افرست – وانت طالع الجبل هتعدي على مزارع شاي كتير ومناظر خضرا فظيعة جدا. الخضرة في كل حتة وهتشم شوية هوا جمال وهيجيلك نفس احساسك لو رحت مدينة إيلا في سريلانكا. خضرا في كل مكان وانت فووووووق جداً.

فيزا نيبال للمصريين

بالنسبة لتسلق جبل إيفرست فده قصة تانية لإنه عايز وقت وانك تكون فعلاً مؤهل أنك تتسلق طبيا مش تاخد الفاس وتقول يلا بينا. اللي بينظم تسلق جبال الهملايا شركات اجنبية وبتدفع فلوس كتير اوي وتأمين على حياتك وقصص كدة طويلة مش زي ما الناس فاكرة خالص. ومن واقع رؤيتي لبعض الجبال في أفريقيا وآسيا، احب اقولك ان منظر جبال الهيمالايا مختلف شوية، اكنها بتقولك انا غيرهم، انا الكبير.

جبال نيبال

نيبال جميلة جدا فعلاً ومن الأماكن اللي الناس مش واخده بالها منها بس فعلا اللي هيروحها هينبسط اوي وهايحس براحة واسترخاء بين ربوع جبال الهملايا. النيباليين بشكل عام طيبين…بس فيهم سنة غباء كده وديه مش شتيمه بس هما فعلا مش سريعي البديهة وتحسهم ملخومين شوية على غير مجتمعات آسيا الثانية.

سافر نيبال

لو استمتعت بالمقالة ديه شوف مقالتنا اللي من خلالها تقدر تعرف ازاي تسافر آسيا بأقل فلوس ممكنة.

محمد رضا
محمد رضا
مهندس مدني بيشتغل في الكويت ومنها بيلف العالم. سافر بلاد كتير زي الإمارات وقطر وروسيا والهند والمالديف وتركيا وماليزيا وسريلانكا وجنوب افريقيا