٦ محلات كتب ومكتبات حول العالم لازم تزورهم لو بتحب الكتب

مكتبا ومحلات كتب حول العالمالصورة: spotcoolstuff.com
July 17, 2017

المكتبات ومحلات الكتب هما ملاذ كل عشاق الكتب في كل مكان في العالم. لو بتحب تقرأ فأنت أكيد عارف الأحساس اللي بيجيلك أول ما بتدخل محل كتب أو مكتبة وتشم ريحة الكتب والورق وتستمتع بهدوء المكان. فلو بتحب السفر والكتب فأكيد هتحب تشوف محلات الكتب الجميلة في البلاد اللي هتسافرها، وأوروبا خصوصاً مليانة محلات كتب أكتر من رائعة تقدر تعتبرهم معالم سياحية.

*اقرأ/ي أيضاً | ٥ أسباب يخلوك تعمل رحلة تطوع برة مصر

ولو مش بتحب الكتب والقراءة، المكتبات والمحلات ديه بالنسبالك تقدر تعتبرها متاحف ومحطات تستحق الزيارة وانت مسافر. لأن عدد محلات الكتب مش قد كدة في مصر نظراً للنسبة القليلة من المصريين اللي بيقرأوا كتب فبالنسبالك زيارة أحد محلات الكتب المشهورة ديه هتعتبر متعة لوحدها.

ديه قائمة بمحلات كتب تستحق انك تزورهم حتى لو مش هتشتري كتب:

١- Shakespeare and Co.

من أشهر محلات الكتب في باريس بسبب تاريخ المكان العريق اللي بدأ في ١٩١٩ ونجح في أنه يستحوذ على إعجاب كتاب كبار زي ارنست هيمنجواي وازا باوند وجيمس جويس اللي كانوا بيقعدوا هناك كتير. المكان مش بس محل أو مكتبة لكن بيتعمل فيه أحداث مختلفة وبيزوره فنانين وكتاب كتير، غير أنه بيسمح للكتاب أنهم يعيشوا فيه في مقابل أنهم يشتغلوا في المكان.

محل كتب في باريس

٢- Dominicanen Bookstore

مكتبة اتعملت مكان كنيسة قديمة في هولندا. تقدر تتخيل الجمال المعماري للمكان جوا وبرا عامل ازاي وضيف عليه عدد مهول من الكتب. المكان فعلاً عبارة عن واجهة سياحية لأن الكنيسة اتعملت في القرن الثالث عشر ودلوقتي اندمجت مع مكتبة في القرن الواحد والعشرين.

أفضل محلات الكتب في العالم

الصورة: architecturerevived

٣- El Ateneo Grand Splendid

في عاصمة الأرجنتين، بيونس آيرس، محل كتب عظيم اتعمل في مكان عريق كان في الأول مسرح بعد كدة اتحول لسينما ودلوقتي بقى محل كتب وموسيقى. زيارة المكان ده أكيد هتكون مختلفة جداً لإنك هتكون بتتفرج علي الكتب في مسرح عمره أكتر من قرن .جريدة الجارديان قيمت المكان ده كتاني أحسن محل كتب في العالم في ٢٠٠٨.

أفضل محلات الكتب في العالم

الصورة: Wikipedia

٤-Libreria Acqua Alta

كتب في قوارب الجندولا. ده اللي بيميز المكان ده عن أي محل كتب تاني في فينيسيا في إيطاليا. اليفطة اللي بترحب بيك مكتوب عليها “أهلاً بيك في أجمل محل كتب في العالم” تقريباً عشان لو وانت بتتفرج على المكان وطلعت راسك من الشباك هتشوف منظر جميل لواحدة من قنوات نهر فينيسيا المشهورة. ديه من المكاتب اللي على قد ما هي معروفة لكن مش كل الناس بتروحها، حاول توصلها لو روحت إيطاليا.

محل كتب في فينيسيا

الصورة: lostateminor

٥-Atlantis

اتنين صحاب كانوا مسافرين لمدة إسبوع جزيرة سانتوريني في اليونان، وهي من أحلى الجزر في العالم، قرروا أن الجزيرة فائقة الجمال ديه مش ناقصها غير حاجة واحدة عشان تبقى كاملة وهي محل كتب. حولوا المكان من بيت مهجور لمكان تقدر تاخد فيه كتابك وتقراء وانت بتتفرج على غروب الشمس.

محل كتب في جزيرة سانتوريني، اليونان

الصورة: fortunegreece

٦-Stanfords

ده فعلاً المكان المثالي لعشاق الكتب والسفر لأنه عبارة عن محل كتب لكل الكتب اللي ليها علاقة بالسفر. بالإضافة إنه في مدينة خرافية زي لندن. Stanfords مشهور بكونه بيمتلك مجموعة خرائط كبيرة، فيها خرائط عمرها قديم جداً. ورغم تقدم الزمن وعدم احتياج الناس لكتب السفر والخرائط إلا أن المكان لسة محتفظ برونقه وبيلهم ناس كتير لأماكن يسافروها.

مكتبات لندن

الصورة: Driveontheleft

سواء كنت مهتم بالكتب أو لأ، الأماكن ديه مش مجرد محلات بتبيع كتب لكن منها محلات تاريخية تعتبر وجهات سياحية ومنها محلات في أماكن مميزة جدا هتخليك تستمتع بوقتك وانت هناك.

ابعت المقالة ديه لصاحبك اللي مهتم بالكتب والقراءة :)

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.