مشاهير سفر | أنطوني بوردان، مقدم برامج عن الأكل والسفر

أنطوني بوردان أكل وسفر
July 30, 2017

بتحب السفر والأكل؟ مش أكتر من أنطوني بوردان، الشيف والكاتب ومقدم برامج التليفزيون. قليل إنك تقدر تلاقي حد بيمزج حب السفر وحب الأكل في برنامج واحد تقدر تشوفه على يوتيوب، وده اللي بيخلي أنطوني شخص مميز.

ورغم إنه حالياً مش شيف إلا أن خبرته القديمة من شغله في أشهر مطاعم أمريكا بتخليه يعرف يختار الأكل الكويس في كل مكان في العالم وغير ناس كتير، معروف عنه أنه مابيجاملش أي مطاعم وبيقول رأيه بصراحة قدام الكاميرا بدون تردد.

*اقرأ/ي أيضاً |  ٣ دروس في الحياة اتعلمتهم من الراجل اللي بيلف العالم على رجليه

ترشيحاته في الأكل تقدر تستخدمها على حسب البلد اللي هتروحها وهيساعدك تعرف الأكل اللي ماينفعش تفوته في كل بلد. أشهر برامجه هي No Reservations، The Layover و Parts Unknown. كلهم بيتكلموا عن نفس الحاجتين، السفر والأكل، لكن بطرق مختلفة وفي دول مختلفة في كل جزء في العالم.

برنامج The Layover

أسم البرنامج أو كلمة Layover هي بمعنى إنك تنزل ترانزيت لمدة يوم أو يومين في بلد قبل ما تروح وجهتك الأساسية. من خلال البرنامج، أنطوني بيبقى هو المُسافر اللي على طول عنده ترانزيت في كل مكان في العالم. الحلقة الواحدة بتوريك أحلى الأنشطة اللي ممكن تعملها في البلد ديه في خلال يوم أو يومين وطبعاً بتعرفك على أنواع الأكل المختلفة اللي ممكن تاكلها كفطار أو غذاء أو عشاء.

*اقرأ/ي أيضاً |  عن الأكل في اسبانيا وتقاليده

في كل بلد بيروحها، أنطوني بيقابل سكان البلد وبياخدوه في جولة يلفوا فيها الأماكن السياحية والأكلات السياحية وكمان الأماكن والأكلات الشعبية وأثناء ما بيجربوا كل حاجة أنطوني بيديك النصائح الأفضل في رأيه بعد ما بيكون جربها. المشكلة الوحيدة في البرنامج أنه موسمين بس فمغطاش كل البلاد.

برنامج No Reservations

على عكس برنامج The Layover، البرنامج ده استمر من سنة ٢٠٠٥ لغاية سنة ٢٠١٢، وده خلى أنطوني يقدر يغطي عدد أكبر بكتير من البلاد والأكلات العالمية. أهم البلاد اللي هتيجي في بالك أو حتى اللي مش هتفكر فيها، معظمها أنطوني راحها وقدر يعمل منها حلقات موجودة على اليوتيوب عشان يشرح لنا تجربته فيها وتجربة الأكل هناك. من أهم البلاد والمدن اللي البرنامج بيتكلم عنها في اوروبا هي: لشبونة، نابلس، فيينا، مدريد، باريس، روما، براج، لندن ومدن تانية كتير.

الجزء المهم في البرنامج برضوا هو الحلقات الموجهة لدول جنوب شرق اسيا وأكلها الخرافي. الحلقات ديه تعتبر مهمة لينا بسبب قلة معرفتنا بالدول ديه وقلة زيارتنا ليها. من ضمن الدول الموجودة في البرنامج: ماليزيا، تايلاند، فيتنام، سنغافورة، كامبوديا، الهند والصين. مش ده بس اللي يستحق المشاهدة لأن في حلقات جميلة عن دول أمريكا الجنوبية والشمالية هيخلوك مستعد تسافر على هناك في أسرع وقت.

أنطوني بوردان في مصر

سنة ٢٠٠٨ في الموسم الرابع لNo Reservations، أنطوني سافر لمصر وجرب أنواع مختلفة من الأكل المصري. طبعاً مش الأهرامات ولا أبو الهول والحسين اللي أخدوا اهتمامه لكن الأكل هو اللي استحوذ على حلقة البرنامج. ولأنه عايز يوري المشاهدين بتوعه إزاي تعيش كمصري وتاكل كمصري، بدأ يومه بفطار عادي وأكل فول من على عربية وبعديها كباية عرق سوس. طبق كشري من أبو طارق وحبس بكباية شاي وحجر قص على القهوة بعد كدة كباب وكفتة وملوخية وبط وحمام. أنطوني أكل فعلاً كل ما ليه علاقة بالأكل المصري وبعد عن الأكل السياحي.

*اقرأ/ي أيضاً |  ٦ أكلات رخيصة تعملهم بسهولة وأنت مسافر

تابعوا أنطوني بوردان وإتفرجوا على برامجه واقرأوا كتبه لأنها مش بس هتحمسكوا للسفر لكن كمان هتعلمكوا عن دول كتير وعادات وأكلاتهم المختلفة.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.