عبدالرازق طوسن: باريس في يوم واحد والنوم في المطار

مطار باريس
August 10, 2017

قضيت في فرنسا مغامرة صغيرة في يوم واحد. الفكرة بالنسبالي اني ماكنتش عايز اروح فرنسا اصلا لكن لأني أخدت الفيزا من سفارة فرنسا لأنها مش بتطلب ورق كتير فكان أحسن حاجة اني يا إما أنهي السفرية لأوروبا من فرنسا أو أبداها من هناك. اخترنا ان باريس تكون البداية ونروح بعد كدة البلاد اللي عايزين نروحها براحتنا.

*اقرأ/ي أيضاً | أعمل ايه في باريس في يوم واحد

كان مهم بالنسبالنا قوي اننا نوفر فلوس في باريس على قد ما نقدر لأن باريس غالية في كل حاجة وهيبقى أحسنلنا نستخدم الفلوس ديه في البلاد التانية. فقررنا اننا بدل ما نحجز فندق أو هوستيل، نوفر فلوس الإقامة وننام ليلة واحدة في المطار نكون شفنا اللي محتاجين نشوفه في باريس بعد كدة نسافر.

تحط شنتطك فين؟

وفعلا عملنا كدة. بس أول حاجة جت في بالنا لما نزلنا المطار كانت اننا فكرنا هنسيب الشنط فين، لأن مهما كانت الشنط مش ثقيلة فهي هتلخمك لو قاعد في بلد لمدة يوم أو كام ساعة ترانزيت. وصلنا لأفضل حل وهو اننا سيبنا الشنط في Lockers مطار شارل ديجول ونتحاسب فيها بالساعة. احنا سبناها الساعة ١٠ الصبح وأخدناها تاني يوم الساعة ستة الصبح وده كلفنا ١٥ يورو. يمكن ده يكون مش مبلغ قليل لكن بيخليك تريح دماغك من هم الشنط.

كام ساعة في باريس

أخدنا القطر من المطار وبعدها المترو عشان نوصل وسط البلد ونبدأ نلف. روحنا برج ايفيل وكام مكان من الأماكن اللي كنا عايزين نروحها. الناس عاملونا كويس جدا لما كنا بنسأل على مكان شارع معين أو محتاجين نعرف حاجة، عكس ما ناس كتير بتقول عن الناس في باريس والفرنسيين عموماً

بلاش القطر بليل

طبعا عشان كنا عايزين نستغل كل ثانية في اليوم، خلصنا متأخر وركبنا آخر قطر رايح المطار وديه ماكنتش أحسن حاجة تتعمل. لأن القطر ساعتها كان يخوف الصراحه وأول ما دخلنا لقينا ناس بتشرب حشيش جوا مع أن السجاير حتى ممنوعة! شوية ولقينا واحد تاني مجنون عمال يخبط على الإزاز كأنه هيكسره. وديه حاجة مهمة تحطها في بالك بخصوص باريس وهي انك تحاول ما تركبش مواصلات عموماً في أوقات متأخرة.

نصائح للنوم في المطار

مهم انك لو هتنام في المطار يكون معاك كوينز، لأن لو هتقعد جوا المطار فترة طويلة كل المحلات هتكون قافلة ومش هتلاقي مكان تشتري منه أكل أو شرب غير الماكينات اللي مش بتاخد غير كوينز. تاني حاجة هي انك قبل ما تقرر تنام في المطار تقدر تدخل على موقع sleepinginairports.net اللي بيقولك معلومات عن كل مطار في العالم وأحسن الأماكن اللي تنام فيها في المطارات ديه ونصائح وإرشادات النوم هناك.

*اقرأ/ي أيضاً | ٦ نصائح مهم تعرفهم لو اضطريت تنام في المطار

المفروض في المطار مسموحلك تقعد فيه من الساعة ١٢ لغاية ٦ الصبح عشان ده معاد أول قطر بيتحرك من المطار لوسط البلد، واحنا طيارتنا كانت الساعة ستة ونص أصلاً. بدأنا نوم أول ما وصلنا وعلى الساعة ثلاثة كدة جه واحد من أمن المطار صحانا وقلنا ماينفعش ننام هنا. عملنا نفسنا صحينا وأول ما مشي كملنا نوم تاني الصراحة. الفكرة أن النوم ممنوع فعلا في المطار بس هو مش بيعدي غير مرة واحدة يقول للناس كلها كدة عشان يعمل اللي عليه. فأنت اصحي لغاية ما يمشي وكمل نوم.

تجربة انك تقضي يوم كامل في بلد ماتعرفهاش وترجع تنام في المطار مش مريحة طبعا لكن تستاهل لو انت مهتم توفر فلوس. باريس مدينة حلو لكن انا ماكنتش مهتم اروحها أوي لأنها سياحية بزيادة ومش هشوف أهل البلد هناك. المدينة سياحية اوي ومليانة عرب وجنسيات مختلفة وانا لما بسافر بيكون مهم بالنسبالي أتعرف على ناس من اهل البلد وأتصاحب عليهم.

مصر باريس

في مجموعة محترمة من المقالات كتبناها عن باريس، ادخل على اللينك ديه لو مهتم تعرف أكثر عن مدينة النور.

عبدالرازق طوسن
عبدالرازق طوسن
مهندس مش بيشتغل في الهندسة ومهتم أكثر بالتكنولوجية والسفر. عبدالرازق سافر اوروبا أكثر من مرة واستكشف أجزاء كبيرة من المانيا. لما بيسافر، أهم حاجة بالنسباله انه يتعرف على أهل البلد ويجرب يعيش حياتهم.