٤ حاجات لازم تعرفوها قبل ما تسافروا بلغاريا

سافر بلغاريا
August 10, 2017

ممكن ماتكونوش عارفين إيه اللي تتوقعوه لما تزوروا بلغاريا، وهيكون عندكم حق، بلغاريا فيها حاجات كتير مش متوقعة، تقدروا تقولوا عليها “بلد استثنائي”، ولو محتاجين دليل على كده، خلينا نقولكم هنا ليه هي بلد استثنائي.

ولو عايز تعرف ازاي تطلع الفيزا، ادخل على المقالة ديه اللي فيها شرح لكل الخطوات.

١-  بلغاريا مش مجرد مكان ساحلي

معظم السياح اللي بيروحوا بلغاريا بيروحوها علشان البحر، الشواطئ هناك أكتر من رائعة، بس بلغاريا مش مجرد مكان تقضي فيه وقت على الشاطئ بس؛ هتلاقي أماكن كتير تزوروها وتلف فيها وهتبهرك، زي مثلًا: العاصمة “صوفيا”.

شواطئ بلغاريا

العاصمة “صوفيا” تعتبر أكبر مدنها مساحة، ومركزها الثقافي والاقتصادي، ده غير تاريخها العريق، ومشهورة بالخضرة والجناين الكتير. بس دلوقت خلينا نعرفكم على أشهر الأماكن اللي ممكن تتفسحوا فيها لما تزوروا “صوفيا”:

–        متحف Socialist  للفن:

معروف إن بلغاريا بلد “اشتراكي” سابق، هتلاقوا في المتحف تماثيل برونزية متنوعة للقادة البلغاريين، ومعظم التماثيل دي موجودة في جنينة واحدة، وده هيكون فرصة حلوة إنكم تعرفوا تاريخ بلغاريا أكتر، وتستمتعوا بالحديقة والهوا.

–        كنيسة القديس Saint Nikolas  الروسية:

كنيسة قديمة في قلب المدينة، الكنيسة في حد ذاتها تعتبر قطعة فنية عظيمة، هتلاقوا قبابها معمولة من الدهب، وألوانها مبهجة جدًا..تحفة معمارية ماتفوتوش زيارتها.

–        بيت الحلزون:

من المباني المميزة الموجودة في “صوفيا”، المبنى أخد ١٠ سنين لحد ما اتبنى، حلزون ضخم ملون، من أروع المباني اللي ممكن تشوفوها في حياتكم ده غير إنه من أغربها كمان!

–        مسجد بينا باشي:

معلم مهم بيخلد فترة الحكم العثماني، المسجد اتبنى سنة ١٥٧٦م، وموجود زي ما هو لحد دلوقتي، بيميزه المئذنة العالية، والقبة الضخمة، ومسموح الصلاة فيه، وبتستخدمه الجالية المسلمة اللي بتعيش هناك

مسجد بلغاريا

–        متحف التاريخ الوطني:

من أكبر المتاحف المعروفة في شبه جزيرة البلقان، هو متحف تاريخي فيه عدد كبير جدًا من التحف الأثرية المتنوعة من التراث الثقافي البلغاري، ومن خلاله تقدروا تتعرفوا على تاريخ المدينة القديم.

–        كنيسة القديسة صوفيا:

واحدة من أقدم الكنايس اللي اتبنت في العاصمة البلغارية، بيرجع تاريخها للقرن السادس الميلادي، وكانت هي السبب في أن العاصمة يبقى اسمها “صوفيا”.

كنيسة صوفيا

–        متحف Earth And Man National:

بيقدم المتحف تشكيلة كبيرة من المعادن في العالم، هتلاقي حوالي ٥٠٪ من المعادن اللي موجود في الطبيعة هناك، فلو كنتوا من محبي العلوم ماتفوتوش زيارته.

٢-  آه.. ولأ

طبعًا في معظم البلاد لما بنحرك راسنا يمين وشمال بيكون معناها “لأ”، ولما بنحركها من فوق لتحت بنقصد بيها “آه”، في بلغاريا هتقابلكم مشكلة لو عملتوا كده، لإن الآه بتاعتنا تعتبر “لاء” عندهم، فعلشان ماتتلغبطوش حاولوا ماتتكلموش مع حد بالإشارة علشان مايفهمش عكس اللي أنتم عاوزينه.

٣- العُملة

العملة في بلغاريا هي “الليف البلغاري” وهو بيساوي نص يورو، سهل جدًا تحولوا العملات في بلغاريا، كمان في الأماكن الساحلية أو العاصمة هتلاقوا حتت كتير بتتعامل باليورو عادي، وممكن ماحدش يضطر لتحويل العملة.

عملة بلغاريا

كمان لازم تعرفوا إن بلغاريا من أرخص عواصم أوروبا، هتقدروا تاكلوا هناك أكل كتير رخيص جداً، ده غير إن المطبخ بتاعهم متنوع جدًا ومش هتقدروا تقاوموا أكله.

٤- اللغة

اللغة في بلغاريا هي “البلغارية” واحدة من اللغات “السلافية الجنوبية”، الإنجليزية مش شائعة هناك على عكس الروسية والألمانية اللي يعتبروا اللغة التانية نسبيًّا.

لكن ماتفكروش إن اللغة هتمنع السكان من إنهم يتواصلوا معاكم، أو يساعدوكم وقت ما تكونوا محتاجين مساعدة؛ فأكتر حاجة معروفة عن الشعب البلغاري هو إنه ودود جدًا واجتماعي خصوصًا مع السياح.

ودلوقتي.. نفسك تزور بلغاريا؟.. رحلتنا لبلغاريا هتكون يوم ٦ أكتوبر..العدد قرب يكتمل.. يلا بسرعة احجز مكانك معانا من هنا.

SuperCoucou
SuperCoucou
Discover adventures. Create group trips. Save money and meet new people.