أهم أكلات المطبخ البلغاري

أكل بلغاريا
August 15, 2017

المطبخ البلغاري مش مشهور زي باقية المطابخ العالمية، لكنه مايختلفش عنهم كتير حتى لو ماكنش أكتر حاجة الناس بتركز عليها لما بتزور بلغاريا، النهاردة هنقولك إيه أكتر الأكلات الحلوة المشهورة هناك، وهنعرفك كمان على أهم كلاسيكيات المطبخ البلغاري، علشان لما تروح ماتتسوحش، وتعرف هتاكل إيه ومكونات اللي هتاكله.

أكتر الحاجات المشهورة في بلغاريا هي “اللبن الزبادي والجبنة البيضا”، نقدر نقول إنهم جزء أساسي من السفرة البلغارية ديماً، وبيتقدموا بأشكال مختلفة جداً.

خلينا نبتدي بالفطار، ونعرف إيه أشهر وألذ وجباته:

-البانيتسا:

من أشهر وجبات الفطار في بلغاريا، عبارة عن معجنات محشية أنوع كتيرة من الحشو زي: الجبنة، السبانخ، اللحمة..وغيرها كتير.

banista بانيستا بلغاريا

-بوبارا:

من الوجبات واسعة الانتشار في بلغاريا، كل الأطفال هناك بيحبوها، وهي عبارة عن كوباية شاي أو حليب دافي، مع شريحتين خبز مفرومين وعليهم نوع معين من الجبنة البيضا البلغارية، وشوية زبدة وسكر (لو كنتوا بتحبوا الحاجة حلوة)، كل ده بيتحط في طبق ويتخلط ببعضه، ممكن يبانلكم إنه غريب لكن الأكيد إنه من ألذ الحاجات اللي هتاكلوها في حياتكم.

أكل بلغاريا

-ميكيتساس بالجبنة الفيتا والزبادي البلغاري:

عبارة عن عجين مقلي معمول من الدقيق والبيض والزبادي ونوع معين من الزبدة وملح وزيت، بيتقلي وبيتقدم مع الجبنة أو المربى أو العسل أو اللبن الزبادي البلغاري.

الأكل البلغاري لذيذ وديماً هتحس إنه طازة، بلغاريا زي شهرتها بمنتجات الألبان مشهورة كمان بالتوابل واللحوم، ده غير المأكولات البحرية طبعًا، لكن خلينا دلوقت في الخضراوات.. بلغاريا بتزرع خضراوات كتيرة، علشان كده هتلاقوا السلطة بردو ليها مكان مميز على السفرة البلغارية، ومن أشهر السلطات هناك واللي تستحق تتجرب هي سلطة “الشوبساكا”.

وهي سلطة بلغارية ليها شهرة عالمية، بسيطة لكن ماتتفوتش، عبارة عن مكعبات طماطم وخيار وبصل وفلفل، مع جبنة سيريني مبشورة، وهي جبنة مشهورة جدًا في جنوب شرق أوروبا، وبتتعمل من لبن الغنم أو البقر، وساعات من الاتنين، وبتتزين السلطة بالبقدونس.

والغريب إن ألوان السلطة لما تبصلها هتحس إنها ألوان علم بلغاريا.

أما بقى لو ليك في الشوربة فأشهر الشوربات شعبية هناك هي شوربة “التاراتور”.

tarator بلغاريا

شوربة خفيفة ومنعشة وباردة، بتتعمل من اللبن الزبادي والخيار والتوم والشبت والجوز المطحون مع شوية توابل، وتعتبر من أكتر الشوربات المناسبة للصيف.

لو بصينا على الأطباق الرئيسية في بلغاريا هنلاقي المشويات هي أهم الأكلات هناك زي: الكفتة والكباب، أو اللحمة المشوية عمومًا هي أكتر حاجات بتسيطر على قائمة الأكل.

المطبخ البلغاري كبير ومختلف.. بس اللي كل الناس متفقة عليه إنه أكيد يستحق التجربة.

ودلوقتي.. نفسك تزور بلغاريا وتجرب كل الأكلات دي؟.. رحلتنا لبلغاريا هتكون يوم 6 أكتوبر.. العدد قرب يكتمل.. يلا بسرعة احجز مكانك معانا من هنا.

SuperCoucou
SuperCoucou
Discover adventures. Create group trips. Save money and meet new people.