أحمد أيمن: ١٠ أماكن زرتها في لندن

سافر لندن
August 23, 2017

روحت لندن لمدة ١٣ يوم في الشتاء مع العائلة وكانت من أمتع الرحلات اللي عملتها في حياتي. بعد رحلة صغيرة (أربع ساعات ونص) على مصر الطيران وصلنا مدينة الضباب وبدأنا الإكتشاف.

لندن مليانة سياح وأغلبيت السياح عرب. مرة ركبت اتوبيس الاتوبيس كان كله سياح وماكنش فيه غير السواق بس الإنجليزي. الاسعار هناك غالية عموماً يعني ازازة المياه في الأماكن السياحية هتلاقيها بجنيه وثمانين سنت استرليني. لما بتبعد عن المناطق السياحية كل حاجة بتبقى أرخص مليون مرة طبعاً.

الإقامة

المكان اللي قعدنا فيه كان مجموعة شقق فندقية كدة اسمها Oxbridge Apartments ديه كانت في حتة اسمها Cromwell Road ،أقرب حاجة في المنطقة ديه هي سلسلة محلات هارودز وفي محطة مترو قريبة جداً منها حوالي ٥ دقائق مشي. كنا حاجزين استوديو صغير ال١٠ أيام ب١٣٠٠ إسترليني. من مميزات الفندق ده إن قدامه على طول Sainsbury’s ،أكبر سوبرماركت هناك.

المواصلات

في كارت لطيف معمول للمواصلات إسمه Oyster Card ده فيه كذا اوبشن سواء تاكسي، اتوبيس بس أو الاتوبيس والمترو. الكارت ثمنه في الأسبوع حوالي ٢٠ جنيه إسترليني للاتوبيس بس. وممكن تعمله شهري أو سنوي حسب الفترة اللي هتقعدها. التاكسيات غالية جداً بس طبعاً ده عشان فرق العملة كبير. والمترو بحوالي ٢٠ أو ٢٥ إسترليني.

*اقرأ أيضاً | ازاي توفر فلوس مواصلاتك في لندن

نيجي بقى للأنشطة أو الأماكن السياحية:

بيج بن

على قد ما هي من أهم معالم المدينة وناس كتير بتيجي عشان تشوفها إلا انك لما تروح هناك هتكتشف انها عادية جداً ومش مستاهلة تضيع عليها وقت. يمكن متعتها الوحيدة انك تشوفها وهي بترن وهي عموماً بترن كل ساعة. وطبعاً تتصور عندها.

London Eye

هتوصلها بمجرد انك تعدي كوبري من عند بيج بن. هتعرف توصلها بسهولة من منظر السياح اللي على الكوبري وقاعدين بيصوروا بس ده مش أحسن مكان تتصور فيه. غير ان بليل بيبقى شكلها مختلف عن الصبح بسبب الأنوار.

التذكرة كنا واخدينها بعرض عشان كنا عيلة. لو أقل من ١٢ سنة بتبقى نص تذكرة. وفي تذكرة بتبقى شاملة خريطة بتفتحها بتعرف من فوق مكان كل حاجة. ممكن تزود فلوس وتخش المسرح تتفرج على فيلم ٢٠ ساعة عامل زي فيلم وثائقي عن المكان وممكن يصورك جوا ويركبلك الصورة كأنك واقف على London Eye نفسها.

أنا جبت تذكرة شاملة المسرح ودخول London Eye بس. المكان مليان محلات هدايا لو عايز تشتري سوفنيرز. بعد كدة بتطلع London Eye بتاخد حوالي ربع ساعة في اللفة الواحدة، هي عبارة عن كبسولة فيها كنبة في النص وفيه زي اي باد فيه برنامج بيشرحلك ايه اللي قدامك. طبعاً المنظر من فوق رهيب وملوش وصف.

هي حلوة لإنك ممكن تقضي اليوم هناك بعد ما تخلص تروح ملاهي صغيرة جمبها وتتفرج على العروض اللي الناس بتعملها في الشارع وحواليك جنينة خضراء جمالها مش طبيعي.

Changing Guards

حدث بمواعيد محددة في الأسبوع. الشوارع بتبقى مفتوحة حوالي قبلها بساعة بس انت بتروح قبلها بثلاث ساعات عشان تلاقي مكان حلو. القصر قدامه ميدان في شارع آخره المقر بتاع الحرس. ده المكان اللي بيتغير فيه حرس القصر الملكي. الشوارع حوالين المكان بتتقفل ومفيش عربيات بتعدي ومفيش ناس تعدي الشارع. لو وقفت في حتة معينة مش هتعرف تتحرك غير لما الحراس يبدلوا والحدث يخلص.

اللي بيحصل أن طقم الحرس بيجوا مشيين على رجليهم وحواليهم خيول من مبنى الحراس ماشيين المشية العسكرية ولابسين اللبس بتاعهم. في نفس الوقت الحراس اللي جوا القصر يتجمعوا كلهم وبيبقوا جاهزين عشان يبدلوا، بيقفوا قدام بعض، يطلع راجل منهم بينادي أسامي وكل واحد حسب إسمه يبدل مع المجموعة التانية.

عن نفسي حسيتها حاجة مملة وعادية مش مستاهلة أصحى بدري عشان حاجة بتقعد نص ساعة وبتخلص. حسيتها حاجة واخدة شهرة زيادة عن اللزوم.

Hyde Park

ديه جنينة كبيرة جداً جداً. طول ما أنت ماشي في عجل للإيجار بتأجرها ب٢ جنيه استرليني في اليوم. مهم تجرب العجلة قبل ما تاخدها عشان في عجل بيبقى فيه عيوب. المعلومة ديه مهمة ليه، عشان لو أخدت العجلة قدامك ٢٤ ساعة وترجعها، لو عايز تبدلها لازم تدخل الكريديت كارد تاني ويحسب عليك فلوس تاني.

أنا نصيحتي انك لو روحت مش هتعرف تلف عليها برجلك كلها فتاخد عجلة أحسن. فيه أماكن مينفعش تمشي فيها بالعجلة بس ينفع تاخد العجلة جمبك وتممشى بيها فمش هتتعب. كل ما تتمشى هتكتشف حاجات مختلفة وجديدة.

لو الجو حلو ومعاك ناس ممكن تقضي يوم كامل هناك مش هتزهق لو مجرد بتعمل بيكنيك بسيطة. في معالم سياحية مختلفة هناك وبحيرات تقعد تتفرج عليها وتتصور جمبها وحيوانات صغيرة في كل حتة. أنا عن نفسي بحب الأنتخة فممكن أقعد يوم كامل في Hyde Park من غير مشكلة.

Oxford street

مش مسموح فيه غير الاتوبيسات والتكاسي وأقرب محطة مترو ليه Marble Arch ومش مسموح بدخول عربيات ملاكي. شارع بتاع كيلو أو اتنين كيلو كله محلات من كل الماركات اللي ممكن تتخيلها وهو مهياء عشان الناس تتمشى فيها وتتفرج على المحلات. فيه محلات وماركات مختلفة هناك مش هتشوف زيها.

مول WestField

عامل زي سيتي ستارز مفيش فرق رهيب عنه بس مليان براندات برضه. ليه فرعين واحد في Shepherd’s Bush ده اللي روحته والتاني ناحية ال Olympic Park

Edgware Road

ده من أول ما بتدخله لغاية اخره كله محلات العرب ومحلات الشيشة والأكل حلال. ده من أكثر الشوارع اللي مش بتقفل غير متأخر أو متأخر عن بقية المحلات في لندن. هتلاقي فيه القهوة التركي والشيشة المعسل وكدة. مش هتلاقي أو هتتعامل غير مع عرب هناك.

London Bridge

مفهوش حاجة أوي بس كون انك تمشي عليه ديه حاجة حلوة لوحدها. المنظر من عليه والقاعدة جمبه رهيبة وبيفتح وبيقفل على طول. فيه هناك زي سفينة من أيام الحرب أثرية الناس بتروح هناك مخصوص عشان تتفرج عليها.

Kyoto Garden – Holland Park

جنانين مريحة ولطيفة جداً فيها بحيرات صناعية جواها سمك ملون وحيوانات حواليها كتير زي السناجب والحمام وطواويس وبط. جو هادي ولطيف بعيد عن الدوشة بتاعت المدينة.

ستاد ستامفورد بريدج إميريتس

ده للناس اللي بتحب الكورة هيستمتعوا هناك جداً لما يدخلوا اثنين من أحلى استادات لندن. لو عرفت تحضر ماتش طبعاً يبقى حظك حلو بس ديه حاجة صعبة شوية عشان أسعار التذاكر غالية بشكل مبالغ فيه، غير انه لازم تحجزها قبلها بفترة. الجوالات اللي جوا الإستاد هي أكثر حاجة تقدر تعملها وفي نفس الوقت بتبقى جولة ممتعة جداً بتشوف فيها كل حتة في الملعب.

Coent Garden

مكان مليان ناس بتغني وعروض طول الوقت حلوة وبتتفرج عليها ببلاش. ممكن تقعد في كافيه أو مطعم لو حابب تتغدى وتقضي نص يوم هناك.

متحف الشمع، مدام توسو

أشهر متاحف العالم. فرع المتحف اللي في لندن فيه بتاع ٤٠٠ شخصية معمولين بالشمع. الدخول بحوالي ٣٠ إسترليني. يستاهل الصراحة من كتر ما الشخصيات شكلها حقيقي فهتنبهر بيها وهتقعد بقى تتصور مع الشخصيات ديه. بيبقى ممتع أكثر لو معاك صحابك أو عائلتك

فيزا لندن

لو مهتم السفر للندن، شوف نصائح عن أنشطة تانية ممكن تعملها من هنا.

أحمد أيمن
أحمد أيمن
كاتب مشروع سفر