وزارة الخارجية: ادخل اوروبا من الدولة اللي أخدت منها الشينجن

فيزا اوروبا شينجن
September 7, 2017

بعد تكرار كذا حالة لرفض مسافرين مصريين في مطارات دول شينجن بسبب انهم كانوا داخلين بفيزا من بلد غير اللي هما رايحنها، وزارة الخارجية طلعت بيان بتحذر فيه من السفر لدولة في منطقة الشينجن من غير ما يكون معاك فيزا من الدولة ديه وبتنصح بالسفر للدولة اللي أخدت منها الفيزا كأول وجهة للسفر.

بيان وزارة الخارجية صدر تحديداً بعد ما حصلت مشكلة في مطار فرانكفورت مع مجموعة من المصريين كانوا داخلين ألمانيا بفيزا شينجن لكن من دولة تانية. وديه طبعاً مش أول حالة تحصل بخصوص الموضوع ده وتكررت كذا مرة في دول مختلفة في منطقة الشينجن.

يعني البيان بيقول ببساطة، لو أخدت فيزا من فرنسا، سافر فرنسا ومنا روح للدولة اللي عايز تروحها. بلاش تاخد الفيزا من مثلاً أسبانيا وتحجز طيارة مباشر لهولندا عشان ساعتها ممكن تحصل مشكلة.

للأسف في شركات سياحة كتير بتساعد الناس انهم ياخدوا فيزا من أي دولة من دول الشينجن في حالة انهم مالقوش معاد يناسبهم في سفارة الدولة اللي عايزين يروحوها كوجهة أولى من غير ما يحطوا في بالهم أن ظابط الجوازات من حقه يرجعك بسبب حاجة زي كدة، بالرغم من اتفاقية الشينجن وحرية التنقل بين ٢٦ دولة بفيزا واحدة. وده اللي حصل لمجموعة المسافرين اللي اترفض دخولهم من فرانكفورت طبقاً لبيان الخارجية.

اقرأ/ي أيضاً | ٥ أسئلة ممكن تتسئلها من ظابط الجوازات في اوروبا

طبعاً ديه مش الحالة اللي بتحصل دائماً ومعظم الناس بتعرف تدخل البلد اللي عايزاها بفيزا الشينجن من غير ما تكون وجهتهم الأولى هي الدولة اللي خذوا منها الفيزا، وفي ناس كتير كل مرة بياخدوا شينجن بيخشوا من بلد مختلفة، لكن الأكيد أن الأفضل والأضمن هو انك تلتزم بالتعليمات وتدخل من الدولة اللى هتديك الفيزا.

مهم برضه تعرف أن في حالة أنك حاجز تذكرة طيران لدولة أوروبية والرحلة فيها ترانزيت في دولة اوروبية تانية، ضابط الجوازات بيعتبر دولة الترانزيت هي أول دولة هتدخلها في اوروبا وختم الدخول بتاخده من دولة الترانزيت مش من الوجهة الأساسية فبالتالي يُفضل يكون طيرانك مباشر للدولة اللي هتاخد منها الفيزا أو الترانزيت يكون في الدولة اللي معاك فيزتها.

ولمعلومات أكثر عن الموضوع ده، بننصحك تقرأ المقالة ديه اللي بتتكلم عن أهم الخطوات اللي المفروض تعملها بعد ما بتستلم فيزا الشينجن من أي دولة. ولو عايز تعرف طريقة التقديم لفيزا الشينجن والأوراق المطلوبة، ادخل هنا.

مشروع سفر
مشروع سفر
منصة إلكترونية تحتوي على مقالات مختلفة عن كل ما له علاقة بالسفر عشان تساعد المصريين في إنهم يسافروا أكتر.