بهاء فاروق: خمس خطوات هتضمن دخولك روسيا في كأس العالم

روسيا كاس العالم
October 12, 2017

بما أن روسيا حتكون بدون فيزا في فترة بطولة كأس العالم , ايه رأيك تستغل سفرية كأس العالم لروسيا و تسافر و مترجعش !؟ خطة في منتهى الذكاء مش كده؟

للأسف ناس كتير فكرت في التفكير ده و قالت نستغل الفرصة أن دخول روسيا حيكون بدون فيزا و نكسر الفيزا و نعد هناك ندور على شغل بعد البطوله و منرجعش.

*اقرأ/ي أيضاً: محمد أباظة: موسكو وسان بطرسبرغ في الصيف

للأسف الموضوع مش حيكون بالبساطة دي، لان هيكون فيه إجراءات صارمة عند الدخول الى روسيا وبالفعل بيتم ترحيل عدة جنسيات مجرد وصولهم للمطار عند الشك في نواياهم بعدم مغادرة البلاد , علشان كده حقولكم على خمس خطوات لو تم تنفيذهم هتضمنلك ان شاء الله دخول سهل و سريع بدون أي مشاكل.

أولا: لازم ضابط الجوازات يتأكد أنك فعلا داخل علشان تشجع منتخبك وتحضر الماتشات فقط، و ده سهل إثباته بما ان معاك Fan ID وحاجز التذاكر بالفعل.

ثانيا: لازم يكون معاك حجز تذاكر طيران عودة مؤكدة من روسيا و ليست وهمية بحد أقصى ١٠ أيام بعد انتهاء البطولة.

ثالثا: لازم يكون معاك حجز فنادق لكامل مدة الإقامة في البلد مع ملاحظة أن ضابط الجوازات حيطابق تذاكر الماتشات اللي أنت حجزتها بالفعل مع المدن اللي انت حاجز فيها الفنادق (يعني مينفعش تقدم حجوزات فنادق في موسكو و منتخب مصر مثلا هيلعب في سان بطرسبرغ) فمينفعش تعمل أي حجوزات لفنادق حاليا لحين التأكد منتخب مصر حيلعب في أي مدن في روسيا.

رابعاً: لازم يكون معاك مبلغ مالي سواء كاش أو بطاقات ائتمان علشان يتأكد انك هتعرف تصرف على نفسك (مش اقل من ١٠٠٠ دولار تقريباً)

خامسا: يفضل انك تاخد معاك اتش ار ليتر من شغلك وكمان بيزنس كارد ليك و لو كنت طالب تاخد معاك شهادة اثبات قيد أنك مازالت في مرحلة الدراسة وكارنيه الجامعة و لو كنت صاحب عمل تاخد معاك ما يثبت ذلك بالإضافة لكشف حساب بنكي محترم، علشان يتأكد من أنك فعلا داخل تحضر الماتشات فقط.

بالخمس خطوات ديه هتضمن ان شاء الله دخول سهل وسريع وآمن بدون أي عقبات إلى روسيا علشان نرفع علم بلدنا و نشجع منتخبنا و منخسرش فلوسنا.

*ملحوظة: أي شركات سياحة حاليا حتنزل عروض لحضور كأس العالم مع ضمان تذاكر لدخول الماتشات وتذاكر طيران وإقامة فهتكون شركات نصابة، لأن حاليا كل التذاكر المتاحة للبيع لحضور الماتشات هيتم اختيارها عشوائيا حسب قرعة ومفيش ولا واحد في العالم معاه تذاكر مؤكدة، الحاجة التانية مفيش أي ماتش تم تحديده هيتلعب في أي مدينة، فأي شركة هتنزل عروض حاليا أو توعدك أنها منظمة رحلة ومحددة سعر هتكون بتشتغلك لذا وجب التنبيه

أتمنى لمنتخبنا المصري الفوز و تمثيلنا التمثيل المشرف🏆

تابعوا بهاء فاروق على صفحته Travel Secrets هنا أو على الجروب الخاص بالصفحة هنا.

بهاء فاروق
بهاء فاروق
مؤسس صفحة Travel Secrets بيعشق السفر و بينقل خبراته في مجال السفر وأسراره علشان يساعد بيها الناس لتحقيق حلمهم في السفر بأرخص التكاليف لكل دول العالم . بهاء سافر دول كتير في اسيا واوروبا وأفريقيا و كل خبراته بناء على تجاربه الشخصيه و هدفه نشر ثقافة السفر بين الشباب. www.facebook.com/bahaatravelsecrets