عبدالرحمن عمرو: شرح طريقة تأجير عجلة في باريس

تاجير عجلة باريسالصورة: seattletimes
October 18, 2017

من أحلى التجارب اللي عملتها وأنا مسافر هي تجربة تأجيري لعجلة لفيت بيها في شوارع باريس. هنتغاضى عن أني في الأول سوقت العجلة على الرصيف وبرة الحارات المخصصة للعجل لأني ماكنتش لسه فاهم نظام الطرق للعجل هناك، لكن فعلاً استمتعت بسواقة العجلة من غير ما أحس بخطر من العربيات بسبب حارات العجل في معظم الشوارع. غير كدة بتقدر تشوف المدينة وجمالها بطريقة مختلفة عن وانت في اتوبيس، عربية أو وانت بتتمشى.

أجرت العجلة من فين؟

الكلمة السحرية هي Velib. ديه شبكة متكاملة لتأجير العجل في كل مكان في باريس بدأت في ٢٠٠٧ ونجحت بشكل كبير أنها تكون من أساسيات المواطن الباريسي في المواصلات. كل ٣٠٠ متر تقريباً فيه محطة فيها عدد من العجل، كل الفكرة هي انك تأجر العجلة من أقرب محطة ليك، تروح بيها المكان اللي انت عايزه وتسيبها في أقرب محطة من المكان اللي عايز تروحه. فيه حوالي ١٨،٠٠٠ عجلة وأكتر من ١٢٠٠ محطة متوزعين على باريس.

عجل باريس

الصورة: Wikimedia

بكام؟ وادفع الفلوس فين؟

لو هتشتري تذكرة لمدة يوم هتكلفك ١.٧٠ يورو أما لو قاعد كتير وهتشتري تذكرة أسبوع فهتكلفك ٨ يورو. بس لازم تعرف أن العجلة مش معاك اليوم كله، لأن أول نص ساعة مش بتتحاسب أكتر من ثمن التذكرة بعد كدة بتدفع ٢ يورو لتاني نص ساعة وأربعة يورو لثالث نص ساعة وديه أكتر حاجة.

في طريقتين للدفع، يا إما بالكريدت كارد أو بتذكرة تحجزها من على موقعهم من على الإنترنت. بعد ما بتحجز التذكرة من الموقع، بتاخد كود تقدر تستخدمه عشان تاخد عجلتك. الكود صالح لمدة ١٥ يوم فتقدر تعمله قبل ما تسافر وتروح هناك يكون الكود شغال. الدفع بالكريدت كارد بيكون في المكنة بتاعت المحطة اللي متوفرة بثمن لغات .لو هتستخدم العجلة للتنقل من مكان لمكان احتمال تحتاج وقت كتير عشان مش هتبقى عارف الطريق طبعاً فاعمل حسابك على تأجيرها لمدة ساعة مثلاً ولو بتأجرها عشان تتفسح نفس الكلام.

عجلة في فرنسا

الصورة: thesavvybackpacker

بعد ما هدفع، ازاي هاقدر اخد العجلة؟

العملية ديه بسيطة رغم أنها ممكن تبان معقدة. بعد ما هتدفع أو هتدخل الكود، هتمشي ورا التعليمات اللي هتقولك تختار رقم العجلة اللي عايزها، لأنهم بيبقوا مترتبين جمب بعض في المحطة وكل عجلة ليها رقم. بعد كدة هتروح عند العجلة اللي اخترتها وتستني النور اللي على قفل العجلة يبقى لونه أخضر وتبدأ رحلتك في شوارع باريس.

افرض خلصت العجلة ومش لاقي محطة عشان ارجعها؟

ديه صورة لخريطة باريس ومحطات Velib اللي موجودة فيها (النقط اللي بالمووف ديه المحطات). كل ٣٠٠ متر تقريباً فيه محطة فلو بصيت حواليك شوية في الغالب هتلاقي محطة. لو مش لاقي خالص فأحسن حل هو انك تكون منزل أبليكيشن Velib اللي بتقولك أقرب محطة ليك وفيها كام مكان فاضي عشان لو مليانة عجل.

خريطة باريس

الصورة: inforapide

أيه عيوب تأجير عجلة من Velib؟

أكتر مشكلة ممكن تقابلك هو انك ماتلاقيش عجلة تأجرها أصلاً لأن الباريسيين بيستخدموها بشكل يومي عشان يقضوا بيها مشاويرهم. أوقات كمان ممكن عجلة تكون فيها عطل، عشان كدة لازم قبل ما تختار العجلة تتأكد أن على الأقل عجلها مليان ومش متكسرة. ولو الكرسي معمول بالمقلوب، ده معناه ان حد بيقولك العجلة ديه فيها مشكلة.

ثالث مشكلة هي أنك تكون رايح ترجع العجلة في محطة وتلاقي مفيش مكان عشان تحطها، لكن في الحل للمشكلة ديه وهو انك بتروح المكنة بتاعت المحطة وبتطلب ١٥ دقيقة زيادة لأن مفيش مكان وبتعرف من المكنة أقرب محطة فيها مكان فين.

لو استفدت من المقالة ديه ابعتها لحد تعرفه عايز يسافر باريس أو شوف مجموعة مقالاتنا عن باريس من هنا.

عبدالرحمن عمرو
عبدالرحمن عمرو
مؤسس مشروع سفر. مابيسافرش غير لوحده عشان يعمل اللي هو عايزه في الوقت اللي يناسبه. أكتر حاجة عبدالرحمن بيحبها في السفر، الأكل وانه يتعرف على مُسافرين زيه ويتمشى في الشوارع بالساعات من غير ما يزهق.